3.4

स विचारयन् जगति किं नु परममिति तं तमागमम्

sa vicārayan jagati kiṃ nu paramamiti taṃ tamāgamam

3.4.2

निश्चयम् अनधिगतः परतः परमं चचार तप एव दुष्करम्

niścayam anadhigataḥ parataḥ paramaṃ cacāra tapa eva duṣkaram

3.5

अथ नैष मार्ग इति वीक्ष्य तदपि विपुलं जहौ तपः

atha naiṣa mārga iti vīkṣya tadapi vipulaṃ jahau tapaḥ

3.5.2

ध्यानविषयमवगम्य परं बुभुजे वरान्नम् अमृतत्वबुद्धये

dhyānaviṣayamavagamya paraṃ bubhuje varānnam amṛtatvabuddhaye

3.6

स सुवर्णपीनयुगबाहुरृषभगतिरायतेक्षणः

sa suvarṇapīnayugabāhurṛṣabhagatirāyatekṣaṇaḥ

3.6.2

प्लक्षमवनिरुहमभ्यगमत् परमस्य निश्चयविधेर्बुभुत्सया

plakṣamavaniruhamabhyagamat paramasya niścayavidherbubhutsayā

3.7

उपविश्य तत्र कृतबुद्धिर् अचलधृतिर् अद्रिराजवत्

upaviśya tatra kṛtabuddhir acaladhṛtir adrirājavat

3.7.2

मारबलमजयदुग्रमथो बुबुधे पदं शिवम् अहार्यम् अव्ययम्

mārabalamajayadugramatho bubudhe padaṃ śivam ahāryam avyayam

3.8

अवगम्य तं च कृतकार्यममृतमनसो दिवौकसः

avagamya taṃ ca kṛtakāryamamṛtamanaso divaukasaḥ

3.8.2

हर्षमतुलमगमन् मुदिता विमुखी तु मारपरिषत् प्रचुक्षुभे

harṣamatulamagaman muditā vimukhī tu mārapariṣat pracukṣubhe

3.9

सनगा च भूः प्रविचचाल हुतवहसखः शिवो ववौ

sanagā ca bhūḥ pravicacāla hutavahasakhaḥ śivo vavau

3.9.2

नेदुरपि च सुरदुन्दुभयः प्रववर्ष चाम्बुधरवर्जितं नभः

nedurapi ca suradundubhayaḥ pravavarṣa cāmbudharavarjitaṃ nabhaḥ

3.10

अवबुध्य चैव परमार्थमजरमनुकम्पया विभुः

avabudhya caiva paramārthamajaramanukampayā vibhuḥ

3.10.2

नित्यममृतमुपदर्शयितुं स वराणसीपरिकरामयात् पुरीम्

nityamamṛtamupadarśayituṃ sa varāṇasīparikarāmayāt purīm

3.11

अथ धर्मचक्रमृतनाभि धृतिमतिसमाधिनेमिमत्

atha dharmacakramṛtanābhi dhṛtimatisamādhinemimat

3.11.2

तत्र विनयनियमारमृषिर्जगतो हिताय परिषद्यवर्तयत्

tatra vinayaniyamāramṛṣirjagato hitāya pariṣadyavartayat

3.12

इति दुःखमेतदियमस्य समुदयलता प्रवर्तिका

iti duḥkhametadiyamasya samudayalatā pravartikā

3.12.2

शान्तिरियमयमुपाय इति प्रविभागशः परमिदं चतुष्टयम्

śāntiriyamayamupāya iti pravibhāgaśaḥ paramidaṃ catuṣṭayam

3.13

अभिधाय च त्रिपरिवर्तमतुलमनिवर्त्यमुत्तमम्

abhidhāya ca triparivartamatulamanivartyamuttamam

3.13.2

द्वादशनियतविकल्पं ऋषिर्विनिनाय कौण्डिनसगोत्रमादितः

dvādaśaniyatavikalpaṃ ṛṣirvinināya kauṇḍinasagotramāditaḥ

Saundarānanda