1.3.3.7

अथ बर्हि स्तृणाति

atha barhi stṛṇāti

1.3.3.7.2

अयं वै स्तुपः प्रस्तरो ऽथ यान्यवाञ्चि लोमानि तान्येवास्य यदितरम् बर्हिस् तान्येवास्मिन्न् एतद् दधाति तस्माद् बर्हि स्तृणाति

ayaṃ vai stupaḥ prastaro 'tha yānyavāñci lomāni tānyevāsya yaditaram barhis tānyevāsminn etad dadhāti tasmād barhi stṛṇāti

1.3.3.8

योषा वै वेदिः

yoṣā vai vediḥ

1.3.3.8.2

तामेतद्देवाश्च पर्यासते ये चेमे ब्राह्मणाः शुश्रुवांसो ऽनूचानास् तेष्वेवैनाम् एतत् पर्यासीनेष्व् अनग्नां करोत्य् अनग्नताया एव तस्माद् बर्हि स्तृणाति

tāmetaddevāśca paryāsate ye ceme brāhmaṇāḥ śuśruvāṃso 'nūcānās teṣvevainām etat paryāsīneṣv anagnāṃ karoty anagnatāyā eva tasmād barhi stṛṇāti

1.3.3.9

यावती वै वेदिः

yāvatī vai vediḥ

1.3.3.9.2

तावती पृथिव्य् ओषधयो बर्हिस् तद् अस्याम् एवैतत् पृथिव्याम् ओषधीर्दधाति ता इमा अस्याम् पृथिव्याम् ओषधयः प्रतिष्ठितास् तस्माद् बर्हि स्तृणाति

tāvatī pṛthivy oṣadhayo barhis tad asyām evaitat pṛthivyām oṣadhīrdadhāti tā imā asyām pṛthivyām oṣadhayaḥ pratiṣṭhitās tasmād barhi stṛṇāti

1.3.3.10

तद् वै बहुलं स्तृणीयाद् इत्य् आहुः

tad vai bahulaṃ stṛṇīyād ity āhuḥ

1.3.3.10.2

यत्र वा अस्यै बहुलतमा ओषधयस् तद् अस्या उपजीवनीयतमं तस्माद् बहुलं स्तृणीयाद् इति तद् वै तदाहर्तर्येवाधि त्रिवृत् स्तृणाति त्रिवृद्धि यज्ञो ऽथो अपि प्रवर्हं स्तृणीयात् स्तृणन्ति बर्हिर् आनुषगिति त्वृषिणाभ्यनूक्तम् अधरमूलं स्तृणात्य् अधरमूला इव हीमा अस्याम् पृथिव्याम् ओषधयः प्रतिष्ठितास् तस्माद् अधरमूलं स्तृणाति

yatra vā asyai bahulatamā oṣadhayas tad asyā upajīvanīyatamaṃ tasmād bahulaṃ stṛṇīyād iti tad vai tadāhartaryevādhi trivṛt stṛṇāti trivṛddhi yajño 'tho api pravarhaṃ stṛṇīyāt stṛṇanti barhir ānuṣagiti tvṛṣiṇābhyanūktam adharamūlaṃ stṛṇāty adharamūlā iva hīmā asyām pṛthivyām oṣadhayaḥ pratiṣṭhitās tasmād adharamūlaṃ stṛṇāti

1.3.3.11

स स्तृणाति

sa stṛṇāti

1.3.3.11.2

ऊर्णम्रदसं त्वा स्तृणामि स्वासस्थां देवेभ्य इति साध्वीं देवेभ्य इत्येवैतदाह यदाहोर्णम्रदसं त्वेति स्वासस्थां देवेभ्य इति स्वासदां देवेभ्य इत्येवैतदाह

ūrṇamradasaṃ tvā stṛṇāmi svāsasthāṃ devebhya iti sādhvīṃ devebhya ityevaitadāha yadāhorṇamradasaṃ tveti svāsasthāṃ devebhya iti svāsadāṃ devebhya ityevaitadāha

1.3.3.12

अथाग्निं कल्पयति

athāgniṃ kalpayati

1.3.3.12.2

शिरो वै यज्ञस्याहवनीयः पूर्वो ऽर्धो वै शिरः पूर्वार्धमेवैतद्यज्ञस्य कल्पयत्य् उपर्युपरि प्रस्तरं धारयन् कल्पयत्य् अयं वै स्तुपः प्रस्तर एतम् एवास्मिन्न् एतत् प्रतिदधाति तस्माद् उपर्युपरि प्रस्तरं धारयन् कल्पयति

śiro vai yajñasyāhavanīyaḥ pūrvo 'rdho vai śiraḥ pūrvārdhamevaitadyajñasya kalpayaty uparyupari prastaraṃ dhārayan kalpayaty ayaṃ vai stupaḥ prastara etam evāsminn etat pratidadhāti tasmād uparyupari prastaraṃ dhārayan kalpayati

1.3.3.13

अथ परिधीन् परिदधाति

atha paridhīn paridadhāti

1.3.3.13.2

तद् यत् परिधीन् परिदधाति यत्र वै देवा अग्रे ऽग्निं होत्राय प्रावृणत तद्धोवाच न वा अहमिदमुत्सहे यद् वो होता स्यां यद्वो हव्यं वहेयं त्रीन् पूर्वान् प्रावृढ्वं ते प्राधन्विषुस् तान् नु मे ऽवकल्पयताथ वा अहम् एतद् उत्साक्ष्ये यद्वो होता स्यां यद्वो हव्यं वहेयमिति तथेति तान् अस्मा एतान् अवाकल्पयंस् त एते परिधयः

tad yat paridhīn paridadhāti yatra vai devā agre 'gniṃ hotrāya prāvṛṇata taddhovāca na vā ahamidamutsahe yad vo hotā syāṃ yadvo havyaṃ vaheyaṃ trīn pūrvān prāvṛḍhvaṃ te prādhanviṣus tān nu me 'vakalpayatātha vā aham etad utsākṣye yadvo hotā syāṃ yadvo havyaṃ vaheyamiti tatheti tān asmā etān avākalpayaṃs ta ete paridhayaḥ

1.3.3.14

स होवाच

sa hovāca

1.3.3.14.2

वज्रो वै तान्वषट्कारः प्रावृणग् वज्राद् वै वषट्काराद्बिभेमि यन्मा वज्रो वषट्कारो न प्रवृञ्ज्याद् एतैरेव मा परिधत्त तथा मा वज्रो वषट्कारो न प्रवर्क्ष्यतीति तथेति तमेतैः पर्यदधुस् तं न वज्रो वषट्कारः प्रावृणक् तद् वर्मैवैतद् अग्नये नह्यति यदेतैः परिदधाति

vajro vai tānvaṣaṭkāraḥ prāvṛṇag vajrād vai vaṣaṭkārādbibhemi yanmā vajro vaṣaṭkāro na pravṛñjyād etaireva mā paridhatta tathā mā vajro vaṣaṭkāro na pravarkṣyatīti tatheti tametaiḥ paryadadhus taṃ na vajro vaṣaṭkāraḥ prāvṛṇak tad varmaivaitad agnaye nahyati yadetaiḥ paridadhāti

1.3.3.15

त उ हैत ऊचुः

ta u haita ūcuḥ

1.3.3.15.2

इदम् उ चेदस्मान्यज्ञे युङ्क्थास्त्व् एवास्माकम् अपि यज्ञे भाग इति

idam u cedasmānyajñe yuṅkthāstv evāsmākam api yajñe bhāga iti

1.3.3.16

तथेति देवा अब्रुवन्

tatheti devā abruvan

1.3.3.16.2

यद् बहिष्परिधि स्कन्त्स्यति तद् युष्मासु हुतम् अथ यद्व उपर्युपरि होष्यन्ति तद् वो ऽविष्यतीति स यदग्नौ जुह्वति तद् एनान् अवत्य् अथ यद् एनान् उपर्युपरि जुह्वति तद् एनान् अवत्य् अथ यद् बहिष्परिधि स्कन्दति तद् एतेषु हुतं तस्माद् उ ह नाग इव स्कन्नं स्याद् इमां वै ते प्राविशन् यद् वा इदं किंच स्कन्दत्य् अस्याम् एव तत् सर्वं प्रतितिष्ठति

yad bahiṣparidhi skantsyati tad yuṣmāsu hutam atha yadva uparyupari hoṣyanti tad vo 'viṣyatīti sa yadagnau juhvati tad enān avaty atha yad enān uparyupari juhvati tad enān avaty atha yad bahiṣparidhi skandati tad eteṣu hutaṃ tasmād u ha nāga iva skannaṃ syād imāṃ vai te prāviśan yad vā idaṃ kiṃca skandaty asyām eva tat sarvaṃ pratitiṣṭhati

Śatapathabrāhmaṇa