5.1.2.10

अथ सप्तदश सोमग्रहान्गृह्णाति

atha saptadaśa somagrahāngṛhṇāti

5.1.2.10.2

सप्तदश सुराग्रहान् प्रजापतेर्वा एते अन्धसी यत्सोमश्च सुरा च ततः सत्यं श्रीर्ज्योतिः सोमो ऽनृतम् पाप्मा तमः सुरैते एवैतद् उभे अन्धसी उज्जयति सर्वं वा एष इदमुज्जयति यो वाजपेयेन यजते प्रजापतिं ह्युज्जयति सर्वम् उ ह्येवेदम् प्रजापतिः

saptadaśa surāgrahān prajāpatervā ete andhasī yatsomaśca surā ca tataḥ satyaṃ śrīrjyotiḥ somo 'nṛtam pāpmā tamaḥ suraite evaitad ubhe andhasī ujjayati sarvaṃ vā eṣa idamujjayati yo vājapeyena yajate prajāpatiṃ hyujjayati sarvam u hyevedam prajāpatiḥ

5.1.2.11

स यत्सप्तदश

sa yatsaptadaśa

5.1.2.11.2

सोमग्रहान्गृह्णाति सप्तदशो वै प्रजापतिः प्रजापतिर्यज्ञः स यावान् एव यज्ञो यावत्य् अस्य मात्रा तावतैवास्यैतत् सत्यं श्रियं ज्योतिरुज्जयति

somagrahāngṛhṇāti saptadaśo vai prajāpatiḥ prajāpatiryajñaḥ sa yāvān eva yajño yāvaty asya mātrā tāvataivāsyaitat satyaṃ śriyaṃ jyotirujjayati

5.1.2.12

अथ यत्सप्तदश

atha yatsaptadaśa

5.1.2.12.2

सुराग्रहान्गृह्णाति सप्तदशो वै प्रजापतिः प्रजापतिर् यज्ञः स यावानेव यज्ञो यावत्य् अस्य मात्रा तावतैवास्यैतद् अनृतम् पाप्मानं तम उज्जयति

surāgrahāngṛhṇāti saptadaśo vai prajāpatiḥ prajāpatir yajñaḥ sa yāvāneva yajño yāvaty asya mātrā tāvataivāsyaitad anṛtam pāpmānaṃ tama ujjayati

5.1.2.13

त उभये चतुस्त्रिंशद्ग्रहाः सम्पद्यन्ते

ta ubhaye catustriṃśadgrahāḥ sampadyante

5.1.2.13.2

त्रयस्त्रिंशद्वै देवाः प्रजापतिश् चतुस्त्रिंशस् तत् प्रजापतिमुज्जयति

trayastriṃśadvai devāḥ prajāpatiś catustriṃśas tat prajāpatimujjayati

5.1.2.14

अथ यत्र राजानं क्रीणाति

atha yatra rājānaṃ krīṇāti

5.1.2.14.2

तद्दक्षिणतः प्रतिवेशतः केशवात् पुरुषात् सीसेन परिस्रुतं क्रीणाति न वा एष स्त्री न पुमान् यत् केशवः पुरुषो यदह पुमांस् तेन न स्त्री यद् उ केशवस्तेन न पुमान् नैतद् अयो न हिरण्यं यत् सीसं नैष सोमो न सुरा यत् परिस्रुत् तस्मात्केशवात् पुरुषात् सीसेन परिस्रुतं क्रीणाति

taddakṣiṇataḥ prativeśataḥ keśavāt puruṣāt sīsena parisrutaṃ krīṇāti na vā eṣa strī na pumān yat keśavaḥ puruṣo yadaha pumāṃs tena na strī yad u keśavastena na pumān naitad ayo na hiraṇyaṃ yat sīsaṃ naiṣa somo na surā yat parisrut tasmātkeśavāt puruṣāt sīsena parisrutaṃ krīṇāti

5.1.2.15

अथ पूर्वेद्युः

atha pūrvedyuḥ

5.1.2.15.2

द्वौ खरौ कुर्वन्ति पुरो ऽक्षमेवान्यम् पश्चादक्षमन्यं नेत् सोमग्रहांश्च सुराग्रहांश्च सह सादयामेति तस्मात् पूर्वेद्युर् द्वौ खरौ कुर्वन्ति पुरो ऽक्षमेवान्यम् पश्चादक्षमन्यम्

dvau kharau kurvanti puro 'kṣamevānyam paścādakṣamanyaṃ net somagrahāṃśca surāgrahāṃśca saha sādayāmeti tasmāt pūrvedyur dvau kharau kurvanti puro 'kṣamevānyam paścādakṣamanyam

5.1.2.16

अथ यत्र पूर्वया द्वारा

atha yatra pūrvayā dvārā

5.1.2.16.2

वसतीवरीः प्रपादयन्ति तद् अपरया द्वारा नेष्टा परिस्रुतम् प्रपादयति दक्षिणतः पात्राण्यभ्यवहरन्ति पुरोऽक्षमेव प्रत्यङ्ङासीनो ऽध्वर्युः सोमग्रहान्गृह्णाति पश्चादक्षम् प्राङासीनो नेष्टा सुराग्रहान्त् सोमग्रहम् एवाध्वर्युर्गृह्णाति सुराग्रहं नेष्टा सोमग्रहमेवाध्वर्युर् गृह्णाति सुराग्रहं नेष्टैवम् एवैनान् व्यत्यासं गृह्णीतः

vasatīvarīḥ prapādayanti tad aparayā dvārā neṣṭā parisrutam prapādayati dakṣiṇataḥ pātrāṇyabhyavaharanti puro'kṣameva pratyaṅṅāsīno 'dhvaryuḥ somagrahāngṛhṇāti paścādakṣam prāṅāsīno neṣṭā surāgrahānt somagraham evādhvaryurgṛhṇāti surāgrahaṃ neṣṭā somagrahamevādhvaryur gṛhṇāti surāgrahaṃ neṣṭaivam evainān vyatyāsaṃ gṛhṇītaḥ

5.1.2.17

न प्रत्यञ्चम् अक्षम् अध्वर्युः

na pratyañcam akṣam adhvaryuḥ

5.1.2.17.2

सोमग्रहमतिहरति न प्राञ्चमक्षं नेष्टा सुराग्रहं नेज्ज्योतिश्च तमश्च संसृजावेति

somagrahamatiharati na prāñcamakṣaṃ neṣṭā surāgrahaṃ nejjyotiśca tamaśca saṃsṛjāveti

5.1.2.18

उपर्युपर्येवाक्षम् अध्वर्युः

uparyuparyevākṣam adhvaryuḥ

5.1.2.18.2

सोमग्रहं धारयत्य् अधो ऽधो ऽक्षं नेष्टा सुराग्रहं सम्पृचौ स्थः सम् मा भद्रेण पृङ्क्तम् इति नेत् पापमिति ब्रवावेति तौ पुनर् विहरतो विपृचौ स्थो वि मा पाप्मना पृङ्क्तमिति तद् यथेषीकाम् मुञ्जाद् विवृहेद् एवमेनं सर्वस्मात्पाप्मनो विवृहतस् तस्मिन्न तावच्चनैनो भवति यावत्तृणस्याग्रं तौ सादयतः

somagrahaṃ dhārayaty adho 'dho 'kṣaṃ neṣṭā surāgrahaṃ sampṛcau sthaḥ sam mā bhadreṇa pṛṅktam iti net pāpamiti bravāveti tau punar viharato vipṛcau stho vi mā pāpmanā pṛṅktamiti tad yatheṣīkām muñjād vivṛhed evamenaṃ sarvasmātpāpmano vivṛhatas tasminna tāvaccanaino bhavati yāvattṛṇasyāgraṃ tau sādayataḥ

5.1.2.19

अथाध्वर्युः

athādhvaryuḥ

5.1.2.19.2

हिरण्यपात्रेण मधुग्रहं गृह्णाति तम् मध्ये सोमग्रहाणां सादयत्य् अथोक्थ्यं गृह्णात्यथ ध्रुवम् अथैतान्त् सोमग्रहान् उत्तमे स्तोत्र ऋत्विजां चमसेषु व्यवनीय जुह्वति तान्भक्षयन्त्य् अथ माध्यन्दिने सवने मधुग्रहस्य च सुराग्रहाणां चोद्यते तस्यातः

hiraṇyapātreṇa madhugrahaṃ gṛhṇāti tam madhye somagrahāṇāṃ sādayaty athokthyaṃ gṛhṇātyatha dhruvam athaitānt somagrahān uttame stotra ṛtvijāṃ camaseṣu vyavanīya juhvati tānbhakṣayanty atha mādhyandine savane madhugrahasya ca surāgrahāṇāṃ codyate tasyātaḥ

Śatapathabrāhmaṇa