4.42

तं गौरवं बुद्धगतं चकर्ष भार्यानुरागः पुनराचकर्ष

taṃ gauravaṃ buddhagataṃ cakarṣa bhāryānurāgaḥ punarācakarṣa

4.42.2

सो ऽनिश्चयान्नापि ययौ न तस्थौ तुरंस्तरंगेष्विव राजहंसः

so 'niścayānnāpi yayau na tasthau turaṃstaraṃgeṣviva rājahaṃsaḥ

4.43

अदर्शनं तूपगतश्च तस्या हर्म्यात्ततश्चावततार तूर्णम्

adarśanaṃ tūpagataśca tasyā harmyāttataścāvatatāra tūrṇam

4.43.2

श्रुत्वा ततो नूपुरनिस्वनं स पुनर्ललम्बे हृदये गृहीतः

śrutvā tato nūpuranisvanaṃ sa punarlalambe hṛdaye gṛhītaḥ

4.44

स कामरागेण निगृह्यमाणो धर्मानुरागेण च कृष्यमाणः

sa kāmarāgeṇa nigṛhyamāṇo dharmānurāgeṇa ca kṛṣyamāṇaḥ

4.44.2

जगाम दुःखेन विवर्त्यमानः प्लवः प्रतिस्रोत इवापगायाः

jagāma duḥkhena vivartyamānaḥ plavaḥ pratisrota ivāpagāyāḥ

4.45

ततः क्रमैर्दीर्घतमैः प्रचक्रमे कथं नु यातो न गुरुर्भवेदिति

tataḥ kramairdīrghatamaiḥ pracakrame kathaṃ nu yāto na gururbhavediti

4.45.2

स्वजेय तां चैव विशेषकप्रियां कथं प्रियामार्द्रविशेषकामिति

svajeya tāṃ caiva viśeṣakapriyāṃ kathaṃ priyāmārdraviśeṣakāmiti

4.46

अथ स पथि ददर्श मुक्तमानं पितृनगरे ऽपि तथा गताभिमानम्

atha sa pathi dadarśa muktamānaṃ pitṛnagare 'pi tathā gatābhimānam

4.46.2

दशबलमभितो विलम्बमानं ध्वजमनुयान इवैन्द्रमर्च्यमानम्

daśabalamabhito vilambamānaṃ dhvajamanuyāna ivaindramarcyamānam

5.1

अथावतीर्याश्वरथद्विपेभ्यः शाक्या यथास्वर्द्धिगृहीतवेषाः

athāvatīryāśvarathadvipebhyaḥ śākyā yathāsvarddhigṛhītaveṣāḥ

5.1.2

महापणेभ्यो व्यवहारिणश्च महामुनौ भक्तिवशात् प्रणेमुः

mahāpaṇebhyo vyavahāriṇaśca mahāmunau bhaktivaśāt praṇemuḥ

5.2

केचित् प्रणम्यानुययुर्मुहूर्त्तं केचित् प्रणम्यार्थवशेन जग्मुः

kecit praṇamyānuyayurmuhūrttaṃ kecit praṇamyārthavaśena jagmuḥ

5.2.2

केचित् स्वकेष्वावसथेषु तस्थुः कृत्वाञ्जलीन् वीक्षणतत्पराक्षाः

kecit svakeṣvāvasatheṣu tasthuḥ kṛtvāñjalīn vīkṣaṇatatparākṣāḥ

5.3

बुद्धस्ततस्तत्र नरेन्द्रमार्गे स्रोतो महद्भक्तिमतो जनस्य

buddhastatastatra narendramārge sroto mahadbhaktimato janasya

5.3.2

जगाम दुःखेन विगाहमानो जलागमे स्रोत इवापगायाः

jagāma duḥkhena vigāhamāno jalāgame srota ivāpagāyāḥ

5.4

अथो महद्भिः पथि संपतद्भिः सम्पूज्यमानाय तथागताय

atho mahadbhiḥ pathi saṃpatadbhiḥ sampūjyamānāya tathāgatāya

5.4.2

कर्तुं प्रणामं न शशाक नन्दस्तेनाभिरेमे तु गुरोर्महिम्ना

kartuṃ praṇāmaṃ na śaśāka nandastenābhireme tu gurormahimnā

5.5

स्वं चावसङ्गं पथि निर्मुमुक्षुर्भक्तिं जनस्यान्यमतेश्च रक्षन्

svaṃ cāvasaṅgaṃ pathi nirmumukṣurbhaktiṃ janasyānyamateśca rakṣan

5.5.2

नन्दं च गेहाभिमुखं जिघृक्षन् मार्गं ततो ऽन्यं सुगतः प्रपेदे

nandaṃ ca gehābhimukhaṃ jighṛkṣan mārgaṃ tato 'nyaṃ sugataḥ prapede

Saundarānanda