4.32

कृत्वाञ्जलिं मूर्धनि पद्मकल्पं ततः स कान्तां गमनं ययाचे

kṛtvāñjaliṃ mūrdhani padmakalpaṃ tataḥ sa kāntāṃ gamanaṃ yayāce

4.32.2

कर्तुं गमिष्यामि गुरौ प्रणामं मामभ्यनुज्ञातुमिहार्हसीति

kartuṃ gamiṣyāmi gurau praṇāmaṃ māmabhyanujñātumihārhasīti

4.33

सा वेपमाना परिसस्वजे तं शालं लता वातसमीरितेव

sā vepamānā parisasvaje taṃ śālaṃ latā vātasamīriteva

4.33.2

ददर्श चाश्रुप्लुतलोलनेत्रा दीर्घं च निश्वस्य वचो ऽभ्युवाच

dadarśa cāśruplutalolanetrā dīrghaṃ ca niśvasya vaco 'bhyuvāca

4.34

नाहं यियासोर्गुरुदर्शनार्थमर्हामि कर्तुं तव धर्मपीडाम्

nāhaṃ yiyāsorgurudarśanārthamarhāmi kartuṃ tava dharmapīḍām

4.34.2

गच्छार्यपुत्रैहि च शीघ्रमेव विशेषको यावदयं न शुष्कः

gacchāryaputraihi ca śīghrameva viśeṣako yāvadayaṃ na śuṣkaḥ

4.35

सचेद्भवेस्त्वं खलु दीर्घसूत्रो दण्डं महान्तं त्वयि पातयेयम्

sacedbhavestvaṃ khalu dīrghasūtro daṇḍaṃ mahāntaṃ tvayi pātayeyam

4.35.2

मुहुर्मुहुस्त्वां शयितं कुचाभ्यां विबोधयेयं च न चालपेयम्

muhurmuhustvāṃ śayitaṃ kucābhyāṃ vibodhayeyaṃ ca na cālapeyam

4.36

अथाप्यनाश्यानविशेषकायां मय्येष्यसि त्वं त्वरितं ततस्त्वाम्

athāpyanāśyānaviśeṣakāyāṃ mayyeṣyasi tvaṃ tvaritaṃ tatastvām

4.36.2

निपीडयिष्यामि भुजद्वयेन निर्भूषणेनार्द्रविलेपनेन

nipīḍayiṣyāmi bhujadvayena nirbhūṣaṇenārdravilepanena

4.37

इत्येवमुक्तश्च निपीडितश्च तयासवर्णस्वनया जगाद

ityevamuktaśca nipīḍitaśca tayāsavarṇasvanayā jagāda

4.37.2

एवं करिष्यामि विमुञ्च चण्डि यावद् गुरुर्दूरगतो न मे सः

evaṃ kariṣyāmi vimuñca caṇḍi yāvad gururdūragato na me saḥ

4.38

ततः स्तनोद्वर्तितचन्दनाभ्यां मुक्तो भुजाभ्यां न तु मानसेन

tataḥ stanodvartitacandanābhyāṃ mukto bhujābhyāṃ na tu mānasena

4.38.2

विहाय वेषं मदनानुरूपं सत्कारयोग्यं स वपुर्बभार

vihāya veṣaṃ madanānurūpaṃ satkārayogyaṃ sa vapurbabhāra

4.39

सा तं प्रयान्तं रमणं प्रदध्यौ प्रध्यानशून्यस्थितनिश्चलाक्षी

sā taṃ prayāntaṃ ramaṇaṃ pradadhyau pradhyānaśūnyasthitaniścalākṣī

4.39.2

स्थितोच्चकर्णा व्यपविद्धशष्पा भ्रान्तं मृगम् भ्रान्तमुखी मृगीव

sthitoccakarṇā vyapaviddhaśaṣpā bhrāntaṃ mṛgam bhrāntamukhī mṛgīva

4.40

दिदृक्षयाक्षिप्तमना मुनेस्तु नन्दः प्रयाणं प्रति तत्वरे च

didṛkṣayākṣiptamanā munestu nandaḥ prayāṇaṃ prati tatvare ca

4.40.2

विवृत्तदृष्टिश्च शनैर्ययौ तां करीव पश्यन् स लडत्करेणुम्

vivṛttadṛṣṭiśca śanairyayau tāṃ karīva paśyan sa laḍatkareṇum

4.41

छातोदरीं पीनपयोधरोरुं स सुन्दरीं रुक्मदरीमिवाद्रेः

chātodarīṃ pīnapayodharoruṃ sa sundarīṃ rukmadarīmivādreḥ

4.41.2

काक्षेण पश्यन् न ततर्प नन्दः पिबन्निवैकेन जलं करेण

kākṣeṇa paśyan na tatarpa nandaḥ pibannivaikena jalaṃ kareṇa

Saundarānanda