6.3.1.23.2

यद्यह सर्वैर् अन्वेषिष्यामो यातयामा अनुपजीवनीया भविष्यन्ति यद्य् उ असर्वैर् असर्वम् अनुवेत्स्याम इति त एतमेकम् पशुं द्वाभ्याम् पशुभ्याम् प्रत्यपश्यन् रासभं गोश् चावेश् च तद्यदेतमेकम् पशुं द्वाभ्याम् पशुभ्याम् प्रत्यपश्यंस् तस्माद् एष एकः सन्द्विरेताः

yadyaha sarvair anveṣiṣyāmo yātayāmā anupajīvanīyā bhaviṣyanti yady u asarvair asarvam anuvetsyāma iti ta etamekam paśuṃ dvābhyām paśubhyām pratyapaśyan rāsabhaṃ goś cāveś ca tadyadetamekam paśuṃ dvābhyām paśubhyām pratyapaśyaṃs tasmād eṣa ekaḥ sandviretāḥ

6.3.1.24

अनद्धापुरुषम् पुरुषात्

anaddhāpuruṣam puruṣāt

6.3.1.24.2

एष ह वा अनद्धापुरुषो यो न देवानवति न पितॄन् न मनुष्यांस् तत् सर्वैरह पशुभिर् अन्वैच्छन् नो यातयामा अनुपजीवनीया अभवन्

eṣa ha vā anaddhāpuruṣo yo na devānavati na pitṝn na manuṣyāṃs tat sarvairaha paśubhir anvaicchan no yātayāmā anupajīvanīyā abhavan

6.3.1.25

त्रिभिरन्विच्छति

tribhiranvicchati

6.3.1.25.2

त्रिवृद् अग्निर् यावान् अग्निर् यावत्यस्य मात्रा तावतैवैनमेतदन्विच्छति पञ्च संपदा भवन्ति पञ्चचितिको ऽग्निः पञ्चर्तवः संवत्सरः संवत्सरो ऽग्निर् यावान् अग्निर्यावत्यस्य मात्रा तावत् तद् भवति

trivṛd agnir yāvān agnir yāvatyasya mātrā tāvataivainametadanvicchati pañca saṃpadā bhavanti pañcacitiko 'gniḥ pañcartavaḥ saṃvatsaraḥ saṃvatsaro 'gnir yāvān agniryāvatyasya mātrā tāvat tad bhavati

6.3.1.26

ते मौञ्जीभिर् अभिधानीभिर् अभिहिता भवन्ति

te mauñjībhir abhidhānībhir abhihitā bhavanti

6.3.1.26.2

अग्निर्देवेभ्य उदक्रामत् स मुञ्जम् प्राविशत् तस्मात् स सुषिरस् तस्माद् व् एवान्तरतो धूमरक्त इव सैषा योनिर् अग्नेर् यन्मुञ्जो ऽग्निर् इमे पशवो न वै योनिर्गर्भं हिनस्त्यहिंसायै योनिर्वै जायमानो जायते योनेर् जायमानो जायाता इति

agnirdevebhya udakrāmat sa muñjam prāviśat tasmāt sa suṣiras tasmād v evāntarato dhūmarakta iva saiṣā yonir agner yanmuñjo 'gnir ime paśavo na vai yonirgarbhaṃ hinastyahiṃsāyai yonirvai jāyamāno jāyate yoner jāyamāno jāyātā iti

6.3.1.27

त्रिवृतो भवन्ति

trivṛto bhavanti

6.3.1.27.2

त्रिवृद्ध्यग्निर् अश्वाभिधानीकृता भवन्ति सर्वतो वा अश्वाभिधानी मुखम् परिशेते सर्वतो योनिर्गर्भम् परिशेते योनिरूपमेतत्क्रियते

trivṛddhyagnir aśvābhidhānīkṛtā bhavanti sarvato vā aśvābhidhānī mukham pariśete sarvato yonirgarbham pariśete yonirūpametatkriyate

6.3.1.28

ते प्राञ्चस्तिष्ठन्ति

te prāñcastiṣṭhanti

6.3.1.28.2

अश्वः प्रथमो ऽथ रासभो ऽथाज एवं ह्येते ऽनुपूर्वं यद्वै तदश्रु संक्षरितम् आसीद् एष सो ऽश्वो ऽथ यत्तदरसदिवैष रासभो ऽथ यः स कपाले रसो लिप्त आसीदेष सो ऽजो ऽथ यत् तत् कपालमासीद् एषा सा मृद् याम् एतद् आहरिष्यन्तो भवन्त्य् एतेभ्यो वा एष रूपेभ्यो ऽग्रे ऽसृज्यत तेभ्य एवैनम् एतज्जनयति

aśvaḥ prathamo 'tha rāsabho 'thāja evaṃ hyete 'nupūrvaṃ yadvai tadaśru saṃkṣaritam āsīd eṣa so 'śvo 'tha yattadarasadivaiṣa rāsabho 'tha yaḥ sa kapāle raso lipta āsīdeṣa so 'jo 'tha yat tat kapālamāsīd eṣā sā mṛd yām etad āhariṣyanto bhavanty etebhyo vā eṣa rūpebhyo 'gre 'sṛjyata tebhya evainam etajjanayati

6.3.1.29

ते दक्षिणतस् तिष्ठन्ति

te dakṣiṇatas tiṣṭhanti

6.3.1.29.2

एतद् वै देवा अबिभयुर् यद् वै नो यज्ञं दक्षिणतो रक्षांसि नाष्ट्रा न हन्युरिति त एतं वज्रम् अपश्यन्न् अमुम् एवादित्यम् असौ वा आदित्य एषो ऽश्वस् त एतेन वज्रेण दक्षिणतो रक्षांसि नाष्ट्रा अपहत्याभये ऽनाष्ट्र एतं यज्ञम् अतन्वत तथैवैतद् यजमान एतेन वज्रेण दक्षिणतो रक्षांसि नाष्ट्रा अपहत्याभये ऽनाष्ट्र एतं यज्ञं तनुते

etad vai devā abibhayur yad vai no yajñaṃ dakṣiṇato rakṣāṃsi nāṣṭrā na hanyuriti ta etaṃ vajram apaśyann amum evādityam asau vā āditya eṣo 'śvas ta etena vajreṇa dakṣiṇato rakṣāṃsi nāṣṭrā apahatyābhaye 'nāṣṭra etaṃ yajñam atanvata tathaivaitad yajamāna etena vajreṇa dakṣiṇato rakṣāṃsi nāṣṭrā apahatyābhaye 'nāṣṭra etaṃ yajñaṃ tanute

6.3.1.30

दक्षिणत आहवनीयो भवति

dakṣiṇata āhavanīyo bhavati

6.3.1.30.2

उत्तरत एषाभ्रिर् उपशेते वृषा वा आहवनीयो योषाभ्रिर् दक्षिणतो वै वृषा योषाम् उपशेते ऽरत्निमात्रे ऽरत्निमात्राद्धि वृषा योषाम् उपशेते

uttarata eṣābhrir upaśete vṛṣā vā āhavanīyo yoṣābhrir dakṣiṇato vai vṛṣā yoṣām upaśete 'ratnimātre 'ratnimātrāddhi vṛṣā yoṣām upaśete

6.3.1.31

सा वैणवी स्यात्

sā vaiṇavī syāt

6.3.1.31.2

अग्निर्देवेभ्य उदक्रामत् स वेणुम् प्राविशत् तस्मात्स सुषिरः स एतानि वर्माण्यभितो ऽकुरुत पर्वाण्यननुप्रज्ञानाय यत्र यत्र निददाह तानि कल्माषाण्यभवन्

agnirdevebhya udakrāmat sa veṇum prāviśat tasmātsa suṣiraḥ sa etāni varmāṇyabhito 'kuruta parvāṇyananuprajñānāya yatra yatra nidadāha tāni kalmāṣāṇyabhavan

6.3.1.32

सा कल्माषी स्यात्

sā kalmāṣī syāt

6.3.1.32.2

सा ह्याग्नेयी यदि कल्माषीं न विन्देद् अप्य् अकल्माषी स्यात् सुषिरा तु स्यात् सैवाग्नेयी सैषा योनिरग्नेर्यद्वेणुर् अग्निरियम् मृन् न वै योनिर् गर्भं हिनस्त्यहिंसायै योनेर् वै जायमानो जायते योनेर् जायमानो जायाता इति

sā hyāgneyī yadi kalmāṣīṃ na vinded apy akalmāṣī syāt suṣirā tu syāt saivāgneyī saiṣā yoniragneryadveṇur agniriyam mṛn na vai yonir garbhaṃ hinastyahiṃsāyai yoner vai jāyamāno jāyate yoner jāyamāno jāyātā iti

6.3.1.33

प्रादेशमात्री स्यात्

prādeśamātrī syāt

Śatapathabrāhmaṇa