6.23

स तु त्वदर्थं गृहवासमीप्सन् जिजीविषुस्त्वत्परितोषहेतोः

sa tu tvadarthaṃ gṛhavāsamīpsan jijīviṣustvatparitoṣahetoḥ

6.23.2

भ्रात्रा किलार्येण तथागतेन प्रव्राजितो नेत्रजलार्द्रवक्त्रः

bhrātrā kilāryeṇa tathāgatena pravrājito netrajalārdravaktraḥ

6.24

श्रुत्वा ततो भर्तरि तां प्रवृत्तिं सवेपथुः सा सहसोत्पपात

śrutvā tato bhartari tāṃ pravṛttiṃ savepathuḥ sā sahasotpapāta

6.24.2

प्रगृह्य बाहू विरुराव चोच्चैर्हृदीव दिग्धाभिहता करेणुः

pragṛhya bāhū virurāva coccairhṛdīva digdhābhihatā kareṇuḥ

6.25

सा रोदनारोषितरक्तदृष्टिः संतापसंक्षोभितगात्रयष्टिः

sā rodanāroṣitaraktadṛṣṭiḥ saṃtāpasaṃkṣobhitagātrayaṣṭiḥ

6.25.2

पपात शीर्णाकुलहारयष्टिः फलातिभारादिव चूतयष्टिः

papāta śīrṇākulahārayaṣṭiḥ phalātibhārādiva cūtayaṣṭiḥ

6.26

सा पद्मरागं वसनं वसाना पद्मानना पद्मदलायताक्षी

sā padmarāgaṃ vasanaṃ vasānā padmānanā padmadalāyatākṣī

6.26.2

पद्मा विपद्मा पतितेव लक्ष्मीः शुशोष पद्मस्रगिवातपेन

padmā vipadmā patiteva lakṣmīḥ śuśoṣa padmasragivātapena

6.27

संचिन्त्य संचिन्त्य गुणांश्च भर्तुर्दीर्घं निशश्वास तताम चैव

saṃcintya saṃcintya guṇāṃśca bharturdīrghaṃ niśaśvāsa tatāma caiva

6.27.2

विभूषणश्रीनिहिते प्रकोष्ठे ताम्रे कराग्रे च विनिर्दुधाव

vibhūṣaṇaśrīnihite prakoṣṭhe tāmre karāgre ca vinirdudhāva

6.28

न भूषणार्थो मम संप्रतीति सा दिक्षु चिक्षेप विभूषणानि

na bhūṣaṇārtho mama saṃpratīti sā dikṣu cikṣepa vibhūṣaṇāni

6.28.2

निर्भूषणा सा पतिता चकाशे विशीर्णपुष्पस्तबका लतेव

nirbhūṣaṇā sā patitā cakāśe viśīrṇapuṣpastabakā lateva

6.29

धृतः प्रियेणायमभून्ममेति रुक्मत्सरुं दर्पणमालिलिङ्गे

dhṛtaḥ priyeṇāyamabhūnmameti rukmatsaruṃ darpaṇamāliliṅge

6.29.2

यत्नाच्च विन्यस्ततमालपत्रौ रुष्टेव धृष्टं प्रममार्ज गण्डौ

yatnācca vinyastatamālapatrau ruṣṭeva dhṛṣṭaṃ pramamārja gaṇḍau

6.30

सा चक्रवाकीव भृशं चुकूज श्येनाग्रपक्षक्षतचक्रवाका

sā cakravākīva bhṛśaṃ cukūja śyenāgrapakṣakṣatacakravākā

6.30.2

विस्पर्धमानेव विमानसंस्थैः पारावतैः कूजनलोलकण्ठैः

vispardhamāneva vimānasaṃsthaiḥ pārāvataiḥ kūjanalolakaṇṭhaiḥ

6.31

विचित्रमृद्वास्तरणे ऽपि सुप्ता वैडूर्यवज्रप्रतिमण्डिते ऽपि

vicitramṛdvāstaraṇe 'pi suptā vaiḍūryavajrapratimaṇḍite 'pi

6.31.2

रुक्माङ्गपादे शयने महार्हे न शर्म लेभे परिचेष्टमाना

rukmāṅgapāde śayane mahārhe na śarma lebhe pariceṣṭamānā

6.32

संदृश्य भर्तुश्च विभूषणानि वासांसि वीणाप्रभृतींश्च लीलाः

saṃdṛśya bhartuśca vibhūṣaṇāni vāsāṃsi vīṇāprabhṛtīṃśca līlāḥ

6.32.2

तमो विवेशाभिननाद चोच्चैः पङ्कावतीर्णेव च संससाद

tamo viveśābhinanāda coccaiḥ paṅkāvatīrṇeva ca saṃsasāda

Saundarānanda