1.5.3.2

देवाश्च वा असुराश्च

devāśca vā asurāśca

1.5.3.2.2

उभये प्राजापत्याः पस्पृधिर एतस्मिन्यज्ञे प्रजापतौ पितरि संवत्सरे ऽस्माकमयम् भविष्यत्यस्माकमयम् भविष्यतीति

ubhaye prājāpatyāḥ paspṛdhira etasminyajñe prajāpatau pitari saṃvatsare 'smākamayam bhaviṣyatyasmākamayam bhaviṣyatīti

1.5.3.3

ततो देवाः

tato devāḥ

1.5.3.3.2

अर्चन्तः श्राम्यन्तश्चेरुस् त एतान्प्रयाजान्ददृशुस् तैरयजन्त तैर् ऋतून्त् संवत्सरम् प्राजयन्न् ऋतुभ्यः संवत्सरात् सपत्नान् अन्तरायंस् तस्मात्प्रजयाः प्रजया ह वै नामैतद्यत्प्रयाजा इति तथो एवैष एतैर् ऋतून्त् संवत्सरम् प्रयजत्य् ऋतुभ्यः संवत्सरात्सपत्नानन्तरेति तस्मात्प्रयाजैर्यजते

arcantaḥ śrāmyantaścerus ta etānprayājāndadṛśus tairayajanta tair ṛtūnt saṃvatsaram prājayann ṛtubhyaḥ saṃvatsarāt sapatnān antarāyaṃs tasmātprajayāḥ prajayā ha vai nāmaitadyatprayājā iti tatho evaiṣa etair ṛtūnt saṃvatsaram prayajaty ṛtubhyaḥ saṃvatsarātsapatnānantareti tasmātprayājairyajate

1.5.3.4

ते वा आज्यहविषो भवन्ति

te vā ājyahaviṣo bhavanti

1.5.3.4.2

वज्रो वा आज्यमेतेन वै देवा वज्रेणाज्येनर्तून्त् संवत्सरम् प्राजयन्नृतुभ्यः संवत्सरात् सपत्नानन्तरायंस् तथो एवैष एतेन वज्रेणाज्येनर्तून्त् संवत्सरम् प्रजयत्य् ऋतुभ्यः संवत्सरात्सपत्नान् अन्तरेति तस्मादाज्यहविषो भवन्ति

vajro vā ājyametena vai devā vajreṇājyenartūnt saṃvatsaram prājayannṛtubhyaḥ saṃvatsarāt sapatnānantarāyaṃs tatho evaiṣa etena vajreṇājyenartūnt saṃvatsaram prajayaty ṛtubhyaḥ saṃvatsarātsapatnān antareti tasmādājyahaviṣo bhavanti

1.5.3.5

एतद्वै संवत्सरस्य स्वम् पयः

etadvai saṃvatsarasya svam payaḥ

1.5.3.5.2

यदाज्यं तत्स्वेनैवैनमेतत्पयसा देवाः स्व्यकुर्वत तथो एवैनमेष एतत् स्वेनैव पयसा स्वीकुरुते तस्मादाज्यहविषो भवन्ति

yadājyaṃ tatsvenaivainametatpayasā devāḥ svyakurvata tatho evainameṣa etat svenaiva payasā svīkurute tasmādājyahaviṣo bhavanti

1.5.3.6

स यत्रैव तिष्ठन्प्रयाजेभ्य आश्रावयेत्

sa yatraiva tiṣṭhanprayājebhya āśrāvayet

1.5.3.6.2

तत एव नापक्रामेत् संग्रामो वा एष संनिधीयते यः प्रयाजैर् यजते यतरो वै संयत्तयोः पराजयते ऽप वै संक्रामत्य् अभितराम् उ वै जयन् क्रामति तस्मादभितरामभितरामेव क्रामेद् अभितराम् अभितराम् आहुतीर्जुहुयात्

tata eva nāpakrāmet saṃgrāmo vā eṣa saṃnidhīyate yaḥ prayājair yajate yataro vai saṃyattayoḥ parājayate 'pa vai saṃkrāmaty abhitarām u vai jayan krāmati tasmādabhitarāmabhitarāmeva krāmed abhitarām abhitarām āhutīrjuhuyāt

1.5.3.7

तद् उ तथा न कुर्यात्

tad u tathā na kuryāt

1.5.3.7.2

यत्रैव तिष्ठन्प्रयाजेभ्य आश्रावयेत्तत एव नापक्रामेद् यत्रो एव समिद्धतमम् मन्येत तदाहुतीर् जुहुयात् समिद्धहोमेन ह्येव समृद्धा आहुतयः

yatraiva tiṣṭhanprayājebhya āśrāvayettata eva nāpakrāmed yatro eva samiddhatamam manyeta tadāhutīr juhuyāt samiddhahomena hyeva samṛddhā āhutayaḥ

1.5.3.8

स आश्राव्याह

sa āśrāvyāha

1.5.3.8.2

समिधो यजेति तद्वसन्तं समिन्द्धे स वसन्तः समिद्धो ऽन्यान् ऋतून्त् समिन्द्ध ऋतवः समिद्धाः प्रजाश्च प्रजनयन्त्योषधीश्च पचन्ति तद् व् एव खलु सर्वानृतून्निराहाथ यज यजेत्य् एवोत्तरान् आहाजामितायै जामि ह कुर्याद् यत् तनूनपातं यजेडो यजेति ब्रूयात् तस्माद् यज यजेत्येवोत्तरानाह

samidho yajeti tadvasantaṃ saminddhe sa vasantaḥ samiddho 'nyān ṛtūnt saminddha ṛtavaḥ samiddhāḥ prajāśca prajanayantyoṣadhīśca pacanti tad v eva khalu sarvānṛtūnnirāhātha yaja yajety evottarān āhājāmitāyai jāmi ha kuryād yat tanūnapātaṃ yajeḍo yajeti brūyāt tasmād yaja yajetyevottarānāha

1.5.3.9

स वै समिधो यजति

sa vai samidho yajati

1.5.3.9.2

वसन्तो वै समिद्वसन्तमेव तद्देवा अवृञ्जत वसन्तात् सपत्नान् अन्तरायन् वसन्तम् एवैष एतद्वृङ्क्ते वसन्तात् सपत्नान् अन्तरेति तस्मात्समिधो यजति

vasanto vai samidvasantameva taddevā avṛñjata vasantāt sapatnān antarāyan vasantam evaiṣa etadvṛṅkte vasantāt sapatnān antareti tasmātsamidho yajati

1.5.3.10

अथ तनूनपातं यजति

atha tanūnapātaṃ yajati

1.5.3.10.2

ग्रीष्मो वै तनूनपाद् ग्रीष्मो ह्यासाम् प्रजानां तनूस्तपति ग्रीष्ममेव तद्देवा अवृञ्जत ग्रीष्मात्सपत्नानन्तरायन् ग्रीष्ममेवैष एतद्वृङ्क्ते ग्रीष्मात्सपत्नानन्तरेति तस्मात्तनूनपातं यजति

grīṣmo vai tanūnapād grīṣmo hyāsām prajānāṃ tanūstapati grīṣmameva taddevā avṛñjata grīṣmātsapatnānantarāyan grīṣmamevaiṣa etadvṛṅkte grīṣmātsapatnānantareti tasmāttanūnapātaṃ yajati

1.5.3.11

अथेडो यजति

atheḍo yajati

1.5.3.11.2

वर्षा वा इड इति हि वर्षा इडो यदिदं क्षुद्रं सरीसृपं ग्रीष्महेमन्ताभ्यां नित्यक्तम् भवति तद्वर्षा ईडितम् इवान्नम् इच्छमानं चरति तस्माद्वर्षा इडो वर्षा एव तद्देवा अवृञ्जत वर्षाभ्यः सपत्नान् अन्तरायन् वर्षा उ एवैष एतद्वृङ्क्ते वर्षाभ्यः सपत्नानन्तरेति तस्मादिडो यजति

varṣā vā iḍa iti hi varṣā iḍo yadidaṃ kṣudraṃ sarīsṛpaṃ grīṣmahemantābhyāṃ nityaktam bhavati tadvarṣā īḍitam ivānnam icchamānaṃ carati tasmādvarṣā iḍo varṣā eva taddevā avṛñjata varṣābhyaḥ sapatnān antarāyan varṣā u evaiṣa etadvṛṅkte varṣābhyaḥ sapatnānantareti tasmādiḍo yajati

Śatapathabrāhmaṇa