5.4.3.14

मा न इन्द्र ते वयं तुराषाट्

mā na indra te vayaṃ turāṣāṭ

5.4.3.14.2

अयुक्तासो अब्रह्मता विदसाम

ayuktāso abrahmatā vidasāma

5.4.3.14.3

तिष्ठा रथमधि यं वज्रहस्ता रश्मीन्देव यमसे स्वश्वान् इत्य् उद्यच्छत्य् एवैतयाभीशवो वै रश्मयस्तस्मादाहा रश्मीन्देव यमसे स्वश्वानित्यथ रथविमोचनीयानि जुहोति प्रीतो रथो विमुच्याता इति तस्माद्रथविमोचनीयानि जुहोति

tiṣṭhā rathamadhi yaṃ vajrahastā raśmīndeva yamase svaśvān ity udyacchaty evaitayābhīśavo vai raśmayastasmādāhā raśmīndeva yamase svaśvānityatha rathavimocanīyāni juhoti prīto ratho vimucyātā iti tasmādrathavimocanīyāni juhoti

5.4.3.15

स जुहोति

sa juhoti

5.4.3.15.2

अग्नये गृहपतये स्वाहेति स यदेवाग्नेयं रथस्य तदेवैतेन प्रीणाति वहा वा आग्नेया रथस्य वहानेवैतेन प्रीणाति श्रीर्वै गार्हपतं यावतो यावत ईष्टे तच्छ्रियम् एवास्यैतद् गार्हपतं राज्यम् अभिविमुच्यते

agnaye gṛhapataye svāheti sa yadevāgneyaṃ rathasya tadevaitena prīṇāti vahā vā āgneyā rathasya vahānevaitena prīṇāti śrīrvai gārhapataṃ yāvato yāvata īṣṭe tacchriyam evāsyaitad gārhapataṃ rājyam abhivimucyate

5.4.3.16

सोमाय वनस्पतये स्वाहेति

somāya vanaspataye svāheti

5.4.3.16.2

द्वयानि वै वानस्पत्यानि चक्राणि रथ्यानि चानसानि च तेभ्यो न्वेवैतदुभयेभ्यो ऽरिष्टिं कुरुते सोमो वै वनस्पतिः स यदेव वानस्पत्यं रथस्य तदेवैतेन प्रीणाति दारूणि वै वानस्पत्यानि रथस्य दारूण्येवैतेन प्रीणाति क्षत्रं वै सोमः क्षत्रम् एवास्यैतद्राज्यम् अभिविमुच्यते

dvayāni vai vānaspatyāni cakrāṇi rathyāni cānasāni ca tebhyo nvevaitadubhayebhyo 'riṣṭiṃ kurute somo vai vanaspatiḥ sa yadeva vānaspatyaṃ rathasya tadevaitena prīṇāti dārūṇi vai vānaspatyāni rathasya dārūṇyevaitena prīṇāti kṣatraṃ vai somaḥ kṣatram evāsyaitadrājyam abhivimucyate

5.4.3.17

मरुतामोजसे स्वाहेति

marutāmojase svāheti

5.4.3.17.2

स यदेव मारुतं रथस्य तदेवैतेन प्रीणाति चत्वारो ऽश्वा रथः पञ्चमो द्वौ सव्यष्ठृसारथी ते सप्त सप्त सप्त व मारुतो गणः सर्वमेवैतेन रथम् प्रीणाति विशो वै मरुतो विशमेवास्यैतद् राज्यम्

sa yadeva mārutaṃ rathasya tadevaitena prīṇāti catvāro 'śvā rathaḥ pañcamo dvau savyaṣṭhṛsārathī te sapta sapta sapta va māruto gaṇaḥ sarvamevaitena ratham prīṇāti viśo vai maruto viśamevāsyaitad rājyam

5.4.3.18

इन्द्रस्येन्द्रियाय स्वाहेति

indrasyendriyāya svāheti

5.4.3.18.2

स यदेवैन्द्रं रथस्य तदेवैतेन प्रीणाति सव्यष्ठा वा ऐन्द्रो रथस्य सव्यष्ठारम् एवैतेन प्रीणातीन्द्रियं वै वीर्यमिन्द्र इन्द्रियमेवास्यैतद्वीर्यं राज्यम् अभिविमुच्यते

sa yadevaindraṃ rathasya tadevaitena prīṇāti savyaṣṭhā vā aindro rathasya savyaṣṭhāram evaitena prīṇātīndriyaṃ vai vīryamindra indriyamevāsyaitadvīryaṃ rājyam abhivimucyate

5.4.3.19

अथ वाराह्या उपानहा उपमुञ्चते

atha vārāhyā upānahā upamuñcate

5.4.3.19.2

अग्नौ ह वै देवा घृतकुम्भम् प्रवेशयांचक्रुस् ततो वराहः संबभूव तस्माद्वराहो मेदुरो घृताद्धि सम्भूतस् तस्माद्वराहे गावः संजानते स्वमेवैतद्रसमभिसंजानते तत् पशूनाम् एवैतद्रसे प्रतितिष्ठति तस्माद्वाराह्या उपानहा उपमुञ्चते

agnau ha vai devā ghṛtakumbham praveśayāṃcakrus tato varāhaḥ saṃbabhūva tasmādvarāho meduro ghṛtāddhi sambhūtas tasmādvarāhe gāvaḥ saṃjānate svamevaitadrasamabhisaṃjānate tat paśūnām evaitadrase pratitiṣṭhati tasmādvārāhyā upānahā upamuñcate

5.4.3.20

अथेमाम् प्रत्यवेक्षमाणो जपति

athemām pratyavekṣamāṇo japati

5.4.3.20.2

पृथिवि मातर्मा मा हिंसीर् मो अहं त्वामिति वरुणाद्ध वा अभिषिषिचानात् पृथिवी बिभयांचकार महद्वा अयमभूद्यो ऽभ्यषेचि यद्वै मायं नावदृणीयादिति वरुण उ ह पृथिव्यै बिभयांचकार यद्वै मेयं नावधून्वीतेति तदनयैवैतन्मित्रधेयमकुरुत न हि माता पुत्रं हिनस्ति न पुत्रो मातरम्

pṛthivi mātarmā mā hiṃsīr mo ahaṃ tvāmiti varuṇāddha vā abhiṣiṣicānāt pṛthivī bibhayāṃcakāra mahadvā ayamabhūdyo 'bhyaṣeci yadvai māyaṃ nāvadṛṇīyāditi varuṇa u ha pṛthivyai bibhayāṃcakāra yadvai meyaṃ nāvadhūnvīteti tadanayaivaitanmitradheyamakuruta na hi mātā putraṃ hinasti na putro mātaram

5.4.3.21

वरुणसवो वा एष यद्राजसूयम्

varuṇasavo vā eṣa yadrājasūyam

5.4.3.21.2

पृथिव्य् उ हैतस्माद्बिभेति महद्वा अयमभूद्यो ऽभ्यषेचि यद्वै मायं नावदृणीयादित्य् एष उ हास्यै बिभेति यद्वै मेयं नावधून्वीतेति तदनयैवैतन्मित्रधेयं कुरुते न हि माता पुत्रं हिनस्ति न पुत्रो मातरं तस्मादेवं जपति

pṛthivy u haitasmādbibheti mahadvā ayamabhūdyo 'bhyaṣeci yadvai māyaṃ nāvadṛṇīyādity eṣa u hāsyai bibheti yadvai meyaṃ nāvadhūnvīteti tadanayaivaitanmitradheyaṃ kurute na hi mātā putraṃ hinasti na putro mātaraṃ tasmādevaṃ japati

5.4.3.22

सो ऽवतिष्ठति

so 'vatiṣṭhati

5.4.3.22.2

हंसः शुचिषद्वसुरन्तरिक्षसद्धोता वेदिषदतिथिर्दुरोणसत्

haṃsaḥ śuciṣadvasurantarikṣasaddhotā vediṣadatithirduroṇasat

5.4.3.22.3

नृषद् वरसद् ऋतसद् व्योमसद् अब्जा गोजा ऋतजा अद्रिजा ऋतम् बृहद् इत्य् एतामतिछन्दसं जपन्न् एषा वै सर्वाणि छन्दांसि यदतिछन्दास् तथैनम् पाप्मा नान्ववतिष्ठति

nṛṣad varasad ṛtasad vyomasad abjā gojā ṛtajā adrijā ṛtam bṛhad ity etāmatichandasaṃ japann eṣā vai sarvāṇi chandāṃsi yadatichandās tathainam pāpmā nānvavatiṣṭhati

Śatapathabrāhmaṇa