1.2.5.9

ते ह देवा ऊचुः

te ha devā ūcuḥ

1.2.5.9.2

क्व नु विष्णुरभूत् क्व नु यज्ञो ऽभूदिति ते होचुश् छन्दोभिर् अभितः परिगृहीतो ऽग्निः पुरस्तान् नापक्रमणम् अस्त्य् अत्रैवान्विच्छतेति तं खनन्त इवान्वीषुस् तं त्र्यङ्गुले ऽन्वविन्दंस् तस्मात् त्र्यङ्गुला वेदिः स्यात् तद् उ हापि पाञ्चिस्त्र्यङ्गुलामेव सौम्यस्याध्वरस्य वेदिं चक्रे

kva nu viṣṇurabhūt kva nu yajño 'bhūditi te hocuś chandobhir abhitaḥ parigṛhīto 'gniḥ purastān nāpakramaṇam asty atraivānvicchateti taṃ khananta ivānvīṣus taṃ tryaṅgule 'nvavindaṃs tasmāt tryaṅgulā vediḥ syāt tad u hāpi pāñcistryaṅgulāmeva saumyasyādhvarasya vediṃ cakre

1.2.5.10

तद् उ तथा न कुर्यात्

tad u tathā na kuryāt

1.2.5.10.2

ओषधीनां वै स मूलान्युपाम्लोचत् तस्माद् ओषधीनाम् एव मूलान्य् उच्छेत्तवै ब्रूयाद् यन्न्व् एवात्र विष्णुम् अन्वविन्दंस् तस्माद् वेदिर्नाम

oṣadhīnāṃ vai sa mūlānyupāmlocat tasmād oṣadhīnām eva mūlāny ucchettavai brūyād yannv evātra viṣṇum anvavindaṃs tasmād vedirnāma

1.2.5.11

तमनुविद्योत्तरेण परिग्रहेण पर्यगृह्णन्

tamanuvidyottareṇa parigraheṇa paryagṛhṇan

1.2.5.11.2

सुक्ष्मा चासि शिवा चासीति दक्षिणत इमाम् एवैतत् पृथिवीं संविद्य सुक्ष्मां शिवामकुर्वत स्योना चासि सुषदा चासीति पश्चाद् इमाम् एवैतत् पृथिवीं संविद्य स्योनां सुषदाम् अकुर्वतोर्जस्वती चासि पयस्वती चेत्युत्तरत इमामेवैतत्पृथिवीं संविद्य रसवतीमुपजीवनीयामकुर्वत

sukṣmā cāsi śivā cāsīti dakṣiṇata imām evaitat pṛthivīṃ saṃvidya sukṣmāṃ śivāmakurvata syonā cāsi suṣadā cāsīti paścād imām evaitat pṛthivīṃ saṃvidya syonāṃ suṣadām akurvatorjasvatī cāsi payasvatī cetyuttarata imāmevaitatpṛthivīṃ saṃvidya rasavatīmupajīvanīyāmakurvata

1.2.5.12

स वै त्रिः पूर्वम् परिग्रहम् परिगृह्णाति

sa vai triḥ pūrvam parigraham parigṛhṇāti

1.2.5.12.2

त्रिरुत्तरं तत् षट्कृत्वः षड्वा ऋतवः संवत्सरस्य संवत्सरो यज्ञः प्रजापतिः स यावानेव यज्ञो यावत्यस्य मात्रा तावतम् एवैतत् परिगृह्णाति

triruttaraṃ tat ṣaṭkṛtvaḥ ṣaḍvā ṛtavaḥ saṃvatsarasya saṃvatsaro yajñaḥ prajāpatiḥ sa yāvāneva yajño yāvatyasya mātrā tāvatam evaitat parigṛhṇāti

1.2.5.13

षड्भिर्व्याहृतिभिः

ṣaḍbhirvyāhṛtibhiḥ

1.2.5.13.2

पूर्वम् परिग्रहं परिगृह्णाति षड्भिरुत्तरं तद् द्वादशकृत्वो द्वादश वै मासाः संवत्सरस्य संवत्सरो यज्ञः प्रजापतिः स यावानेव यज्ञो यावत्यस्य मात्रा तावतम् एवैतत् परिगृह्णाति

pūrvam parigrahaṃ parigṛhṇāti ṣaḍbhiruttaraṃ tad dvādaśakṛtvo dvādaśa vai māsāḥ saṃvatsarasya saṃvatsaro yajñaḥ prajāpatiḥ sa yāvāneva yajño yāvatyasya mātrā tāvatam evaitat parigṛhṇāti

1.2.5.14

व्याममात्री पश्चात्स्याद् इत्याहुः

vyāmamātrī paścātsyād ityāhuḥ

1.2.5.14.2

एतावान् वै पुरुषः पुरुषसंमिता हि त्र्यरत्निः प्राची त्रिवृद्धि यज्ञो नात्र मात्रास्ति यावतीम् एव स्वयम् मनसा मन्येत तावतीं कुर्यात्

etāvān vai puruṣaḥ puruṣasaṃmitā hi tryaratniḥ prācī trivṛddhi yajño nātra mātrāsti yāvatīm eva svayam manasā manyeta tāvatīṃ kuryāt

1.2.5.15

अभितो ऽग्निमंसा उन्नयति

abhito 'gnimaṃsā unnayati

1.2.5.15.2

योषा वै वेदिर् वृषाग्निः परिगृह्य वै योषा वृषाणं शेते मिथुनम् एवैतत् प्रजननं क्रियते तस्मादभितो ऽग्निमंसा उन्नयति

yoṣā vai vedir vṛṣāgniḥ parigṛhya vai yoṣā vṛṣāṇaṃ śete mithunam evaitat prajananaṃ kriyate tasmādabhito 'gnimaṃsā unnayati

1.2.5.16

सा वै पश्चाद्वरीयसी स्यात्

sā vai paścādvarīyasī syāt

1.2.5.16.2

मध्ये संह्वारिता पुनः पुरस्ताद् उर्व्य् एवमिव हि योषाम् प्रशंसन्ति पृथुश्रोणिर् विमृष्टान्तरांसा मध्ये संग्राह्येति जुष्टाम् एवैनाम् एतद् देवेभ्यः करोति

madhye saṃhvāritā punaḥ purastād urvy evamiva hi yoṣām praśaṃsanti pṛthuśroṇir vimṛṣṭāntarāṃsā madhye saṃgrāhyeti juṣṭām evainām etad devebhyaḥ karoti

1.2.5.17

सा वै प्राक्प्रवणा स्यात्

sā vai prākpravaṇā syāt

1.2.5.17.2

प्राची हि देवानां दिग् अथो उदक्प्रवणोदीची हि मनुष्याणां दिग् दक्षिणतः पुरीषम् प्रत्युदूहत्य् एषा वै दिक्पितॄणां सा यद्दक्षिणाप्रवणा स्यात् क्षिप्रे ह यजमानो ऽमुं लोकम् इयात् तथो ह यजमानो ज्योग्जीवति तस्माद् दक्षिणतः पुरीषम् प्रत्युदूहति पुरीषवतीं कुर्वीत पशवो वै पुरीषम् पशुमतीम् एवैनाम् एतत् कुरुते

prācī hi devānāṃ dig atho udakpravaṇodīcī hi manuṣyāṇāṃ dig dakṣiṇataḥ purīṣam pratyudūhaty eṣā vai dikpitṝṇāṃ sā yaddakṣiṇāpravaṇā syāt kṣipre ha yajamāno 'muṃ lokam iyāt tatho ha yajamāno jyogjīvati tasmād dakṣiṇataḥ purīṣam pratyudūhati purīṣavatīṃ kurvīta paśavo vai purīṣam paśumatīm evainām etat kurute

1.2.5.18

ताम् प्रतिमार्ष्टि

tām pratimārṣṭi

1.2.5.18.2

देवा ह वै संग्रामं संनिधास्यन्तस् ते होचुर् हन्त यदस्यै पृथिव्या अनामृतं देवयजनं तच्चन्द्रमसि निदधामहै स यदि न इतो ऽसुरा जयेयुस् तत एवार्चन्तः श्राम्यन्तः पुनर् अभिभवेमेति स यदस्यै पृथिव्या अनामृतं देवयजनम् आसीत् तच्चन्द्रमसि न्यदधत तद् एतच्चन्द्रमसि कृष्णं तस्माद् आहुश् चन्द्रमस्य् अस्यै पृथिव्यै देवयजनम् इत्य् अपि ह वास्यैतस्मिन् देवयजन इष्टं भवति तस्माद् वै प्रतिमार्ष्टि

devā ha vai saṃgrāmaṃ saṃnidhāsyantas te hocur hanta yadasyai pṛthivyā anāmṛtaṃ devayajanaṃ taccandramasi nidadhāmahai sa yadi na ito 'surā jayeyus tata evārcantaḥ śrāmyantaḥ punar abhibhavemeti sa yadasyai pṛthivyā anāmṛtaṃ devayajanam āsīt taccandramasi nyadadhata tad etaccandramasi kṛṣṇaṃ tasmād āhuś candramasy asyai pṛthivyai devayajanam ity api ha vāsyaitasmin devayajana iṣṭaṃ bhavati tasmād vai pratimārṣṭi

Śatapathabrāhmaṇa