5.6

ततो विविक्तं च विविक्तचेताः सन्मार्गविन् मार्गमभिप्रतस्थे

tato viviktaṃ ca viviktacetāḥ sanmārgavin mārgamabhipratasthe

5.6.2

गत्वाग्रतश्चाग्र्यतमाय तस्मै नान्दीविमुक्ताय ननाम नन्दः

gatvāgrataścāgryatamāya tasmai nāndīvimuktāya nanāma nandaḥ

5.7

शनैर्व्रजन्नेव स गौरवेण पटावृतांसो विनतार्धकायः

śanairvrajanneva sa gauraveṇa paṭāvṛtāṃso vinatārdhakāyaḥ

5.7.2

अधोनिबद्धाञ्जलिरूर्ध्वनेत्रः सगद्गदं वाक्यमिदं बभाषे

adhonibaddhāñjalirūrdhvanetraḥ sagadgadaṃ vākyamidaṃ babhāṣe

5.8

प्रासादसंस्थो भगवन्तमन्तःप्रविष्टम् अश्रौषम् अनुग्रहाय

prāsādasaṃstho bhagavantamantaḥpraviṣṭam aśrauṣam anugrahāya

5.8.2

अतस्त्वरावानहमभ्युपेतो गृहस्य कक्ष्यामहतो ऽभ्यसूयन्

atastvarāvānahamabhyupeto gṛhasya kakṣyāmahato 'bhyasūyan

5.9

तत्साधु साधुप्रिय मत्प्रियार्थम् तत्रास्तु भिक्षूत्तम भैक्षकालः

tatsādhu sādhupriya matpriyārtham tatrāstu bhikṣūttama bhaikṣakālaḥ

5.9.2

असौ हि मध्यं नभसो यियासुः कालं प्रतिस्मारयतीव सूर्यः

asau hi madhyaṃ nabhaso yiyāsuḥ kālaṃ pratismārayatīva sūryaḥ

5.10

इत्येवमुक्तः प्रणतेन तेन स्नेहाभिमानोन्मुखलोचनेन

ityevamuktaḥ praṇatena tena snehābhimānonmukhalocanena

5.10.2

तादृङ्निमित्तं सुगतश्चकार नाहारकृत्यं स यथा विवेद

tādṛṅnimittaṃ sugataścakāra nāhārakṛtyaṃ sa yathā viveda

5.11

ततः स कृत्वा मुनये प्रणामं गृहप्रयाणाय मतिं चकार

tataḥ sa kṛtvā munaye praṇāmaṃ gṛhaprayāṇāya matiṃ cakāra

5.11.2

अनुग्रहार्थं सुगतस्तु तस्मै पात्रं ददौ पुष्करपत्रनेत्रः

anugrahārthaṃ sugatastu tasmai pātraṃ dadau puṣkarapatranetraḥ

5.12

ततः स लोके ददतः फलार्थं पात्रस्य तस्याप्रतिमस्य पात्रम्

tataḥ sa loke dadataḥ phalārthaṃ pātrasya tasyāpratimasya pātram

5.12.2

जग्राह चापग्रहणक्षमाभ्यां पद्मोपमाभ्यां प्रयतः कराभ्याम्

jagrāha cāpagrahaṇakṣamābhyāṃ padmopamābhyāṃ prayataḥ karābhyām

5.13

पराङ्मुखस् त्वन्यमनस्कम् आराद् विज्ञाय नन्दः सुगतं गतास्थम्

parāṅmukhas tvanyamanaskam ārād vijñāya nandaḥ sugataṃ gatāstham

5.13.2

हस्तस्थपात्रो ऽपि गृहं यियासुः ससार मार्गान्मुनिमीक्षमाणः

hastasthapātro 'pi gṛhaṃ yiyāsuḥ sasāra mārgānmunimīkṣamāṇaḥ

5.14

भार्यानुरागेण यदा गृहं स पात्रं गृहीत्वापि यियासुरेव

bhāryānurāgeṇa yadā gṛhaṃ sa pātraṃ gṛhītvāpi yiyāsureva

5.14.2

विमोहयामास मुनिस्ततस्तं रथ्यामुखस्यावरणेन तस्य

vimohayāmāsa munistatastaṃ rathyāmukhasyāvaraṇena tasya

5.15

निर्मोक्षबीजं हि ददर्श तस्य ज्ञानं मृदु क्लेशरजश्च तीव्रम्

nirmokṣabījaṃ hi dadarśa tasya jñānaṃ mṛdu kleśarajaśca tīvram

5.15.2

क्लेशानुकूलं विषयात्मकं च नन्दं यतस्तं मुनिराचकर्ष

kleśānukūlaṃ viṣayātmakaṃ ca nandaṃ yatastaṃ munirācakarṣa

Saundarānanda