5.26

तन्निश्चितं भीक्लमशुग्वियुक्तं परेष्वनायत्तमहार्यमन्यैः

tanniścitaṃ bhīklamaśugviyuktaṃ pareṣvanāyattamahāryamanyaiḥ

5.26.2

नित्यं शिवं शान्तिसुखं वृणीष्व किम् इन्द्रियार्थार्थमनर्थमूढ्वा

nityaṃ śivaṃ śāntisukhaṃ vṛṇīṣva kim indriyārthārthamanarthamūḍhvā

5.27

जरासमा नास्त्यमृजा प्रजानां व्याधेः समो नास्ति जगत्यनर्थः

jarāsamā nāstyamṛjā prajānāṃ vyādheḥ samo nāsti jagatyanarthaḥ

5.27.2

मृत्योः समं नास्ति भयं पृथिव्यामेतत्त्रयं खल्ववशेन सेव्यम्

mṛtyoḥ samaṃ nāsti bhayaṃ pṛthivyāmetattrayaṃ khalvavaśena sevyam

5.28

स्नेहेन कश्चिन्न समो ऽस्ति पाशः स्रोतो न तृष्णासममस्ति हारि

snehena kaścinna samo 'sti pāśaḥ sroto na tṛṣṇāsamamasti hāri

5.28.2

रागाग्निना नास्ति समस्तथाग्निस्तच्चेत् त्रयं नास्ति सुखं च ते ऽस्ति

rāgāgninā nāsti samastathāgnistaccet trayaṃ nāsti sukhaṃ ca te 'sti

5.29

अवश्यभावी प्रियविप्रयोगस्तस्माच्च शोको नियतं निषेव्यः

avaśyabhāvī priyaviprayogastasmācca śoko niyataṃ niṣevyaḥ

5.29.2

शोकेन चोन्मादमुपेयिवांसो राजर्षयो ऽन्ये ऽप्यवशा विचेलुः

śokena conmādamupeyivāṃso rājarṣayo 'nye 'pyavaśā viceluḥ

5.30

प्रज्ञामयं वर्म बधान तस्मान्नो क्षान्तिनिघ्नस्य हि शोकबाणाः

prajñāmayaṃ varma badhāna tasmānno kṣāntinighnasya hi śokabāṇāḥ

5.30.2

महच्च दग्धुं भवकक्षजालं संधुक्षयाल्पाग्निमिवात्मतेजः

mahacca dagdhuṃ bhavakakṣajālaṃ saṃdhukṣayālpāgnimivātmatejaḥ

5.31

यथौषधैर्हस्तगतैः सविद्यो न दश्यते कश्चन पन्नगेन

yathauṣadhairhastagataiḥ savidyo na daśyate kaścana pannagena

5.31.2

तथानपेक्षो जितलोकमोहो न दश्यते शोकभुजंगमेन

tathānapekṣo jitalokamoho na daśyate śokabhujaṃgamena

5.32

आस्थाय योगं परिगम्य तत्त्वं न त्रासमागच्छति मृत्युकाले

āsthāya yogaṃ parigamya tattvaṃ na trāsamāgacchati mṛtyukāle

5.32.2

आबद्धवर्मा सुधनुः कृतास्त्रो जिगीषया शूर इवाहवस्थः

ābaddhavarmā sudhanuḥ kṛtāstro jigīṣayā śūra ivāhavasthaḥ

5.33

इत्येवमुक्तः स तथागतेन सर्वेषु भूतेष्वनुकम्पकेन

ityevamuktaḥ sa tathāgatena sarveṣu bhūteṣvanukampakena

5.33.2

धृष्टं गिरान्तर्हृदयेन सीदंस्तथेति नन्दः सुगतं बभाषे

dhṛṣṭaṃ girāntarhṛdayena sīdaṃstatheti nandaḥ sugataṃ babhāṣe

5.34

अथ प्रमादाच्च तमुज्जिहीर्षन् मत्वागमस्यैव च पात्रभूतम्

atha pramādācca tamujjihīrṣan matvāgamasyaiva ca pātrabhūtam

5.34.2

प्रव्राजयानन्द शमाय नन्दमित्यब्रवीन्मैत्रमना महर्षिः

pravrājayānanda śamāya nandamityabravīnmaitramanā maharṣiḥ

5.35

नन्दं ततो ऽन्तर्मनसा रुदन्तमेहीति वैदेहमुनिर्जगाद

nandaṃ tato 'ntarmanasā rudantamehīti vaidehamunirjagāda

5.35.2

शनैस्ततस्तं समुपेत्य नन्दो न प्रव्रजिष्याम्यहमित्युवाच

śanaistatastaṃ samupetya nando na pravrajiṣyāmyahamityuvāca

Saundarānanda