Dharmalib

Saundarānanda

buddhist literature

Notable Lemmas:

bhū (92 Occurences)

1–20 of 2128 verses

1.1

गौतमः कपिलो नाम मुनिर्धर्मभृतां वरः

gautamaḥ kapilo nāma munirdharmabhṛtāṃ varaḥ

1.1.2

बभूव तपसि श्रान्तः काक्षीवानिव गौतमः

babhūva tapasi śrāntaḥ kākṣīvāniva gautamaḥ

1.2

अशिश्रियद्यः सततं दीप्तं काश्यपवत्तपः

aśiśriyadyaḥ satataṃ dīptaṃ kāśyapavattapaḥ

1.2.2

आशिश्राय च तद्वृद्धौ सिद्धिं काश्यपवत् पराम्

āśiśrāya ca tadvṛddhau siddhiṃ kāśyapavat parām

1.3

हविःषु यश्च स्वात्मार्थं गामधुक्षद् वसिष्ठवत्

haviḥṣu yaśca svātmārthaṃ gāmadhukṣad vasiṣṭhavat

1.3.2

तपःशिष्टेषु च शिष्येषु गामधुक्षद् वसिष्ठवत्

tapaḥśiṣṭeṣu ca śiṣyeṣu gāmadhukṣad vasiṣṭhavat

1.4

माहात्म्याद्दीर्घतपसो यो द्वितीय इवाभवत्

māhātmyāddīrghatapaso yo dvitīya ivābhavat

1.4.2

तृतीय इव यश्चाभूत् काव्याङ्गिरसयोर्धिया

tṛtīya iva yaścābhūt kāvyāṅgirasayordhiyā

1.5

तस्य विस्तीर्णतपसः पार्श्वे हिमवतः शुभे

tasya vistīrṇatapasaḥ pārśve himavataḥ śubhe

1.5.2

क्षेत्रं चायतनं चैव तपसामाश्रमो ऽभवत्

kṣetraṃ cāyatanaṃ caiva tapasāmāśramo 'bhavat

1.6

चारुवीरुत्तरुवनः प्रस्निग्धमृदुशाद्वलः

cāruvīruttaruvanaḥ prasnigdhamṛduśādvalaḥ

1.6.2

हविर्धूमवितानेन यः सदाभ्र इवाबभौ

havirdhūmavitānena yaḥ sadābhra ivābabhau

1.7

मृदुभिः सैकतैः स्निग्धैः केसरास्तरपाण्डुभिः

mṛdubhiḥ saikataiḥ snigdhaiḥ kesarāstarapāṇḍubhiḥ

1.7.2

भूमिभागैरसंकीर्णैः साङ्गराग इवाभवत्

bhūmibhāgairasaṃkīrṇaiḥ sāṅgarāga ivābhavat

1.8

शुचिभिस्तीर्थसंख्यातैः पावनैर्भावनैरपि

śucibhistīrthasaṃkhyātaiḥ pāvanairbhāvanairapi

1.8.2

बन्धुमानिव यस्तस्थौ सरोभिः ससरोरुहैः

bandhumāniva yastasthau sarobhiḥ sasaroruhaiḥ

1.9

पर्याप्तफलपुष्पाभिः सर्वतो वनराजिभिः

paryāptaphalapuṣpābhiḥ sarvato vanarājibhiḥ

1.9.2

शुशुभे ववृधे चैव नरः साधनवानिव

śuśubhe vavṛdhe caiva naraḥ sādhanavāniva

1.10

नीवारफलसंतुष्टैः स्वस्थैः शान्तैरनुत्सुकैः

nīvāraphalasaṃtuṣṭaiḥ svasthaiḥ śāntairanutsukaiḥ

1.10.2

आकीर्णो ऽपि तपोभृद्भिः शून्यशून्य इवाभवत्

ākīrṇo 'pi tapobhṛdbhiḥ śūnyaśūnya ivābhavat