6.13

एष्याम्यनाश्यानविशेषकायां त्वयीति कृत्वा मयि तां प्रतिज्ञाम्

eṣyāmyanāśyānaviśeṣakāyāṃ tvayīti kṛtvā mayi tāṃ pratijñām

6.13.2

कस्मान्नु हेतोर्दयितप्रतिज्ञः सो ऽद्य प्रियो मे वितथप्रतिज्ञः

kasmānnu hetordayitapratijñaḥ so 'dya priyo me vitathapratijñaḥ

6.14

आर्यस्य साधोः करुणात्मकस्य मन्नित्यभीरोरतिदक्षिणस्य

āryasya sādhoḥ karuṇātmakasya mannityabhīroratidakṣiṇasya

6.14.2

कुतो विकारो ऽयमभूतपूर्वः स्वेनापरागेण ममापचारात्

kuto vikāro 'yamabhūtapūrvaḥ svenāparāgeṇa mamāpacārāt

6.15

रतिप्रियस्य प्रियवर्तिनो मे प्रियस्य नूनं हृदयं विरक्तम्

ratipriyasya priyavartino me priyasya nūnaṃ hṛdayaṃ viraktam

6.15.2

तथापि रागो यदि तस्य हि स्यान् मच्चित्तरक्षी न स नागतः स्यात्

tathāpi rāgo yadi tasya hi syān maccittarakṣī na sa nāgataḥ syāt

6.16

रूपेण भावेन च मद्विशिष्टा प्रियेण दृष्टा नियतं ततो ऽन्या

rūpeṇa bhāvena ca madviśiṣṭā priyeṇa dṛṣṭā niyataṃ tato 'nyā

6.16.2

तथा हि कृत्वा मयि मोघसान्त्वं लग्नां सतीं मामागमद् विहाय

tathā hi kṛtvā mayi moghasāntvaṃ lagnāṃ satīṃ māmāgamad vihāya

6.17

भक्तिं स बुद्धं प्रति याम् अवोचत्तस्य प्रयातुं मयि सो ऽपदेशः

bhaktiṃ sa buddhaṃ prati yām avocattasya prayātuṃ mayi so 'padeśaḥ

6.17.2

मुनौ प्रसादो यदि तस्य हि स्यान्मृत्योरिवोग्रादनृताद् बिभीयात्

munau prasādo yadi tasya hi syānmṛtyorivogrādanṛtād bibhīyāt

6.18

सेवार्थम् आदर्शनम् अन्यचित्तो विभूषयन्त्या मम धारयित्वा

sevārtham ādarśanam anyacitto vibhūṣayantyā mama dhārayitvā

6.18.2

बिभर्ति सो ऽन्यस्य जनस्य तं चेन्नमो ऽस्तु तस्मै चलसौहृदाय

bibharti so 'nyasya janasya taṃ cennamo 'stu tasmai calasauhṛdāya

6.19

नेच्छन्ति याः शोकमवाप्तुमेवं श्रद्धातुमर्हन्ति न ता नराणाम्

necchanti yāḥ śokamavāptumevaṃ śraddhātumarhanti na tā narāṇām

6.19.2

क्व चानुवृत्तिर्मयि सास्य पूर्वं त्यागः क्व चायं जनवत् क्षणेन

kva cānuvṛttirmayi sāsya pūrvaṃ tyāgaḥ kva cāyaṃ janavat kṣaṇena

6.20

इत्येवमादि प्रियविप्रयुक्ता प्रिये ऽन्यदाशङ्क्य च सा जगाद

ityevamādi priyaviprayuktā priye 'nyadāśaṅkya ca sā jagāda

6.20.2

संभ्रान्तमारुह्य च तद्विमानं तां स्त्री सबाष्पा गिरमित्युवाच

saṃbhrāntamāruhya ca tadvimānaṃ tāṃ strī sabāṣpā giramityuvāca

6.21

युवापि तावत् प्रियदर्शनो ऽपि सौभाग्यभाग्याभिजनान्वितो ऽपि

yuvāpi tāvat priyadarśano 'pi saubhāgyabhāgyābhijanānvito 'pi

6.21.2

यस्त्वां प्रियो नाभ्यचरत् कदाचित्तमन्यथा यास्यतिकातरासि

yastvāṃ priyo nābhyacarat kadācittamanyathā yāsyatikātarāsi

6.22

मा स्वामिनं स्वामिनि दोषतो गाः प्रियं प्रियार्हं प्रियकारिणं तम्

mā svāminaṃ svāmini doṣato gāḥ priyaṃ priyārhaṃ priyakāriṇaṃ tam

6.22.2

न स त्वदन्यां प्रमदामवैति स्वचक्रवाक्या इव चक्रवाकः

na sa tvadanyāṃ pramadāmavaiti svacakravākyā iva cakravākaḥ

Saundarānanda