3.8.1.15

अथ पुनर् एत्याहवनीयम् अभ्यावृत्यासते

atha punar etyāhavanīyam abhyāvṛtyāsate

3.8.1.15.2

नेदस्य संज्ञप्यमानस्याध्यक्षा असामेति तस्य न कूटेन प्रघ्नन्ति मानुषं हि तन् नो एव पश्चाकर्णं पितृदेवत्यं हि तद् अपिगृह्य वैव मुखं तमयन्ति वेष्कं वा कुर्वन्ति तन्नाह जहि मारयेति मानुषं हि तत् संज्ञपयान्वगन्निति तद्धि देवत्रा स यद् आहान्वगन्नित्येतर्हि ह्येष देवान् अनुगच्छति तस्माद् आहान्वगन्निति

nedasya saṃjñapyamānasyādhyakṣā asāmeti tasya na kūṭena praghnanti mānuṣaṃ hi tan no eva paścākarṇaṃ pitṛdevatyaṃ hi tad apigṛhya vaiva mukhaṃ tamayanti veṣkaṃ vā kurvanti tannāha jahi mārayeti mānuṣaṃ hi tat saṃjñapayānvaganniti taddhi devatrā sa yad āhānvagannityetarhi hyeṣa devān anugacchati tasmād āhānvaganniti

3.8.1.16

तद् यत्रैनं निविध्यन्ति

tad yatrainaṃ nividhyanti

3.8.1.16.2

तत् पुरा संज्ञपनाज्जुहोति स्वाहा देवेभ्य इत्य् अथ यदा प्राह संज्ञप्तः पशुर् इत्य् अथ जुहोति देवेभ्यः स्वाहेति पुरस्तात्स्वाहाकृतयो वा अन्ये देवा उपरिष्टात्स्वाहाकृतयो ऽन्ये तान् एवैतत् प्रीणाति त एनम् उभये देवाः प्रीताः स्वर्गं लोकम् अभिवहन्ति ते वा एते परिपशव्य इत्य् आहुती स यदि कामयेत जुहुयाद् एते यद्य् उ कामयेतापि

tat purā saṃjñapanājjuhoti svāhā devebhya ity atha yadā prāha saṃjñaptaḥ paśur ity atha juhoti devebhyaḥ svāheti purastātsvāhākṛtayo vā anye devā upariṣṭātsvāhākṛtayo 'nye tān evaitat prīṇāti ta enam ubhaye devāḥ prītāḥ svargaṃ lokam abhivahanti te vā ete paripaśavya ity āhutī sa yadi kāmayeta juhuyād ete yady u kāmayetāpi

3.8.2.1

यदा प्राह संज्ञप्तः पशुरिति

yadā prāha saṃjñaptaḥ paśuriti

3.8.2.1.2

अथाध्वर्युराह नेष्टः पत्नीम् उदानयेत्य् उदानयति नेष्टा पत्नीम् पान्नेजनम् बिभ्रतीम्

athādhvaryurāha neṣṭaḥ patnīm udānayety udānayati neṣṭā patnīm pānnejanam bibhratīm

3.8.2.2

तां वाचयति

tāṃ vācayati

3.8.2.2.2

नमस्त आतानेति यज्ञो वा आतानो यज्ञं हि तन्वते तेन यज्ञ आतानो जघनार्धो वा एष यज्ञस्य यत्पत्नी तामेतत्प्राचीं यज्ञम् प्रसादयिष्यन्भवति तस्मा एवैतद्यज्ञाय निह्नुते तथो हैनामेष यज्ञो न हिनस्ति तस्मादाह नमस्त आतानेति

namasta ātāneti yajño vā ātāno yajñaṃ hi tanvate tena yajña ātāno jaghanārdho vā eṣa yajñasya yatpatnī tāmetatprācīṃ yajñam prasādayiṣyanbhavati tasmā evaitadyajñāya nihnute tatho haināmeṣa yajño na hinasti tasmādāha namasta ātāneti

3.8.2.3

अनर्वा प्रेहीति

anarvā prehīti

3.8.2.3.2

असपत्नेन प्रेहीत्य् एवैतद् आह घृतस्य कुल्या उप ऋतस्य पथ्या अन्विति साधूपेत्य् एवैतद् आह देवीर् आपः शुद्धा वोढ्वं सुपरिविष्टा देवेषु सुपरिविष्टा वयम् परिवेष्टारो भूयास्मेत्य् अप एवैतत्पावयति

asapatnena prehīty evaitad āha ghṛtasya kulyā upa ṛtasya pathyā anviti sādhūpety evaitad āha devīr āpaḥ śuddhā voḍhvaṃ supariviṣṭā deveṣu supariviṣṭā vayam pariveṣṭāro bhūyāsmety apa evaitatpāvayati

3.8.2.4

अथ पशोः प्राणान् अद्भिः पत्न्युपस्पृशति

atha paśoḥ prāṇān adbhiḥ patnyupaspṛśati

3.8.2.4.2

तद्यदद्भिः प्राणानुपस्पृशति जीवं वै देवानां हविर् अमृतम् अमृतानाम् अथैतत् पशुं घ्नन्ति यत्संज्ञपयन्ति यद् विशासत्य् आपो वै प्राणास् तद् अस्मिन्न् एतान् प्राणान् दधाति तथैतज्जीवमेव देवानां हविर्भवत्यमृतममृतानाम्

tadyadadbhiḥ prāṇānupaspṛśati jīvaṃ vai devānāṃ havir amṛtam amṛtānām athaitat paśuṃ ghnanti yatsaṃjñapayanti yad viśāsaty āpo vai prāṇās tad asminn etān prāṇān dadhāti tathaitajjīvameva devānāṃ havirbhavatyamṛtamamṛtānām

3.8.2.5

अथ यत्पत्न्युपस्पृशति

atha yatpatnyupaspṛśati

3.8.2.5.2

योषा वै पत्नी योषायै वा इमाः प्रजाः प्रजायन्ते तद् एनम् एतस्यै योषायै प्रजनयति तस्मात्पत्न्युपस्पृशति

yoṣā vai patnī yoṣāyai vā imāḥ prajāḥ prajāyante tad enam etasyai yoṣāyai prajanayati tasmātpatnyupaspṛśati

3.8.2.6

सोपस्पृशति

sopaspṛśati

3.8.2.6.2

वाचं ते शुन्धामीति मुखम् प्राणं ते शुन्धामीति नासिके चक्षुस्ते शुन्धामीत्यक्ष्यौ श्रोत्रं ते शुन्धामीति कर्णौ नाभिं ते शुन्धामीति यो ऽयमनिरुक्तः प्राणो मेढ्रं ते शुन्धामीति वा पायुं ते शुन्धामीति यो ऽयम् पश्चात्प्राणस्तत्प्राणान्दधाति तत् समीरयत्य् अथ संहृत्य पदश् चरित्रांस्ते शुन्धामीति पद्भिर् वै प्रतितिष्ठति प्रतिष्ठित्या एव तद् एनं प्रतिष्ठापयति

vācaṃ te śundhāmīti mukham prāṇaṃ te śundhāmīti nāsike cakṣuste śundhāmītyakṣyau śrotraṃ te śundhāmīti karṇau nābhiṃ te śundhāmīti yo 'yamaniruktaḥ prāṇo meḍhraṃ te śundhāmīti vā pāyuṃ te śundhāmīti yo 'yam paścātprāṇastatprāṇāndadhāti tat samīrayaty atha saṃhṛtya padaś caritrāṃste śundhāmīti padbhir vai pratitiṣṭhati pratiṣṭhityā eva tad enaṃ pratiṣṭhāpayati

3.8.2.7

अथ या आपः परिशिष्यन्ते

atha yā āpaḥ pariśiṣyante

3.8.2.7.2

अर्धा वा यावत्यो वा ताभिरेनं यजमानश्च शीर्षतो ऽग्रे ऽनुषिञ्चतस् तत् प्राणांश्चैवास्मिंस् तत् तौ धत्तस्तच्चैनमतः समीरयतः

ardhā vā yāvatyo vā tābhirenaṃ yajamānaśca śīrṣato 'gre 'nuṣiñcatas tat prāṇāṃścaivāsmiṃs tat tau dhattastaccainamataḥ samīrayataḥ

3.8.2.8

तद्यत्क्रूरीकुर्वन्ति

tadyatkrūrīkurvanti

3.8.2.8.2

यदास्थापयन्ति शान्तिर् आपस् तद् अद्भिः शान्त्या शमयतस् तद् अद्भिः संधत्तः

yadāsthāpayanti śāntir āpas tad adbhiḥ śāntyā śamayatas tad adbhiḥ saṃdhattaḥ

Śatapathabrāhmaṇa