4.12

विभूषयामास ततः प्रियां स सिषेविषुस्तां न मृजावहार्थम्

vibhūṣayāmāsa tataḥ priyāṃ sa siṣeviṣustāṃ na mṛjāvahārtham

4.12.2

स्वेनैव रूपेण विभूषिता हि विभूषणानामपि भूषणं सा

svenaiva rūpeṇa vibhūṣitā hi vibhūṣaṇānāmapi bhūṣaṇaṃ sā

4.13

दत्त्वाथ सा दर्पणमस्य हस्ते ममाग्रतो धारय तावदेनम्

dattvātha sā darpaṇamasya haste mamāgrato dhāraya tāvadenam

4.13.2

विशेषकं यावदहं करोमीत्युवाच कान्तं स च तं बभार

viśeṣakaṃ yāvadahaṃ karomītyuvāca kāntaṃ sa ca taṃ babhāra

4.14

भर्तुस्ततः श्मश्रु निरीक्षमाणा विशेषकं सापि चकार तादृक्

bhartustataḥ śmaśru nirīkṣamāṇā viśeṣakaṃ sāpi cakāra tādṛk

4.14.2

निश्वासवातेन च दर्पणस्य चिकित्सयित्वा निजघान नन्दः

niśvāsavātena ca darpaṇasya cikitsayitvā nijaghāna nandaḥ

4.15

सा तेन चेष्टाललितेन भर्तुः शाठ्येन चान्तर्मनसा जहास

sā tena ceṣṭālalitena bhartuḥ śāṭhyena cāntarmanasā jahāsa

4.15.2

भवेच्च रुष्टा किल नाम तस्मै ललाटजिह्मां भृकुटिं चकार

bhavecca ruṣṭā kila nāma tasmai lalāṭajihmāṃ bhṛkuṭiṃ cakāra

4.16

चिक्षेप कर्णोत्पलमस्य चांसे करेण सव्येन मदालसेन

cikṣepa karṇotpalamasya cāṃse kareṇa savyena madālasena

4.16.2

पत्राङ्गुलिं चार्धनिमीलिताक्षे वक्त्रे ऽस्य तामेव विनिर्दुधाव

patrāṅguliṃ cārdhanimīlitākṣe vaktre 'sya tāmeva vinirdudhāva

4.17

ततश्चलन्नूपुरयोक्त्रिताभ्यां नखप्रभोद्भासितराङ्गुलिभ्याम्

tataścalannūpurayoktritābhyāṃ nakhaprabhodbhāsitarāṅgulibhyām

4.17.2

पद्भ्यां प्रियाया नलिनोपमाभ्यां मूर्ध्ना भयान्नाम ननाम नन्दः

padbhyāṃ priyāyā nalinopamābhyāṃ mūrdhnā bhayānnāma nanāma nandaḥ

4.18

स मुक्तपुष्पोन्मिषितेन मूर्ध्ना ततः प्रियायाः प्रियकृद् बभासे

sa muktapuṣponmiṣitena mūrdhnā tataḥ priyāyāḥ priyakṛd babhāse

4.18.2

सुवर्णवेद्यामनिलावभग्नः पुष्पातिभारादिव नागवृक्षः

suvarṇavedyāmanilāvabhagnaḥ puṣpātibhārādiva nāgavṛkṣaḥ

4.19

सा तं स्तनोद्वर्तितहारयष्टिरुत्थापयामास निपीड्य दोर्भ्याम्

sā taṃ stanodvartitahārayaṣṭirutthāpayāmāsa nipīḍya dorbhyām

4.19.2

कथं कृतो ऽसीति जहास चोच्चैर्मुखेन साचीकृतकुण्डलेन

kathaṃ kṛto 'sīti jahāsa coccairmukhena sācīkṛtakuṇḍalena

4.20

पत्युस्ततो दर्पणसक्तपाणेर्मुहुर्मुहुर्वक्त्रमवेक्षमाणा

patyustato darpaṇasaktapāṇermuhurmuhurvaktramavekṣamāṇā

4.20.2

तमालपत्रार्द्रतले कपोले समापयामास विशेषकं तत्

tamālapatrārdratale kapole samāpayāmāsa viśeṣakaṃ tat

4.21

तस्या मुखं तत् सतमालपत्रं ताम्राधरौष्ठं चिकुरायताक्षम्

tasyā mukhaṃ tat satamālapatraṃ tāmrādharauṣṭhaṃ cikurāyatākṣam

4.21.2

रक्ताधिकाग्रं पतितद्विरेफं सशैवलं पद्ममिवाबभासे

raktādhikāgraṃ patitadvirephaṃ saśaivalaṃ padmamivābabhāse

Saundarānanda