18.1

अथ द्विजो बाल इवाप्तवेदः क्षिप्रं वणिक् प्राप्त इवाप्तलाभः

atha dvijo bāla ivāptavedaḥ kṣipraṃ vaṇik prāpta ivāptalābhaḥ

18.1.2

जित्वा च राजन्य इवारिसैन्यं नन्दः कृतार्थो गुरुमभ्यगच्छत्

jitvā ca rājanya ivārisainyaṃ nandaḥ kṛtārtho gurumabhyagacchat

18.2

द्रष्टुं सुखं ज्ञानसमाप्तिकाले गुरुर्हि शिष्यस्य गुरोश्च शिष्यः

draṣṭuṃ sukhaṃ jñānasamāptikāle gururhi śiṣyasya gurośca śiṣyaḥ

18.2.2

परिश्रमस्ते सफलो मयीति यतो दिदृक्षास्य मुनौ बभूव

pariśramaste saphalo mayīti yato didṛkṣāsya munau babhūva

18.3

यतो हि येनाधिगतो विशेषस्तस्योत्तमाङ्गे ऽर्हति कर्तुमीड्याम्

yato hi yenādhigato viśeṣastasyottamāṅge 'rhati kartumīḍyām

18.3.2

आर्यः सरागो ऽपि कृतज्ञभावात् प्रक्षीणमानः किमु वीतरागः

āryaḥ sarāgo 'pi kṛtajñabhāvāt prakṣīṇamānaḥ kimu vītarāgaḥ

18.4

यस्यार्थकामप्रभवा हि भक्तिस्ततो ऽस्य सा तिष्ठति रूढमूला

yasyārthakāmaprabhavā hi bhaktistato 'sya sā tiṣṭhati rūḍhamūlā

18.4.2

धर्मान्वयो यस्य तु भक्तिरागस्तस्य प्रसादो हृदयावगाढः

dharmānvayo yasya tu bhaktirāgastasya prasādo hṛdayāvagāḍhaḥ

18.5

काषायवासाः कनकावदातस्ततः स मूर्ध्ना गुरवे प्रणेमे

kāṣāyavāsāḥ kanakāvadātastataḥ sa mūrdhnā gurave praṇeme

18.5.2

वातेरितः पल्लवताम्ररागः पुष्पोज्ज्वलश्रीरिव कर्णिकारः

vāteritaḥ pallavatāmrarāgaḥ puṣpojjvalaśrīriva karṇikāraḥ

18.6

अथात्मनः शिष्यगुणस्य चैव महामुनेः शास्तृगुणस्य चैव

athātmanaḥ śiṣyaguṇasya caiva mahāmuneḥ śāstṛguṇasya caiva

18.6.2

संदर्शनार्थं स न मानहेतोः स्वां कार्यसिद्धिं कथयांबभूव

saṃdarśanārthaṃ sa na mānahetoḥ svāṃ kāryasiddhiṃ kathayāṃbabhūva

18.7

यो दृष्टिशल्यो हृदयावगाढः प्रभो भृशं मामतुदत् सुतीक्ष्णः

yo dṛṣṭiśalyo hṛdayāvagāḍhaḥ prabho bhṛśaṃ māmatudat sutīkṣṇaḥ

18.7.2

त्वद्वाक्यसंदंशमुखेन मे स समुद्धृतः शल्यहृतेव शल्यः

tvadvākyasaṃdaṃśamukhena me sa samuddhṛtaḥ śalyahṛteva śalyaḥ

18.8

कथंकथाभावगतो ऽस्मि येन छिन्नः स निःसंशय संशयो मे

kathaṃkathābhāvagato 'smi yena chinnaḥ sa niḥsaṃśaya saṃśayo me

18.8.2

त्वच्छासनात् सत्पथमागतो ऽस्मि सुदेशिकस्येव पथि प्रनष्टः

tvacchāsanāt satpathamāgato 'smi sudeśikasyeva pathi pranaṣṭaḥ

18.9

यत्पीतमास्वादवशेन्द्रियेण दर्पेण कन्दर्पविषं मयासीत्

yatpītamāsvādavaśendriyeṇa darpeṇa kandarpaviṣaṃ mayāsīt

18.9.2

तन्मे हतं त्वद्वचनागदेन विषं विनाशीव महागदेन

tanme hataṃ tvadvacanāgadena viṣaṃ vināśīva mahāgadena

18.10

क्षयं गतं जन्म निरस्तजन्मन् सद्धर्मचर्यामुषितो ऽस्मि सम्यक्

kṣayaṃ gataṃ janma nirastajanman saddharmacaryāmuṣito 'smi samyak

18.10.2

कृत्स्नं कृतं मे कृतकार्य कार्यं लोकेषु भूतो ऽस्मि न लोकधर्मा

kṛtsnaṃ kṛtaṃ me kṛtakārya kāryaṃ lokeṣu bhūto 'smi na lokadharmā

Saundarānanda