5.1.1.14.2

स इदं सर्वं संवृङ्क्ते स कर्मणः कर्मणः पुरस्तादेतां सावित्रीमाहुतिं जुहोति देव सवितः प्रसुव यज्ञम् प्रसुव यज्ञपतिम् भगायेति

sa idaṃ sarvaṃ saṃvṛṅkte sa karmaṇaḥ karmaṇaḥ purastādetāṃ sāvitrīmāhutiṃ juhoti deva savitaḥ prasuva yajñam prasuva yajñapatim bhagāyeti

5.1.1.15

तद्यथैवादो बृहस्पतिः

tadyathaivādo bṛhaspatiḥ

5.1.1.15.2

सवितारम् प्रसवायोपाधावत्सविता वै देवानाम् प्रसवितेदम् मे प्रसुव त्वत्प्रसूत इदमुज्जयानीति तदस्मै सविता प्रसविता प्रासुवत् तत् सवितृप्रसूत उदजयद् एवमेवैष एतत् सवितारमेव प्रसवायोपधावति सविता वै देवानाम् प्रसवितेदम् मे प्रसुव त्वत्प्रसूत इदमुज्जयानीति तद् अस्मै सविता प्रसविता प्रसौति तत्सवितृप्रसूत उज्जयति

savitāram prasavāyopādhāvatsavitā vai devānām prasavitedam me prasuva tvatprasūta idamujjayānīti tadasmai savitā prasavitā prāsuvat tat savitṛprasūta udajayad evamevaiṣa etat savitārameva prasavāyopadhāvati savitā vai devānām prasavitedam me prasuva tvatprasūta idamujjayānīti tad asmai savitā prasavitā prasauti tatsavitṛprasūta ujjayati

5.1.1.16

तस्मादाह

tasmādāha

5.1.1.16.2

देव सवितः प्रसुव यज्ञम् प्रसुव यज्ञपतिम् भगाय दिव्यो गन्धर्वः केतपूः केतं नः पुनातु वाचस्पतिर् वाजं नः स्वदतु स्वाहेति प्रजापतिर्वै वाचस्पतिर् अन्नं वाजः प्रजापतिर्न इदमद्यान्नं स्वदत्व् इत्य् एवैतद् आह स एतामेवाहुतिं जुहोत्य् आ श्वःसुत्याया एतद्ध्यस्यैतत् कर्मारब्धम् भवति प्रसन्न एतं यज्ञम् भवति

deva savitaḥ prasuva yajñam prasuva yajñapatim bhagāya divyo gandharvaḥ ketapūḥ ketaṃ naḥ punātu vācaspatir vājaṃ naḥ svadatu svāheti prajāpatirvai vācaspatir annaṃ vājaḥ prajāpatirna idamadyānnaṃ svadatv ity evaitad āha sa etāmevāhutiṃ juhoty ā śvaḥsutyāyā etaddhyasyaitat karmārabdham bhavati prasanna etaṃ yajñam bhavati

5.1.2.1

अंशुं गृह्णाति

aṃśuṃ gṛhṇāti

5.1.2.1.2

सर्वत्वायैव तस्माद् वा अंशुं गृह्णात्य् अथैतान् प्रज्ञातानेवाग्निष्टोमिकान् ग्रहान् गृह्णात्याग्रयणात्

sarvatvāyaiva tasmād vā aṃśuṃ gṛhṇāty athaitān prajñātānevāgniṣṭomikān grahān gṛhṇātyāgrayaṇāt

5.1.2.2

अथ पृष्ठ्यान्गृह्णाति

atha pṛṣṭhyāngṛhṇāti

5.1.2.2.2

तद्यदेवैतैर्देवा उदजयंस् तद् एवैष एतैरुज्जयति

tadyadevaitairdevā udajayaṃs tad evaiṣa etairujjayati

5.1.2.3

अथ षोडशिनं गृह्णाति

atha ṣoḍaśinaṃ gṛhṇāti

5.1.2.3.2

तद्यदेवैतेनेन्द्र उदजयत् तद् एवैष एतेनोज्जयति

tadyadevaitenendra udajayat tad evaiṣa etenojjayati

5.1.2.4

अथैतान्पञ्च वाजपेयग्रहान्गृह्णाति

athaitānpañca vājapeyagrahāngṛhṇāti

5.1.2.4.2

ध्रुवसदं त्वा नृषदम् मनःसदम् उपयामगृहीतो ऽसीन्द्राय त्वा जुष्टं गृह्णाम्य् एष ते योनिर् इन्द्राय त्वा जुष्टतममिति सादयत्य् एषां वै लोकानामयमेव ध्रुव इयम् पृथिवीमम् एवैतेन लोकमुज्जयति

dhruvasadaṃ tvā nṛṣadam manaḥsadam upayāmagṛhīto 'sīndrāya tvā juṣṭaṃ gṛhṇāmy eṣa te yonir indrāya tvā juṣṭatamamiti sādayaty eṣāṃ vai lokānāmayameva dhruva iyam pṛthivīmam evaitena lokamujjayati

5.1.2.5

अप्सुषदम् त्वा घृतसदं व्योमसदम् उपयामगृहीतो ऽसीन्द्राय त्वा जुष्टं गृह्णाम्येष ते योनिर् इन्द्राय त्वा जुष्टतममिति सादयत्य् एषां वै लोकानामयमेव व्योमेदम् अन्तरिक्षम् अन्तरिक्षलोकम् एवैतेनोज्जयति

apsuṣadam tvā ghṛtasadaṃ vyomasadam upayāmagṛhīto 'sīndrāya tvā juṣṭaṃ gṛhṇāmyeṣa te yonir indrāya tvā juṣṭatamamiti sādayaty eṣāṃ vai lokānāmayameva vyomedam antarikṣam antarikṣalokam evaitenojjayati

5.1.2.6

पृथिविसदं त्वान्तरिक्षसदं दिविसदं देवसदं नाकसदमुपयामगृहीतो ऽसीन्द्राय त्वा जुष्टं गृह्णाम्य् एष ते योनिर् इन्द्राय त्वा जुष्टतममिति सादयत्य् एष वै देवसन् नाकसद् एष एव देवलोको देवलोकमेवैतेनोज्जयति

pṛthivisadaṃ tvāntarikṣasadaṃ divisadaṃ devasadaṃ nākasadamupayāmagṛhīto 'sīndrāya tvā juṣṭaṃ gṛhṇāmy eṣa te yonir indrāya tvā juṣṭatamamiti sādayaty eṣa vai devasan nākasad eṣa eva devaloko devalokamevaitenojjayati

5.1.2.7

अपां रसमुद्वयसं सूर्ये सन्तं समाहितम् अपां रसस्य यो रसस्तं वो गृह्णाम्य् उत्तमम् उपयामगृहीतो ऽसीन्द्राय त्वा जुष्टं गृह्णाम्य् एष ते योनिर् इन्द्राय त्वा जुष्टतममिति सादयत्य् एष वा अपां रसो यो ऽयम् पवते स एष सूर्ये समाहितः सूर्यात् पवत एतमेवैतेन रसमुज्जयति

apāṃ rasamudvayasaṃ sūrye santaṃ samāhitam apāṃ rasasya yo rasastaṃ vo gṛhṇāmy uttamam upayāmagṛhīto 'sīndrāya tvā juṣṭaṃ gṛhṇāmy eṣa te yonir indrāya tvā juṣṭatamamiti sādayaty eṣa vā apāṃ raso yo 'yam pavate sa eṣa sūrye samāhitaḥ sūryāt pavata etamevaitena rasamujjayati

5.1.2.8

ग्रहा ऊर्जाहुतयः

grahā ūrjāhutayaḥ

5.1.2.8.2

व्यन्तो विप्राय मतिं तेषां विशिप्रियाणां वो ऽहम् इषम् ऊर्जं समग्रभम् उपयामगृहीतो ऽसीन्द्राय त्वा जुष्टमेष ते योनिर् इन्द्राय त्वा जुष्टतममिति सादयत्य् ऊर्ग् वै रसो रसमेवैतेनोज्जयति

vyanto viprāya matiṃ teṣāṃ viśipriyāṇāṃ vo 'ham iṣam ūrjaṃ samagrabham upayāmagṛhīto 'sīndrāya tvā juṣṭameṣa te yonir indrāya tvā juṣṭatamamiti sādayaty ūrg vai raso rasamevaitenojjayati

5.1.2.9

तान्वा एतान्

tānvā etān

5.1.2.9.2

पञ्च वाजपेयग्रहान् गृह्णाति प्रजापतिं वा एष उज्जयति यो वाजपेयेन यजते संवत्सरो वै प्रजापतिः पञ्च वा ऋतवः संवत्सरस्य तत्प्रजापतिमुज्जयति तस्मात्पञ्च वाजपेयग्रहान्गृह्णाति

pañca vājapeyagrahān gṛhṇāti prajāpatiṃ vā eṣa ujjayati yo vājapeyena yajate saṃvatsaro vai prajāpatiḥ pañca vā ṛtavaḥ saṃvatsarasya tatprajāpatimujjayati tasmātpañca vājapeyagrahāngṛhṇāti

Śatapathabrāhmaṇa