6.4.4.1.2

एतद्वा एषु देवाः संभरिष्यन्तः पुरस्ताद् वीर्यम् अदधुस् तथैवैष्वयमेतत् संभरिष्यन्पुरस्ताद्वीर्यं दधाति

etadvā eṣu devāḥ saṃbhariṣyantaḥ purastād vīryam adadhus tathaivaiṣvayametat saṃbhariṣyanpurastādvīryaṃ dadhāti

6.4.4.2

सो ऽश्वमभिमन्त्रयते

so 'śvamabhimantrayate

6.4.4.2.2

स जातो गर्भो असि रोदस्योरितीमे वै द्यावापृथिवी रोदसी तयोरेष जातो गर्भो ऽग्ने चारुर्विभृत ओषधीष्विति सर्वासु ह्येष चारुर्विभृत ओषधिषु चित्रः शिशुः परि तमांस्यक्तूनिति चित्रो वा एष शिशुः परेण तमांस्यक्तूनतिरोचते प्र मातृभ्यो अधि कनिक्रदद्गा इत्य् ओषधयो वा एतस्य मातरस् ताभ्य एष कनिक्रदत् प्रैति तद् अश्वे वीर्यं दधाति

sa jāto garbho asi rodasyoritīme vai dyāvāpṛthivī rodasī tayoreṣa jāto garbho 'gne cārurvibhṛta oṣadhīṣviti sarvāsu hyeṣa cārurvibhṛta oṣadhiṣu citraḥ śiśuḥ pari tamāṃsyaktūniti citro vā eṣa śiśuḥ pareṇa tamāṃsyaktūnatirocate pra mātṛbhyo adhi kanikradadgā ity oṣadhayo vā etasya mātaras tābhya eṣa kanikradat praiti tad aśve vīryaṃ dadhāti

6.4.4.3

अथ रासभम्

atha rāsabham

6.4.4.3.2

स्थिरो भव वीड्वङ्ग आशुर्भव वाज्यर्वन्निति स्थिरश्च भव वीड्वङ्गश्चाशुश्च भव वाजी चार्वन्न् इत्येतत् पृथुर्भव सुषदस्त्वमग्नेः पुरीषवाहण इति पृथुर्भव सुशीमस्त्वमग्नेः पशव्यवाहन इत्येतत् तद् रासभे वीर्यं दधाति

sthiro bhava vīḍvaṅga āśurbhava vājyarvanniti sthiraśca bhava vīḍvaṅgaścāśuśca bhava vājī cārvann ityetat pṛthurbhava suṣadastvamagneḥ purīṣavāhaṇa iti pṛthurbhava suśīmastvamagneḥ paśavyavāhana ityetat tad rāsabhe vīryaṃ dadhāti

6.4.4.4

अथाजम्

athājam

6.4.4.4.2

शिखा भव प्रजाभ्यो मानुषीभ्यस्त्वमङ्गिर इत्य् अङ्गिरा वा अग्निराग्नेयो ऽजः शमयत्येवैनमेतद् अहिंसायै मा द्यावापृथिवी अभिशोचीर्मान्तरिक्षम् मा वनस्पतीन् इत्येतत् सर्वम् मा हिंसीरित्येतत् तद् अजे वीर्यं दधाति

śikhā bhava prajābhyo mānuṣībhyastvamaṅgira ity aṅgirā vā agnirāgneyo 'jaḥ śamayatyevainametad ahiṃsāyai mā dyāvāpṛthivī abhiśocīrmāntarikṣam mā vanaspatīn ityetat sarvam mā hiṃsīrityetat tad aje vīryaṃ dadhāti

6.4.4.5

त्रिभिरभिमन्त्रयते

tribhirabhimantrayate

6.4.4.5.2

त्रिवृदग्निर् यावानग्निर्यावत्यस्य मात्रा तावतैवैष्वेतद् वीर्यं दधाति

trivṛdagnir yāvānagniryāvatyasya mātrā tāvataivaiṣvetad vīryaṃ dadhāti

6.4.4.6

अथैनमेतेषाम् पशूनामुपरिष्टात् प्रगृह्णाति

athainameteṣām paśūnāmupariṣṭāt pragṛhṇāti

6.4.4.6.2

तद् एनम् एतैः पशुभिः संभरति नोपस्पृशति वज्रो वै पशवो रेत इदं नेदिदं रेतो वज्रेण हिनसानीत्य् अथो अग्निरयम् पशव इमे नेदयमग्निरिमान्पशून्हिनसदिति

tad enam etaiḥ paśubhiḥ saṃbharati nopaspṛśati vajro vai paśavo reta idaṃ nedidaṃ reto vajreṇa hinasānīty atho agnirayam paśava ime nedayamagnirimānpaśūnhinasaditi

6.4.4.7

तमश्वस्योपरिष्टात्प्रगृह्णाति

tamaśvasyopariṣṭātpragṛhṇāti

6.4.4.7.2

प्रैतु वाजी कनिक्रददिति प्रैतु वाजी कनिक्रद्यमान इत्येतन् नानदद् रासभः पत्वेति तदश्वस्य यजुषि रासभं निराह तद्रासभे शुचं दधाति भरन्नग्निम् पुरीष्यम् मा पाद्यायुषः पुरेति भरन्नग्निम् पशव्यं मो अस्मात्कर्मणः पुरा पादीत्येतत् तद् एनमश्वेन संभरति

praitu vājī kanikradaditi praitu vājī kanikradyamāna ityetan nānadad rāsabhaḥ patveti tadaśvasya yajuṣi rāsabhaṃ nirāha tadrāsabhe śucaṃ dadhāti bharannagnim purīṣyam mā pādyāyuṣaḥ pureti bharannagnim paśavyaṃ mo asmātkarmaṇaḥ purā pādītyetat tad enamaśvena saṃbharati

6.4.4.8

अथ रासभस्य

atha rāsabhasya

6.4.4.8.2

वृषाग्निं वृषणम् भरन्निति वृषा वा अग्निर् वृषा रासभः स वृषा वृषाणम् भरत्य् अपां गर्भं समुद्रियमित्य् अपां ह्येष गर्भः समुद्रियस् तदेनं रासभेन संभरति

vṛṣāgniṃ vṛṣaṇam bharanniti vṛṣā vā agnir vṛṣā rāsabhaḥ sa vṛṣā vṛṣāṇam bharaty apāṃ garbhaṃ samudriyamity apāṃ hyeṣa garbhaḥ samudriyas tadenaṃ rāsabhena saṃbharati

6.4.4.9

अथापादत्ते

athāpādatte

6.4.4.9.2

अग्न आयाहि वीतय इत्य् अवितव इत्येतत् तद् एनम् ब्रह्मणा यजुषैतस्माच्छौद्राद् वर्णाद् अपादत्ते

agna āyāhi vītaya ity avitava ityetat tad enam brahmaṇā yajuṣaitasmācchaudrād varṇād apādatte

6.4.4.10

अथाजस्य

athājasya

6.4.4.10.2

ऋतं सत्यमृतं सत्यमित्ययं वा अग्निरृतमसावादित्यः सत्यं यदि वासाव् ऋतम् अयं सत्यम् उभयम् व् एतद् अयमग्निस् तस्मादाहर्तं सत्यमृतं सत्यमिति तदेनमजेन

ṛtaṃ satyamṛtaṃ satyamityayaṃ vā agnirṛtamasāvādityaḥ satyaṃ yadi vāsāv ṛtam ayaṃ satyam ubhayam v etad ayamagnis tasmādāhartaṃ satyamṛtaṃ satyamiti tadenamajena

6.4.4.11

त्रिभिः संभरति

tribhiḥ saṃbharati

Śatapathabrāhmaṇa