1.2.3.8.2

यदाप आनयत्यथ त्वग्भवति यदा संयौत्यथ मांसम् भवति संतत इव हि स तर्हि भवति संततमिव हि मांसं यदा शृतो ऽथास्थि भवति दारुण इव हि स तर्हि भवति दारुणमित्यस्थ्यथ यदुद्वासयिष्यन्नभिघारयति तम् मज्जानं दधात्य् एषो सा सम्पद्यदाहुः पाङ्क्तः पशुरिति

yadāpa ānayatyatha tvagbhavati yadā saṃyautyatha māṃsam bhavati saṃtata iva hi sa tarhi bhavati saṃtatamiva hi māṃsaṃ yadā śṛto 'thāsthi bhavati dāruṇa iva hi sa tarhi bhavati dāruṇamityasthyatha yadudvāsayiṣyannabhighārayati tam majjānaṃ dadhāty eṣo sā sampadyadāhuḥ pāṅktaḥ paśuriti

1.2.3.9

स यम् पुरुषमालभन्त

sa yam puruṣamālabhanta

1.2.3.9.2

स किम्पुरुषो ऽभवद् यावश्वं च गां च तौ गौरश्च गवयश्चाभवतां यमविमालभन्त स उष्ट्रो ऽभवद् यमजमालभन्त स शरभो ऽभवत् तस्मादेतेषाम् पशूनां नाशितव्यम् अपक्रान्तमेधा हैते पशवः

sa kimpuruṣo 'bhavad yāvaśvaṃ ca gāṃ ca tau gauraśca gavayaścābhavatāṃ yamavimālabhanta sa uṣṭro 'bhavad yamajamālabhanta sa śarabho 'bhavat tasmādeteṣām paśūnāṃ nāśitavyam apakrāntamedhā haite paśavaḥ

1.2.4.1

इन्द्रो ह यत्र वृत्राय वज्रम् प्रजहार

indro ha yatra vṛtrāya vajram prajahāra

1.2.4.1.2

स प्रहृतश्चतुर्धा ऽभवत् तस्य स्फ्यस्तृतीयं वा यावद्वा यूपस् तृतीयं वा यावद् वा रथस्तृतीयं वा यावद्वाथ यत्र प्राहरत् तच्छकलो ऽशीर्यत स पतित्वा शरो ऽभवत् तस्माच्छरो नाम यद् अशीर्यतैवम् उ स चतुर्धा वज्रो ऽभवत्

sa prahṛtaścaturdhā 'bhavat tasya sphyastṛtīyaṃ vā yāvadvā yūpas tṛtīyaṃ vā yāvad vā rathastṛtīyaṃ vā yāvadvātha yatra prāharat tacchakalo 'śīryata sa patitvā śaro 'bhavat tasmāccharo nāma yad aśīryataivam u sa caturdhā vajro 'bhavat

1.2.4.2

ततो द्वाभ्याम् ब्राह्मणा यज्ञे चरन्ति द्वाभ्यां राजन्यबन्धवः संव्याधे यूपेन च स्फ्येन च ब्राह्मणा रथेन च शरेण च राजन्यबन्धवः

tato dvābhyām brāhmaṇā yajñe caranti dvābhyāṃ rājanyabandhavaḥ saṃvyādhe yūpena ca sphyena ca brāhmaṇā rathena ca śareṇa ca rājanyabandhavaḥ

1.2.4.3

स यत् स्फ्यम् आदत्ते

sa yat sphyam ādatte

1.2.4.3.2

यथैव तदिन्द्रो वृत्राय वज्रम् उदयच्छद् एवमेवैष एतम् पाप्मने द्विषते भ्रातृव्याय वज्रम् उद्यच्छति तस्माद्वै स्फ्यमादत्ते

yathaiva tadindro vṛtrāya vajram udayacchad evamevaiṣa etam pāpmane dviṣate bhrātṛvyāya vajram udyacchati tasmādvai sphyamādatte

1.2.4.4

तमादत्ते

tamādatte

1.2.4.4.2

देवस्य त्वा सवितुः प्रसवे ऽश्विनोर्बाहुभ्याम् पूष्णो हस्ताभ्यामाददे ऽध्वरकृतं देवेभ्य इति सविता वै देवानाम् प्रसविता तत् सवितृप्रसूत एवैनमेतदादत्ते ऽश्विनोर्बाहुभ्याम् इत्य् अश्विनावध्वर्यू तत् तयोरेव बाहुभ्याम् आदत्ते न स्वाभ्यां वज्रो वा एष तस्य न मनुष्यो भर्ता तम् एताभिर् देवताभिर् आदत्ते

devasya tvā savituḥ prasave 'śvinorbāhubhyām pūṣṇo hastābhyāmādade 'dhvarakṛtaṃ devebhya iti savitā vai devānām prasavitā tat savitṛprasūta evainametadādatte 'śvinorbāhubhyām ity aśvināvadhvaryū tat tayoreva bāhubhyām ādatte na svābhyāṃ vajro vā eṣa tasya na manuṣyo bhartā tam etābhir devatābhir ādatte

1.2.4.5

आददे ऽध्वरकृतं देवेभ्य इति

ādade 'dhvarakṛtaṃ devebhya iti

1.2.4.5.2

अध्वरो वै यज्ञो यज्ञकृतं देवेभ्य इत्येवैतदाह तं सव्ये पाणौ कृत्वा दक्षिणेनाभिमृश्य जपति संश्यत्येवैनम् एतद् यज्जपति

adhvaro vai yajño yajñakṛtaṃ devebhya ityevaitadāha taṃ savye pāṇau kṛtvā dakṣiṇenābhimṛśya japati saṃśyatyevainam etad yajjapati

1.2.4.6

स जपति

sa japati

1.2.4.6.2

इन्द्रस्य बाहुरसि दक्षिण इत्य् एष वै वीर्यवत्तमो य इन्द्रस्य बाहुर्दक्षिणस् तस्माद् आहेन्द्रस्य बाहुर् असि दक्षिण इति सहस्रभृष्टिः शततेजा इति सहस्रभृष्टिर्वै स वज्र आसीच्छततेजा यं तं वृत्राय प्राहरत् तम् एवैतत् करोति

indrasya bāhurasi dakṣiṇa ity eṣa vai vīryavattamo ya indrasya bāhurdakṣiṇas tasmād āhendrasya bāhur asi dakṣiṇa iti sahasrabhṛṣṭiḥ śatatejā iti sahasrabhṛṣṭirvai sa vajra āsīcchatatejā yaṃ taṃ vṛtrāya prāharat tam evaitat karoti

1.2.4.7

वायुरसि तिग्मतेजा इति

vāyurasi tigmatejā iti

1.2.4.7.2

एतद्वै तेजिष्ठं तेजो यदयं यो ऽयम् पवत एष हीमांल्लोकांस्तिर्यङ्ङ् अनुपवते संश्यत्येवैनम् एतद् द्विषतो वध इति यदि नाभिचरेद् यद्य् उ अभिचरेद् अमुष्य वध इति ब्रूयात् तेन संशितेन नात्मानम् उपस्पृशति न पृथिवीं नेदनेन वज्रेण संशितेनात्मानं वा पृथिवीं वा हिनसानीति तस्मान् नात्मानम् उपस्पृशति न पृथिवीम्

etadvai tejiṣṭhaṃ tejo yadayaṃ yo 'yam pavata eṣa hīmāṃllokāṃstiryaṅṅ anupavate saṃśyatyevainam etad dviṣato vadha iti yadi nābhicared yady u abhicared amuṣya vadha iti brūyāt tena saṃśitena nātmānam upaspṛśati na pṛthivīṃ nedanena vajreṇa saṃśitenātmānaṃ vā pṛthivīṃ vā hinasānīti tasmān nātmānam upaspṛśati na pṛthivīm

1.2.4.8

देवाश्च वा असुराश्च

devāśca vā asurāśca

1.2.4.8.2

उभये प्राजापत्याः पस्पृधिरे ते ह स्म यद्देवा असुराञ्जयन्ति ततो ह स्मैवैनान् पुनर् उपोत्तिष्ठन्ति

ubhaye prājāpatyāḥ paspṛdhire te ha sma yaddevā asurāñjayanti tato ha smaivainān punar upottiṣṭhanti

1.2.4.9

ते ह देवा ऊचुः

te ha devā ūcuḥ

1.2.4.9.2

जयामो वा असुरांस् ततस्त्वेव नः पुनरुपोत्तिष्ठन्ति कथं न्वेनाननपजय्यं जयेमेति

jayāmo vā asurāṃs tatastveva naḥ punarupottiṣṭhanti kathaṃ nvenānanapajayyaṃ jayemeti

Śatapathabrāhmaṇa