4.2

स चक्रवाक्येव हि चक्रवाकस्तया समेतः प्रियया प्रियार्हः

sa cakravākyeva hi cakravākastayā sametaḥ priyayā priyārhaḥ

4.2.2

नाचिन्तयद् वैश्रमणं न शक्रं तत्स्थानहेतोः कुत एव धर्मम्

nācintayad vaiśramaṇaṃ na śakraṃ tatsthānahetoḥ kuta eva dharmam

4.3

लक्ष्म्या च रूपेण च सुन्दरीति स्तम्भेन गर्वेण च मानिनीति

lakṣmyā ca rūpeṇa ca sundarīti stambhena garveṇa ca māninīti

4.3.2

दीप्त्या च मानेन च भामिनीति यातो बभाषे त्रिविधेन नाम्ना

dīptyā ca mānena ca bhāminīti yāto babhāṣe trividhena nāmnā

4.4

सा हासहंसा नयनद्विरेफा पीनस्तनात्युन्नतपद्मकोशा

sā hāsahaṃsā nayanadvirephā pīnastanātyunnatapadmakośā

4.4.2

भूयो बभासे स्वकुलोदितेन स्त्रीपद्मिनी नन्ददिवाकरेण

bhūyo babhāse svakuloditena strīpadminī nandadivākareṇa

4.5

रूपेण चात्यन्तमनोहरेण रूपानुरूपेण च चेष्टितेन

rūpeṇa cātyantamanohareṇa rūpānurūpeṇa ca ceṣṭitena

4.5.2

मनुष्यलोके हि तदा बभूव सा सुन्दरी स्त्रीषु नरेषु नन्दः

manuṣyaloke hi tadā babhūva sā sundarī strīṣu nareṣu nandaḥ

4.6

सा देवता नन्दनचारिणीव कुलस्य नन्दीजननश्च नन्दः

sā devatā nandanacāriṇīva kulasya nandījananaśca nandaḥ

4.6.2

अतीत्य मर्त्यान् अनुपेत्य देवान् सृष्टावभूतामिव भूतधात्रा

atītya martyān anupetya devān sṛṣṭāvabhūtāmiva bhūtadhātrā

4.7

तां सुन्दरीं चेन्न लभेत नन्दः सा वा निषेवेत न तं नतभ्रूः

tāṃ sundarīṃ cenna labheta nandaḥ sā vā niṣeveta na taṃ natabhrūḥ

4.7.2

द्वन्द्वं ध्रुवं तद्विकलं न शोभेतान्योन्यहीनाविव रात्रिचन्द्रौ

dvandvaṃ dhruvaṃ tadvikalaṃ na śobhetānyonyahīnāviva rātricandrau

4.8

कन्दर्परत्योरिव लक्ष्यभूतं प्रमोदनान्द्योरिव नीडभूतम्

kandarparatyoriva lakṣyabhūtaṃ pramodanāndyoriva nīḍabhūtam

4.8.2

प्रहर्षतुष्ट्योरिव पात्रभूतं द्वन्द्वं सहारंस्त मदान्धभूतम्

praharṣatuṣṭyoriva pātrabhūtaṃ dvandvaṃ sahāraṃsta madāndhabhūtam

4.9

परस्परोद्वीक्षणतत्पराक्षं परस्परव्याहृतसक्तचित्तम्

parasparodvīkṣaṇatatparākṣaṃ parasparavyāhṛtasaktacittam

4.9.2

परस्पराश्लेषहृताङ्गरागं परस्परं तन्मिथुनं जहार

parasparāśleṣahṛtāṅgarāgaṃ parasparaṃ tanmithunaṃ jahāra

4.10

भावानुरक्तौ गिरिनिर्झरस्थौ तौ किन्नरीकिंपुरुषाविवोभौ

bhāvānuraktau girinirjharasthau tau kinnarīkiṃpuruṣāvivobhau

4.10.2

चिक्रीडतुश्चाभिविरेजतुश्च रूपश्रियान्योन्यमिवाक्षिपन्तौ

cikrīḍatuścābhivirejatuśca rūpaśriyānyonyamivākṣipantau

4.11

अन्योन्यसंरागविवर्धनेन तद्द्वन्द्वमन्योन्यमरीरमच्च

anyonyasaṃrāgavivardhanena taddvandvamanyonyamarīramacca

4.11.2

क्लमान्तरे ऽन्योन्यविनोदनेन सलीलमन्योन्यम् अमीमदच्च

klamāntare 'nyonyavinodanena salīlamanyonyam amīmadacca

Saundarānanda