3.8.5.4.2

इयं वै पृथिव्यग्निर्वैश्वानरः सेयम् प्रतिष्ठेमाम् एवैतत् प्रतिष्ठाम् अभिप्रजनयति

iyaṃ vai pṛthivyagnirvaiśvānaraḥ seyam pratiṣṭhemām evaitat pratiṣṭhām abhiprajanayati

3.8.5.5

अथ मुखं विमृष्टे

atha mukhaṃ vimṛṣṭe

3.8.5.5.2

मनो मे हार्दि यच्छेति तथो होपयष्टात्मानं नानुप्रवृणक्ति

mano me hārdi yaccheti tatho hopayaṣṭātmānaṃ nānupravṛṇakti

3.8.5.6

अथ जाघन्या पत्नीः संयाजयन्ति

atha jāghanyā patnīḥ saṃyājayanti

3.8.5.6.2

जघनार्धो वै जाघनी जघनार्धाद्वै योषायै प्रजाः प्रजायन्ते तत् प्रैवैतज् जनयति यज्जाघन्या पत्नीः संयाजयन्ति

jaghanārdho vai jāghanī jaghanārdhādvai yoṣāyai prajāḥ prajāyante tat praivaitaj janayati yajjāghanyā patnīḥ saṃyājayanti

3.8.5.7

अन्तरतो देवानाम् पत्नीभ्यो ऽवद्यति

antarato devānām patnībhyo 'vadyati

3.8.5.7.2

अन्तरतो वै योषायै प्रजाः प्रजायन्त उपरिष्टादग्नये गृहपतय उपरिष्टाद्वै वृषा योषाम् अधिद्रवति

antarato vai yoṣāyai prajāḥ prajāyanta upariṣṭādagnaye gṛhapataya upariṣṭādvai vṛṣā yoṣām adhidravati

3.8.5.8

अथ हृदयशूलेनावभृथं यन्ति

atha hṛdayaśūlenāvabhṛthaṃ yanti

3.8.5.8.2

पशोर् ह वा आलभ्यमानस्य हृदयं शुक् समभ्यवैति हृदयाद्धृदयशूलम् अथ यच्छृतस्य परितृन्दन्ति तद् अलंजुषं तस्माद् उ परितृद्यैव शूलाकुर्यात् तत् त्रिः प्रच्युते पशौ हृदयम् प्रवृह्योत्तमम् प्रत्यवदधाति

paśor ha vā ālabhyamānasya hṛdayaṃ śuk samabhyavaiti hṛdayāddhṛdayaśūlam atha yacchṛtasya paritṛndanti tad alaṃjuṣaṃ tasmād u paritṛdyaiva śūlākuryāt tat triḥ pracyute paśau hṛdayam pravṛhyottamam pratyavadadhāti

3.8.5.9

अथ हृदयशूलम् प्रयच्छति

atha hṛdayaśūlam prayacchati

3.8.5.9.2

तन्न पृथिव्याम् परास्येन् नाप्सु स यत् पृथिव्याम् परास्येदोषधीश्च वनस्पतींश्चैषा शुक् प्रविशेद् यद् अप्सु परास्येद् अप एषा शुक् प्रविशेत् तस्मान्न पृथिव्यां नाप्सु

tanna pṛthivyām parāsyen nāpsu sa yat pṛthivyām parāsyedoṣadhīśca vanaspatīṃścaiṣā śuk praviśed yad apsu parāsyed apa eṣā śuk praviśet tasmānna pṛthivyāṃ nāpsu

3.8.5.10

अप एवाभ्यवेत्य

apa evābhyavetya

3.8.5.10.2

यत्र शुष्कस्य चार्द्रस्य च संधिः स्यात् तद् उपगूहेद् यद्य् उ अभ्यवायनाय ग्लायेदग्रेण यूपम् उदपात्रं निनीय यत्र शुष्कस्य चार्द्रस्य च संधिर् भवति तदुपगूहति नापो नौषधीर् हिंसीरिति तथा नापो नौषधीर् हिनस्ति धाम्नो धाम्नो राजंस्ततो वरुण नो मुञ्च यद् आहुर् अघ्न्या इति वरुणेति शपामहे ततो वरुण नो मुञ्चेति तद् एनं सर्वस्माद् वरुणपाशात् सर्वस्माद् वरुण्यात् प्रमुञ्चति

yatra śuṣkasya cārdrasya ca saṃdhiḥ syāt tad upagūhed yady u abhyavāyanāya glāyedagreṇa yūpam udapātraṃ ninīya yatra śuṣkasya cārdrasya ca saṃdhir bhavati tadupagūhati nāpo nauṣadhīr hiṃsīriti tathā nāpo nauṣadhīr hinasti dhāmno dhāmno rājaṃstato varuṇa no muñca yad āhur aghnyā iti varuṇeti śapāmahe tato varuṇa no muñceti tad enaṃ sarvasmād varuṇapāśāt sarvasmād varuṇyāt pramuñcati

3.8.5.11

अथाभिमन्त्रयते

athābhimantrayate

3.8.5.11.2

सुमित्रिया न आप ओषधयः सन्तु दुर्मित्रियास् तस्मै सन्तु यो ऽस्मान् द्वेष्टि यं च वयं द्विष्म इति यत्र वा एतेन प्रचरन्त्य् आपश् च ह वा अस्मात्तावदोषधयश्चापक्रम्येव तिष्ठन्ति तद् उ ताभिर् मित्रधेयं कुरुते तथो हैनं ताः पुनः प्रविशन्त्य् एषो तत्र प्रायश्चित्तिः क्रियते स वै नाग्नीषोमीयस्य पशोः करोति नाग्नेयस्य वशाया एवानूबन्ध्यायै तां हि सर्वो ऽनु यज्ञः संतिष्ठत एतद् उ हास्याग्नीषोमीयस्य च पशोर् आग्नेयस्य च हृदयशूलेन चरितं भवति यद् वशायाश् चरति

sumitriyā na āpa oṣadhayaḥ santu durmitriyās tasmai santu yo 'smān dveṣṭi yaṃ ca vayaṃ dviṣma iti yatra vā etena pracaranty āpaś ca ha vā asmāttāvadoṣadhayaścāpakramyeva tiṣṭhanti tad u tābhir mitradheyaṃ kurute tatho hainaṃ tāḥ punaḥ praviśanty eṣo tatra prāyaścittiḥ kriyate sa vai nāgnīṣomīyasya paśoḥ karoti nāgneyasya vaśāyā evānūbandhyāyai tāṃ hi sarvo 'nu yajñaḥ saṃtiṣṭhata etad u hāsyāgnīṣomīyasya ca paśor āgneyasya ca hṛdayaśūlena caritaṃ bhavati yad vaśāyāś carati

4.1.3.1

वाग्घ वा अस्यैन्द्रवायवः

vāggha vā asyaindravāyavaḥ

4.1.3.1.2

एतन्न्वध्यात्मम् इन्द्रो ह यत्र वृत्राय वज्रम् प्रजहार सो ऽबलीयान् मन्यमानो नास्तृषीतीव बिभ्यन् निलयांचक्रे तदेवापि देवा अपन्यलयन्त

etannvadhyātmam indro ha yatra vṛtrāya vajram prajahāra so 'balīyān manyamāno nāstṛṣītīva bibhyan nilayāṃcakre tadevāpi devā apanyalayanta

4.1.3.2

ते ह देवा ऊचुः

te ha devā ūcuḥ

4.1.3.2.2

न वै हतं वृत्रं विद्म न जीवं हन्त न एको वेत्तु यदि हतो वा वृत्रो जीवति वेति

na vai hataṃ vṛtraṃ vidma na jīvaṃ hanta na eko vettu yadi hato vā vṛtro jīvati veti

4.1.3.3

ते वायुमब्रुवन्

te vāyumabruvan

Śatapathabrāhmaṇa