5.2.2.19.2

उपहूतायाम् इडायाम् अप उपस्पृश्य माहेन्द्रं ग्रहं गृह्णाति माहेन्द्रं ग्रहं गृहीत्वा स्तोत्रम् उपाकरोति तं स्तोत्राय प्रमीवति स उपावरोहति सो ऽन्ते स्तोत्रस्य भवत्य् अन्ते शस्त्रस्य

upahūtāyām iḍāyām apa upaspṛśya māhendraṃ grahaṃ gṛhṇāti māhendraṃ grahaṃ gṛhītvā stotram upākaroti taṃ stotrāya pramīvati sa upāvarohati so 'nte stotrasya bhavaty ante śastrasya

5.2.2.20

तद्धैके

taddhaike

5.2.2.20.2

एतत् कृत्वाथैतत् कुर्वन्ति तद् उ तथा न कुर्याद् आत्मा वै स्तोत्रम् प्रजा शस्त्रम् एतस्माद्ध स यजमानम् प्रणाशयति स जिह्म एति स ह्वलति तस्माद् एतद् एव कृत्वाथैतत् कुर्यात्

etat kṛtvāthaitat kurvanti tad u tathā na kuryād ātmā vai stotram prajā śastram etasmāddha sa yajamānam praṇāśayati sa jihma eti sa hvalati tasmād etad eva kṛtvāthaitat kuryāt

5.2.2.21

अथेडाम् आदधाति

atheḍām ādadhāti

5.2.2.21.2

उपहूतायाम् इडायाम् अप उपस्पृश्य माहेन्द्रं ग्रहं गृह्णाति माहेन्द्रं ग्रहं गृहीत्वा स्तोत्रम् उपाकरोति तं स्तोत्राय प्रमीवति स उपावरोहति सो ऽन्ते स्तोत्रस्य भवत्यन्ते शस्त्रस्य

upahūtāyām iḍāyām apa upaspṛśya māhendraṃ grahaṃ gṛhṇāti māhendraṃ grahaṃ gṛhītvā stotram upākaroti taṃ stotrāya pramīvati sa upāvarohati so 'nte stotrasya bhavatyante śastrasya

5.2.3.1

पूर्णाहुतिं जुहोति

pūrṇāhutiṃ juhoti

5.2.3.1.2

सर्वं वै पूर्णं सर्वम् परिगृह्य सूया इति तस्यां वरं ददाति सर्वं वै वरः सर्वम् परिगृह्य सूया इति स यदि कामयेत जुहुयाद् एतां यद्य् उ कामयेतापि नाद्रियेत

sarvaṃ vai pūrṇaṃ sarvam parigṛhya sūyā iti tasyāṃ varaṃ dadāti sarvaṃ vai varaḥ sarvam parigṛhya sūyā iti sa yadi kāmayeta juhuyād etāṃ yady u kāmayetāpi nādriyeta

5.2.3.2

अथ श्वो भूते

atha śvo bhūte

5.2.3.2.2

अनुमत्यै हविर् अष्टाकपालम् पुरोडाशं निर्वपति स ये जघनेन शम्याम् पिष्यमाणानाम् अवशीयन्ते पिष्टानि वा तण्डुला वा तान्त् स्रुवे सार्धं संवपत्य् अन्वाहार्यपचनाद् उल्मुकम् आददते तेन दक्षिणा यन्ति स यत्र स्वकृतं वेरिणं विन्दति श्वभ्रप्रदरं वा

anumatyai havir aṣṭākapālam puroḍāśaṃ nirvapati sa ye jaghanena śamyām piṣyamāṇānām avaśīyante piṣṭāni vā taṇḍulā vā tānt sruve sārdhaṃ saṃvapaty anvāhāryapacanād ulmukam ādadate tena dakṣiṇā yanti sa yatra svakṛtaṃ veriṇaṃ vindati śvabhrapradaraṃ vā

5.2.3.3

तद् अग्निं समाधाय जुहोति

tad agniṃ samādhāya juhoti

5.2.3.3.2

एष ते निरृते भागस् तं जुषस्व स्वाहेतीयं वै निरृतिः सा यम् पाप्मना गृह्णाति तं निरृत्या गृह्णाति तद् यद् एवास्या अत्र नैरृतं रूपं तद् एवैतच्छमयति तथो हैनं सूयमानं निरृतिर्न गृह्णात्य् अथ यत् स्वकृते वेरिणे जुहोति श्वभ्रप्रदरे वैतद् उ ह्यस्यै निरृतिगृहीतम्

eṣa te nirṛte bhāgas taṃ juṣasva svāhetīyaṃ vai nirṛtiḥ sā yam pāpmanā gṛhṇāti taṃ nirṛtyā gṛhṇāti tad yad evāsyā atra nairṛtaṃ rūpaṃ tad evaitacchamayati tatho hainaṃ sūyamānaṃ nirṛtirna gṛhṇāty atha yat svakṛte veriṇe juhoti śvabhrapradare vaitad u hyasyai nirṛtigṛhītam

5.2.3.4

अथाप्रतीक्षम् पुनर् आयन्ति

athāpratīkṣam punar āyanti

5.2.3.4.2

अथानुमत्या अष्टाकपालेन पुरोडाशेन प्रचरतीयं वा अनुमतिः स यस् तत् कर्म शक्नोति कर्तुं यच्चिकीर्षतीयं हास्मै तद् अनुमन्यते तद् इमाम् एवैतत् प्रीणात्य् अनयानुमत्यानुमतः सूया इति

athānumatyā aṣṭākapālena puroḍāśena pracaratīyaṃ vā anumatiḥ sa yas tat karma śaknoti kartuṃ yaccikīrṣatīyaṃ hāsmai tad anumanyate tad imām evaitat prīṇāty anayānumatyānumataḥ sūyā iti

5.2.3.5

अथ यद् अष्टाकपालो भवति

atha yad aṣṭākapālo bhavati

5.2.3.5.2

अष्टाक्षरा वै गायत्री गायत्री वा इयम् पृथिव्य् अथ यत् समानस्य हविष उभयत्र जुहोत्य् एषा ह्येवैतद् उभयं तस्य वासो दक्षिणा यद् वै सवासा अरण्यं नोदाशंसते निधाय वै तद् वासो ऽतिमुच्यते तथो हैनं सूयमानम् आसङ्गो न विन्दति

aṣṭākṣarā vai gāyatrī gāyatrī vā iyam pṛthivy atha yat samānasya haviṣa ubhayatra juhoty eṣā hyevaitad ubhayaṃ tasya vāso dakṣiṇā yad vai savāsā araṇyaṃ nodāśaṃsate nidhāya vai tad vāso 'timucyate tatho hainaṃ sūyamānam āsaṅgo na vindati

5.2.3.6

अथ श्वो भूते

atha śvo bhūte

5.2.3.6.2

आग्नावैष्णवम् एकादशकपालम् पुरोडाशं निर्वपति तेन यथेष्ट्यैवं यजते तद् यद् एवादः प्रजातम् आग्नावैष्णवं दीक्षणीयं हविस् तद् एवैतद् अग्निर् वै सर्वा देवता अग्नौ हि सर्वाभ्यो देवताभ्यो जुह्वत्य् अग्निर् वै यज्ञस्यावरार्ध्यो विष्णुः परार्ध्यस् तत् सर्वाश् चैवैतद् देवताः परिगृह्य सर्वं च यज्ञम् परिगृह्य सूया इति तस्माद् आग्नावैष्णव एकादशकपालः पुरोडाशो भवति तस्य हिरण्यं दक्षिणाग्नेयो वा एष यज्ञो भवत्य् अग्ने रेतो हिरण्यं यो वै विष्णुः स यज्ञो ऽग्निर् उ वै यज्ञ एव तद् उ तद् आग्नेयमेव तस्माद्धिरण्यं दक्षिणा

āgnāvaiṣṇavam ekādaśakapālam puroḍāśaṃ nirvapati tena yatheṣṭyaivaṃ yajate tad yad evādaḥ prajātam āgnāvaiṣṇavaṃ dīkṣaṇīyaṃ havis tad evaitad agnir vai sarvā devatā agnau hi sarvābhyo devatābhyo juhvaty agnir vai yajñasyāvarārdhyo viṣṇuḥ parārdhyas tat sarvāś caivaitad devatāḥ parigṛhya sarvaṃ ca yajñam parigṛhya sūyā iti tasmād āgnāvaiṣṇava ekādaśakapālaḥ puroḍāśo bhavati tasya hiraṇyaṃ dakṣiṇāgneyo vā eṣa yajño bhavaty agne reto hiraṇyaṃ yo vai viṣṇuḥ sa yajño 'gnir u vai yajña eva tad u tad āgneyameva tasmāddhiraṇyaṃ dakṣiṇā

5.2.3.7

अथ श्वो भूते

atha śvo bhūte

5.2.3.7.2

अग्नीषोमीयम् एकादशकपालम् पुरोडाशं निर्वपति तेन यथेष्ट्यैवं यजत एतेन वा इन्द्रो वृत्रम् अहन्न् एतेनो एव व्यजयत यास्येयं विजितिस् तां तथो एवैष एतेन पाप्मानं द्विषन्तम् भ्रातृव्यं हन्ति तथो एव विजयते विजिते ऽभये ऽनाष्ट्रे सूया इति तस्माद् अग्नीषोमीय एकादशकपालः पुरोडाशो भवति तस्योत्सृष्टो गौर् दक्षिणोत्सर्जं वा अमुं चन्द्रमसं घ्नन्ति पौर्णमासेनाह घ्नन्त्य् आमावास्येनोत्सृजन्ति तस्माद् उत्सृष्टो गौर् दक्षिणा

agnīṣomīyam ekādaśakapālam puroḍāśaṃ nirvapati tena yatheṣṭyaivaṃ yajata etena vā indro vṛtram ahann eteno eva vyajayata yāsyeyaṃ vijitis tāṃ tatho evaiṣa etena pāpmānaṃ dviṣantam bhrātṛvyaṃ hanti tatho eva vijayate vijite 'bhaye 'nāṣṭre sūyā iti tasmād agnīṣomīya ekādaśakapālaḥ puroḍāśo bhavati tasyotsṛṣṭo gaur dakṣiṇotsarjaṃ vā amuṃ candramasaṃ ghnanti paurṇamāsenāha ghnanty āmāvāsyenotsṛjanti tasmād utsṛṣṭo gaur dakṣiṇā

5.2.3.8

अथ श्वो भूते

atha śvo bhūte

Śatapathabrāhmaṇa