1.2.1.18.2

धान्यमसि धिनुहि देवानिति धान्यं हि देवान् धिनवद् इत्य् उ हि हविर्गृह्यते

dhānyamasi dhinuhi devāniti dhānyaṃ hi devān dhinavad ity u hi havirgṛhyate

1.2.1.19

अथ पिनष्टि

atha pinaṣṭi

1.2.1.19.2

प्राणाय त्वोदानाय त्वा व्यानाय त्वा दीर्घामनु प्रसितिमायुषे धामिति प्रोहति देवो वः सविता हिरण्यपाणिः प्रतिगृभ्णात्वछिद्रेण पाणिना चक्षुषे त्वेति

prāṇāya tvodānāya tvā vyānāya tvā dīrghāmanu prasitimāyuṣe dhāmiti prohati devo vaḥ savitā hiraṇyapāṇiḥ pratigṛbhṇātvachidreṇa pāṇinā cakṣuṣe tveti

1.2.1.20

तद्यदेवम् पिनष्टि

tadyadevam pinaṣṭi

1.2.1.20.2

जीवं वै देवानां हविर् अमृतम् अमृतानाम् अथैतद् उलूखलमुसलाभ्यां दृषदुपलाभ्यां हविर्यज्ञं घ्नन्ति

jīvaṃ vai devānāṃ havir amṛtam amṛtānām athaitad ulūkhalamusalābhyāṃ dṛṣadupalābhyāṃ haviryajñaṃ ghnanti

1.2.1.21

तस्मादेवं स यदाह

tasmādevaṃ sa yadāha

1.2.1.21.2

प्राणाय त्वोदानाय त्वेति तत्प्राणोदानौ दधाति व्यानाय त्वेति तद्व्यानं दधाति दीर्घामनु प्रसितिमायुषे धामिति तदायुर्दधाति देवो वः सविता हिरण्यपाणिः प्रतिगृभ्णात्वछिद्रेण पाणिना सुप्रतिगृहीतान्यसन्निति चक्षुषे त्वेति तच्चक्षुर्दधात्येतानि वै जीवतो भवन्त्य् एवम् उ हैतज्जीवमेव देवानां हविर् भवत्य् अमृतम् अमृतानां पिनष्टि पिंषन्ति पिष्टान्यभीन्धते कपालानि

prāṇāya tvodānāya tveti tatprāṇodānau dadhāti vyānāya tveti tadvyānaṃ dadhāti dīrghāmanu prasitimāyuṣe dhāmiti tadāyurdadhāti devo vaḥ savitā hiraṇyapāṇiḥ pratigṛbhṇātvachidreṇa pāṇinā supratigṛhītānyasanniti cakṣuṣe tveti taccakṣurdadhātyetāni vai jīvato bhavanty evam u haitajjīvameva devānāṃ havir bhavaty amṛtam amṛtānāṃ pinaṣṭi piṃṣanti piṣṭānyabhīndhate kapālāni

1.2.1.22

अथैक आज्यं निर्वपति

athaika ājyaṃ nirvapati

1.2.1.22.2

यद्वा आदिष्टं देवतायै हविर्गृह्यते यावद्देवत्यं तद्भवति तदितरेण यजुषा गृह्णाति न वा एतत्कस्यै चन देवतायै हविर्गृह्णन्नादिशति यदाज्यं तस्मादनिरुक्तेन यजुषा गृह्णाति महीनाम् पयो ऽसीति मह्य इति ह वा एतासामेके नाम यद्गवां तासां वा एतत्पयो भवति तस्मादाह महीनाम् पयो ऽसीति

yadvā ādiṣṭaṃ devatāyai havirgṛhyate yāvaddevatyaṃ tadbhavati taditareṇa yajuṣā gṛhṇāti na vā etatkasyai cana devatāyai havirgṛhṇannādiśati yadājyaṃ tasmādaniruktena yajuṣā gṛhṇāti mahīnām payo 'sīti mahya iti ha vā etāsāmeke nāma yadgavāṃ tāsāṃ vā etatpayo bhavati tasmādāha mahīnām payo 'sīti

1.2.2.1

पवित्रवति संवपति

pavitravati saṃvapati

1.2.2.1.2

पात्र्याम् पवित्रे अवधाय देवस्य त्वा सवितुः प्रसवे ऽश्विनोर् बाहुभ्याम् पूष्णो हस्ताभ्यां संवपामीति सो ऽसावेवैतस्य यजुषो बन्धुः

pātryām pavitre avadhāya devasya tvā savituḥ prasave 'śvinor bāhubhyām pūṣṇo hastābhyāṃ saṃvapāmīti so 'sāvevaitasya yajuṣo bandhuḥ

1.2.2.2

अथान्तर्वेद्युपविशति

athāntarvedyupaviśati

1.2.2.2.2

अथैक उपसर्जनीभिरैति ता आनयति ताः पवित्राभ्याम् प्रतिगृह्णाति सम् आप ओषधीभिरिति सं ह्येतद् आप ओषधीभिरेताभिः पिष्टाभिः संगच्छन्ते समोषधयो रसेनेति सं ह्येतद् ओषधयो रसेनैताः पिष्टा अद्भिः संगच्छन्त आपो ह्येतासां रसः सं रेवतीर्जगतीभिः पृच्यन्ताम् इति रेवत्य आपो जगत्य ओषधयस् ता उ ह्येतद् उभय्यः संपृच्यन्ते सं मधुमतीर् मधुमतीभिः पृच्यन्ताम् इति सं रसवन्त्यो रसवतीभिः पृच्यन्ताम् इत्येवैतद्

athaika upasarjanībhiraiti tā ānayati tāḥ pavitrābhyām pratigṛhṇāti sam āpa oṣadhībhiriti saṃ hyetad āpa oṣadhībhiretābhiḥ piṣṭābhiḥ saṃgacchante samoṣadhayo raseneti saṃ hyetad oṣadhayo rasenaitāḥ piṣṭā adbhiḥ saṃgacchanta āpo hyetāsāṃ rasaḥ saṃ revatīrjagatībhiḥ pṛcyantām iti revatya āpo jagatya oṣadhayas tā u hyetad ubhayyaḥ saṃpṛcyante saṃ madhumatīr madhumatībhiḥ pṛcyantām iti saṃ rasavantyo rasavatībhiḥ pṛcyantām ityevaitad

1.2.2.3

अथ संयौति

atha saṃyauti

1.2.2.3.2

जनयत्यै त्वा संयौमीति यथा वा अधिवृक्तो ऽग्नेर् अधि जायेतैवं वै तत् संयौति

janayatyai tvā saṃyaumīti yathā vā adhivṛkto 'gner adhi jāyetaivaṃ vai tat saṃyauti

1.2.2.4

अथ द्वेधा करोति

atha dvedhā karoti

1.2.2.4.2

यदि द्वे हविषी भवतः पौर्णमास्यां वै द्वे हविषी भवतः स यत्र पुनर्न संहविष्यंत् स्यात् तद् अभिमृशतीदम् अग्नेर् इदम् अग्नीषोमयोर् इति नाना वा एतदग्रे हविर्गृह्णन्ति तत्सहावघ्नन्ति तत्सह पिंषन्ति तत्पुनर्नाना करोति तस्मादेवम् अभिमृशत्य् अधिवृणक्त्य् एवैष पुरोडाशम् अधिश्रयत्यसावाज्यम्

yadi dve haviṣī bhavataḥ paurṇamāsyāṃ vai dve haviṣī bhavataḥ sa yatra punarna saṃhaviṣyaṃt syāt tad abhimṛśatīdam agner idam agnīṣomayor iti nānā vā etadagre havirgṛhṇanti tatsahāvaghnanti tatsaha piṃṣanti tatpunarnānā karoti tasmādevam abhimṛśaty adhivṛṇakty evaiṣa puroḍāśam adhiśrayatyasāvājyam

1.2.2.5

तद्वा एतत्

tadvā etat

1.2.2.5.2

उभयं सह क्रियते तद्यदेतदुभयं सह क्रियते ऽर्धो ह वा एष आत्मनो यज्ञस्य यद् आज्यम् अर्धो यदिह हविर्भवति स यश्चासावर्धो य उ चायमर्धस्ता उभावग्निं गमयावेति तस्माद्वा एतदुभयं सह क्रियत एवम् उ हैष आत्मा यज्ञस्य संधीयते

ubhayaṃ saha kriyate tadyadetadubhayaṃ saha kriyate 'rdho ha vā eṣa ātmano yajñasya yad ājyam ardho yadiha havirbhavati sa yaścāsāvardho ya u cāyamardhastā ubhāvagniṃ gamayāveti tasmādvā etadubhayaṃ saha kriyata evam u haiṣa ātmā yajñasya saṃdhīyate

1.2.2.6

सो ऽसावाज्यमधिश्रयति

so 'sāvājyamadhiśrayati

Śatapathabrāhmaṇa