1.2.4.10

स हाग्निरुवाच

sa hāgniruvāca

1.2.4.10.2

उदञ्चो वै नः पलाय्य मुच्यन्त इत्युदञ्चो ह स्मैवैषाम् पलाय्य मुच्यन्ते

udañco vai naḥ palāyya mucyanta ityudañco ha smaivaiṣām palāyya mucyante

1.2.4.11

स हाग्निरुवाच

sa hāgniruvāca

1.2.4.11.2

अहमुत्तरतः पर्येष्याम्य् अथ यूयमित उपसंरोत्स्यथ तान्त् संरुध्यैभिश्च लोकैरभिनिधास्यामो यद् उ चेमांल्लोकानति चतुर्थं ततः पुनर्न संहास्यन्त इति

ahamuttarataḥ paryeṣyāmy atha yūyamita upasaṃrotsyatha tānt saṃrudhyaibhiśca lokairabhinidhāsyāmo yad u cemāṃllokānati caturthaṃ tataḥ punarna saṃhāsyanta iti

1.2.4.12

सो ऽग्निरुत्तरतः पर्यैत्

so 'gniruttarataḥ paryait

1.2.4.12.2

अथेम इत उपसमरुन्धंस् तान्त् संरुध्यैभिश्च लोकैर् अभिन्यदधुर् यद् उ चेमांल्लोकान् अति चतुर्थं ततः पुनर् न समजिहत तद् एतन्निदानेन यत् स्तम्बयजुः

athema ita upasamarundhaṃs tānt saṃrudhyaibhiśca lokair abhinyadadhur yad u cemāṃllokān ati caturthaṃ tataḥ punar na samajihata tad etannidānena yat stambayajuḥ

1.2.4.13

स यो ऽसावग्नीद् उत्तरतः पर्येति

sa yo 'sāvagnīd uttarataḥ paryeti

1.2.4.13.2

अग्निर् एवैष निदानेन तानध्वर्युरेवेत उपसंरुणद्धि तान्त् संरुध्यैभिश्च लोकैर् अभिनिदधाति यद् उ चेमांल्लोकानति चतुर्थं ततः पुनर् न संजिहते तस्माद् अप्येतर्ह्यसुरा न संजिहते येन ह्येवैनान्देवा अवाबाधन्त तेनैवैनानप्येतर्हि ब्रह्मणा यज्ञे ऽवबाधन्ते

agnir evaiṣa nidānena tānadhvaryureveta upasaṃruṇaddhi tānt saṃrudhyaibhiśca lokair abhinidadhāti yad u cemāṃllokānati caturthaṃ tataḥ punar na saṃjihate tasmād apyetarhyasurā na saṃjihate yena hyevaināndevā avābādhanta tenaivainānapyetarhi brahmaṇā yajñe 'vabādhante

1.2.4.14

य उ एव यजमानायारातीयति

ya u eva yajamānāyārātīyati

1.2.4.14.2

यश्चैनं द्वेष्टि तमेवैतदेभिश्च लोकैरभिनिदधाति यद् उ चेमांल्लोकान् अति चतुर्थम् अस्या एव सर्वं हरत्य् अस्यां हीमे सर्वे लोकाः प्रतिष्ठिताः किं हि हरद् यद् अन्तरिक्षं हरामि दिवं हरामीति हरेत् तस्मादस्या एव सर्वं हरति

yaścainaṃ dveṣṭi tamevaitadebhiśca lokairabhinidadhāti yad u cemāṃllokān ati caturtham asyā eva sarvaṃ haraty asyāṃ hīme sarve lokāḥ pratiṣṭhitāḥ kiṃ hi harad yad antarikṣaṃ harāmi divaṃ harāmīti haret tasmādasyā eva sarvaṃ harati

1.2.4.15

अथ तृणमन्तर्धाय प्रहरति

atha tṛṇamantardhāya praharati

1.2.4.15.2

नेदनेन वज्रेण संशितेन पृथिवीं हिनसानीति तस्मात्तृणमन्तर्धाय प्रहरति

nedanena vajreṇa saṃśitena pṛthivīṃ hinasānīti tasmāttṛṇamantardhāya praharati

1.2.4.16

स प्रहरति

sa praharati

1.2.4.16.2

पृथिवि देवयजन्योषध्यास्ते मूलम् मा हिंसिषम् इत्य् उत्तरमूलामिव वा एनामेतत्करोत्य् आददानस् ताम् एतद् आहौषधीनां ते मूलानि मा हिंसिषमिति व्रजं गच्छ गोष्ठानम् इत्य् अभिनिधास्यन्नेवैतदनपक्रमि कुरुते तद्ध्यनपक्रमि यद्व्रजे ऽन्तस् तस्मादाह व्रजं गच्छ गोष्ठानमिति वर्षतु ते द्यौरिति यत्र वा अस्यै खनन्तः क्रूरीकुर्वन्त्य् अपघ्नन्ति शान्तिर् आपस् तदद्भिः शान्त्या शमयति तदद्भिः संदधाति तस्माद् आह वर्षतु ते द्यौर् इति बधान देव सवितः परमस्याम् पृथिव्याम् इति देवम् एवैतत् सवितारम् आहान्धे तमसि बधानेति यदाह परमस्याम् पृथिव्याम् इति शतेन पाशैर् इत्यमुचे तद् आह यो ऽस्मान् द्वेष्टि यं च वयं द्विष्मस् तम् अतो मा मौग् इति यदि नाभिचरेद् यद्य् उ अभिचरेद् अमुम् अतो मा मौग् इति ब्रूयात्

pṛthivi devayajanyoṣadhyāste mūlam mā hiṃsiṣam ity uttaramūlāmiva vā enāmetatkaroty ādadānas tām etad āhauṣadhīnāṃ te mūlāni mā hiṃsiṣamiti vrajaṃ gaccha goṣṭhānam ity abhinidhāsyannevaitadanapakrami kurute taddhyanapakrami yadvraje 'ntas tasmādāha vrajaṃ gaccha goṣṭhānamiti varṣatu te dyauriti yatra vā asyai khanantaḥ krūrīkurvanty apaghnanti śāntir āpas tadadbhiḥ śāntyā śamayati tadadbhiḥ saṃdadhāti tasmād āha varṣatu te dyaur iti badhāna deva savitaḥ paramasyām pṛthivyām iti devam evaitat savitāram āhāndhe tamasi badhāneti yadāha paramasyām pṛthivyām iti śatena pāśair ityamuce tad āha yo 'smān dveṣṭi yaṃ ca vayaṃ dviṣmas tam ato mā maug iti yadi nābhicared yady u abhicared amum ato mā maug iti brūyāt

1.2.4.17

अथ द्वितीयम् प्रहरति

atha dvitīyam praharati

1.2.4.17.2

अपाररुम् पृथिव्यै देवयजनाद् बध्यासम् इत्य् अररुर्ह वै नामासुररक्षसम् आस तं देवा अस्या अपाघ्नन्त तथो एवैनमेतदेषो ऽस्या अपहते व्रजं गच्छ गोष्ठानं वर्षतु ते द्यौर् बधान देव सवितः परमस्याम् पृथिव्यां शतेन पाशैर् यो ऽस्मान्द्वेष्टि यं च वयं द्विष्मस् तम् अतो मा मौगिति

apārarum pṛthivyai devayajanād badhyāsam ity ararurha vai nāmāsurarakṣasam āsa taṃ devā asyā apāghnanta tatho evainametadeṣo 'syā apahate vrajaṃ gaccha goṣṭhānaṃ varṣatu te dyaur badhāna deva savitaḥ paramasyām pṛthivyāṃ śatena pāśair yo 'smāndveṣṭi yaṃ ca vayaṃ dviṣmas tam ato mā maugiti

1.2.4.18

तमग्नीदभिनिदधाति

tamagnīdabhinidadhāti

1.2.4.18.2

अररो दिवम् मा पप्त इति यत्र वै देवा अररुम् असुररक्षसम् अपाघ्नत स दिवम् अपिपतिषत् तम् अग्निर् अभिन्यदधाद् अररो दिवम् मा पप्त इति स न दिवम् अपत् तथो एवैनम् एतद् अध्वर्युर् एवास्माल्लोकाद् अन्तरेति दिवो ऽध्यग्नीत् तस्मादेवं करोति

araro divam mā papta iti yatra vai devā ararum asurarakṣasam apāghnata sa divam apipatiṣat tam agnir abhinyadadhād araro divam mā papta iti sa na divam apat tatho evainam etad adhvaryur evāsmāllokād antareti divo 'dhyagnīt tasmādevaṃ karoti

1.2.4.19

अथ तृतीयम् प्रहरति

atha tṛtīyam praharati

1.2.4.19.2

द्रप्सस्ते द्याम् मा स्कन्नित्य् अयं वा अस्यै द्रप्सो यमस्या इमं रसं प्रजा उपजीवन्त्य् एष ते दिवम् मा पप्तद् इत्य् एवैतदाह व्रजं गच्छ गोष्ठानम् ...

drapsaste dyām mā skannity ayaṃ vā asyai drapso yamasyā imaṃ rasaṃ prajā upajīvanty eṣa te divam mā paptad ity evaitadāha vrajaṃ gaccha goṣṭhānam ...

Śatapathabrāhmaṇa