6.3

विलम्बहारा चलयोक्त्रका सा तस्माद् विमानाद् विनता चकाशे

vilambahārā calayoktrakā sā tasmād vimānād vinatā cakāśe

6.3.2

तपःक्षयादप्सरसां वरेव च्युतं विमानात् प्रियमीक्षमाणा

tapaḥkṣayādapsarasāṃ vareva cyutaṃ vimānāt priyamīkṣamāṇā

6.4

सा खेदसंस्विन्नललाटकेन निश्वासनिष्पीतविशेषकेण

sā khedasaṃsvinnalalāṭakena niśvāsaniṣpītaviśeṣakeṇa

6.4.2

चिन्ताचलाक्षेण मुखेन तस्थौ भर्त्तारमन्यत्र विशङ्कमाना

cintācalākṣeṇa mukhena tasthau bharttāramanyatra viśaṅkamānā

6.5

ततश्चिरस्थानपरिश्रमेण स्थितैव पर्यङ्कतले पपात

tataścirasthānapariśrameṇa sthitaiva paryaṅkatale papāta

6.5.2

तिर्यक्च शिश्ये प्रविकीर्णहारा सपादुकैकार्धविलम्बपादा

tiryakca śiśye pravikīrṇahārā sapādukaikārdhavilambapādā

6.6

अथात्र काचित् प्रमदा सबाष्पां तां दुःखितां द्रष्टुम् अनीप्समाना

athātra kācit pramadā sabāṣpāṃ tāṃ duḥkhitāṃ draṣṭum anīpsamānā

6.6.2

प्रासादसोपानतलप्रणादं चकार पद्भ्यां सहसा रुदन्ती

prāsādasopānatalapraṇādaṃ cakāra padbhyāṃ sahasā rudantī

6.7

तस्याश्च सोपानतलप्रणादं श्रुत्वैव तूर्णं पुनरुत्पपात

tasyāśca sopānatalapraṇādaṃ śrutvaiva tūrṇaṃ punarutpapāta

6.7.2

प्रीत्यां प्रसक्तैव च संजहर्ष प्रियोपयानं परिशङ्कमाना

prītyāṃ prasaktaiva ca saṃjaharṣa priyopayānaṃ pariśaṅkamānā

6.8

सा त्रासयन्ती वलभीपुटस्थान् पारावतान् नूपुरनिस्वनेन

sā trāsayantī valabhīpuṭasthān pārāvatān nūpuranisvanena

6.8.2

सोपानकुक्षिं प्रससार हर्षाद् भ्रष्टं दुकूलान्तम् अचिन्तयन्ती

sopānakukṣiṃ prasasāra harṣād bhraṣṭaṃ dukūlāntam acintayantī

6.9

तामङ्गनां प्रेक्ष्य च विप्रलब्धा निश्वस्य भूयः शयनं प्रपेदे

tāmaṅganāṃ prekṣya ca vipralabdhā niśvasya bhūyaḥ śayanaṃ prapede

6.9.2

विवर्णवक्त्रा न रराज चाशु विवर्णचन्द्रेव हिमागमे द्यौः

vivarṇavaktrā na rarāja cāśu vivarṇacandreva himāgame dyauḥ

6.10

सा दुःखिता भर्त्तुरदर्शनेन कामेन कोपेन च दह्यमाना

sā duḥkhitā bhartturadarśanena kāmena kopena ca dahyamānā

6.10.2

कृत्वा करे वक्त्रमुपोपविष्टा चिन्तानदीं शोकजलां ततार

kṛtvā kare vaktramupopaviṣṭā cintānadīṃ śokajalāṃ tatāra

6.11

तस्याः मुखं पद्मसपत्नभूतं पाणौ स्थितं पल्लवरागताम्रे

tasyāḥ mukhaṃ padmasapatnabhūtaṃ pāṇau sthitaṃ pallavarāgatāmre

6.11.2

छायामयस्याम्भसि पङ्कजस्य बभौ नतं पद्ममिवोपरिष्टात्

chāyāmayasyāmbhasi paṅkajasya babhau nataṃ padmamivopariṣṭāt

6.12

सा स्त्रीस्वभावेन विचिन्त्य तत्तद् दृष्टानुरागे ऽभिमुखे ऽपि पत्यौ

sā strīsvabhāvena vicintya tattad dṛṣṭānurāge 'bhimukhe 'pi patyau

6.12.2

धर्माश्रिते तत्त्वम् अविन्दमाना संकल्प्य तत्तद्विललाप तत्तत्

dharmāśrite tattvam avindamānā saṃkalpya tattadvilalāpa tattat

Saundarānanda