5.2.2.9.2

इन्द्रं दानाय चोदय वाचं विष्णुं सरस्वतीं सवितारं च वाजिनं स्वाहा

indraṃ dānāya codaya vācaṃ viṣṇuṃ sarasvatīṃ savitāraṃ ca vājinaṃ svāhā

5.2.2.10

अग्ने अच्छा

agne acchā

5.2.2.10.2

वदेह नः प्रति नः सुमना भव प्र नो यच्छ सहस्रजित् त्वं हि धनदा असि स्वाहा

vadeha naḥ prati naḥ sumanā bhava pra no yaccha sahasrajit tvaṃ hi dhanadā asi svāhā

5.2.2.11

प्र नः

pra naḥ

5.2.2.11.2

यच्छत्व् अर्यमा प्र पूषा प्र बृहस्पतिः प्र वाग् देवी ददातु नः स्वाहेति

yacchatv aryamā pra pūṣā pra bṛhaspatiḥ pra vāg devī dadātu naḥ svāheti

5.2.2.12

अथैनम् परिशिष्टेनाभिषिञ्चति

athainam pariśiṣṭenābhiṣiñcati

5.2.2.12.2

अन्नाद्येनैवैनम् एतद् अभिषिञ्चत्य् अन्नाद्यम् एवास्मिन्न् एतद् दधाति तस्माद् एनम् परिशिष्टेनाभिषिञ्चति

annādyenaivainam etad abhiṣiñcaty annādyam evāsminn etad dadhāti tasmād enam pariśiṣṭenābhiṣiñcati

5.2.2.13

सो ऽभिषिञ्चति

so 'bhiṣiñcati

5.2.2.13.2

देवस्य त्वा सवितुः प्रसवे ऽश्विनोर् बाहुभ्याम् पूष्णो हस्ताभ्यामिति देवहस्तैर् एवैनम् एतद् अभिषिञ्चति सरस्वत्यै वाचो यन्तुर्यन्त्रिये दधामीति वाग् वै सरस्वती तद् एनं वाच एव यन्तुर्यन्त्रिये दधाति

devasya tvā savituḥ prasave 'śvinor bāhubhyām pūṣṇo hastābhyāmiti devahastair evainam etad abhiṣiñcati sarasvatyai vāco yanturyantriye dadhāmīti vāg vai sarasvatī tad enaṃ vāca eva yanturyantriye dadhāti

5.2.2.14

तद् उ हैक आहुः

tad u haika āhuḥ

5.2.2.14.2

विश्वेषां त्वा देवानां यन्तुर् यन्त्रिये दधामीति सर्वं वै विश्वे देवास् तद् एनं सर्वस्यैव यन्तुर्यन्त्रिये दधाति तद् उ तथा न ब्रूयात् सरस्वत्यै त्वा वाचो यन्तुर्यन्त्रिये दधामीत्य् एव ब्रूयाद् वाग् वै सरस्वती तद् एनं वाच एव यन्तुर्यन्त्रिये दधाति बृहस्पतेष्ट्वा साम्राज्येनाभिषिञ्चाम्य् असाव् इति नाम गृह्णाति तद् बृहस्पतेर् एवैनम् एतत् सायुज्यं सलोकतां गमयति

viśveṣāṃ tvā devānāṃ yantur yantriye dadhāmīti sarvaṃ vai viśve devās tad enaṃ sarvasyaiva yanturyantriye dadhāti tad u tathā na brūyāt sarasvatyai tvā vāco yanturyantriye dadhāmīty eva brūyād vāg vai sarasvatī tad enaṃ vāca eva yanturyantriye dadhāti bṛhaspateṣṭvā sāmrājyenābhiṣiñcāmy asāv iti nāma gṛhṇāti tad bṛhaspater evainam etat sāyujyaṃ salokatāṃ gamayati

5.2.2.15

अथाह

athāha

5.2.2.15.2

सम्राड् अयम् असौ सम्राड् अयम् असाविति निवेदितम् एवैनम् एतत् सन्तं देवेभ्यो निवेदयत्य् अयम् महावीर्यो यो ऽभ्यषेचीत्ययं युष्माकैको ऽभूत् तं गोपायतेत्य् एवैतद् आह त्रिष्कृत्व आह त्रिवृद्धि यज्ञः

samrāḍ ayam asau samrāḍ ayam asāviti niveditam evainam etat santaṃ devebhyo nivedayaty ayam mahāvīryo yo 'bhyaṣecītyayaṃ yuṣmākaiko 'bhūt taṃ gopāyatety evaitad āha triṣkṛtva āha trivṛddhi yajñaḥ

5.2.2.16

अथोज्जितीः

athojjitīḥ

5.2.2.16.2

जुहोति वा वाचयति वा यदि जुहोति यदि वाचयति समान एव बन्धुः

juhoti vā vācayati vā yadi juhoti yadi vācayati samāna eva bandhuḥ

5.2.2.17

स वाचयति

sa vācayati

5.2.2.17.2

अग्निर् एकाक्षरेण प्राणम् उदजयत् तम् उज्जेषं प्रजापतिः सप्तदशाक्षरेण सप्तदशं स्तोमम् उदजयत् तम् उज्जेषमिति तद् यद् एवैताभिर् एता देवता उदजयंस् तद् एवैष एताभिर् उज्जयति सप्तदश भवन्ति सप्तदशो वै प्रजापतिस् तत् प्रजापतिम् उज्जयति

agnir ekākṣareṇa prāṇam udajayat tam ujjeṣaṃ prajāpatiḥ saptadaśākṣareṇa saptadaśaṃ stomam udajayat tam ujjeṣamiti tad yad evaitābhir etā devatā udajayaṃs tad evaiṣa etābhir ujjayati saptadaśa bhavanti saptadaśo vai prajāpatis tat prajāpatim ujjayati

5.2.2.18

अथाहाग्नये स्विष्टकृते ऽनुब्रूहीति

athāhāgnaye sviṣṭakṛte 'nubrūhīti

5.2.2.18.2

तद् यद् अन्तरेणाहुती एतत् कर्म क्रियत एष वै प्रजापतिर् य एष यज्ञस् तायते यस्मादिमाः प्रजाः प्रजाता एतम् व् एवाप्य् एतर्ह्यनु प्रजायन्ते तन्मध्यत एवैतत् प्रजापतिम् उज्जयति तस्माद् अन्तरेणाहुती एतत् कर्म क्रियत आश्राव्याहाग्निं स्विष्टकृतं यजेति वषट्कृते जुहोति

tad yad antareṇāhutī etat karma kriyata eṣa vai prajāpatir ya eṣa yajñas tāyate yasmādimāḥ prajāḥ prajātā etam v evāpy etarhyanu prajāyante tanmadhyata evaitat prajāpatim ujjayati tasmād antareṇāhutī etat karma kriyata āśrāvyāhāgniṃ sviṣṭakṛtaṃ yajeti vaṣaṭkṛte juhoti

5.2.2.19

अथेडाम् आदधाति

atheḍām ādadhāti

Śatapathabrāhmaṇa