1.8.14

इन्द्रं वो विश्वतो मादयस्व हरिभिर् इति इन्द्रस्याप्रतिनिधेः

indraṃ vo viśvato mādayasva haribhir iti indrasyāpratinidheḥ

1.9.1

पिप्रीहि देवान् इति स्विष्टकृतः पुरोनुवाक्या

piprīhi devān iti sviṣṭakṛtaḥ puronuvākyā

1.9.2

अयाड् अग्निर् अग्नेः प्रिया धामान्य् अयाट् सोमस्य प्रिया धामान्य् अयाड् अग्नेः प्रिया धामान्य् अयाड् अग्नीषोमयोः प्रिया धामानि विष्णोर् वायाड् अग्नीषोमयोः प्रिया धामान्य् अयाड् इन्द्राग्न्योः प्रिया धामान्य् अयाड् इन्द्रस्य प्रिया धामानि महेन्द्रस्य वायाड् देवानाम् आज्यपानां प्रिया धामानि यक्षद् अग्नेर् होतुः प्रिया धामानि यक्षत् स्वं महिमानम् आयजताम् एज्या इषः कृणोतु सो ऽध्वरा जातवेदा जुषतां हविर् अग्ने यद् अद्य विशो ऽध्वरस्येति याज्या

ayāḍ agnir agneḥ priyā dhāmāny ayāṭ somasya priyā dhāmāny ayāḍ agneḥ priyā dhāmāny ayāḍ agnīṣomayoḥ priyā dhāmāni viṣṇor vāyāḍ agnīṣomayoḥ priyā dhāmāny ayāḍ indrāgnyoḥ priyā dhāmāny ayāḍ indrasya priyā dhāmāni mahendrasya vāyāḍ devānām ājyapānāṃ priyā dhāmāni yakṣad agner hotuḥ priyā dhāmāni yakṣat svaṃ mahimānam āyajatām ejyā iṣaḥ kṛṇotu so 'dhvarā jātavedā juṣatāṃ havir agne yad adya viśo 'dhvarasyeti yājyā

1.9.3

वषट्कृत्योपस्पर्शनम्

vaṣaṭkṛtyopasparśanam

1.10.1

इडाम् उपह्वास्यमानस्य दक्षिणस्य पाणेः प्रदेशिन्याम् अनक्ति उत्तमे च पर्वणि मध्यमे च

iḍām upahvāsyamānasya dakṣiṇasya pāṇeḥ pradeśinyām anakti uttame ca parvaṇi madhyame ca

1.10.2

वाचस्पतिना ते हुतस्य प्राश्नामि इषे प्राणाय इति पूर्वम् अञ्जनम् अधरे ओष्ठे निलिप्यति मनसस्पतिना ते हुतस्य प्राश्नामि ऊर्जे उदानाय इति उत्तर ओष्ठे उत्तरम्

vācaspatinā te hutasya prāśnāmi iṣe prāṇāya iti pūrvam añjanam adhare oṣṭhe nilipyati manasaspatinā te hutasya prāśnāmi ūrje udānāya iti uttara oṣṭhe uttaram

1.10.3

उपस्पृश्य दक्षिणेन उत्तर इडाम् धारयन् अ प्रसारिताभिः अङ्गुलिभिः अ मुष्टि कृताभिः स्वयम् पञ्चमम् आदाय मुख संमिताम् धारयन् हृदय संमिताम् वा

upaspṛśya dakṣiṇena uttara iḍām dhārayan a prasāritābhiḥ aṅgulibhiḥ a muṣṭi kṛtābhiḥ svayam pañcamam ādāya mukha saṃmitām dhārayan hṛdaya saṃmitām vā

1.11.1

उपहूतं बृहत् सह दिवा सह सूर्येण सह चक्षुषा उप मां बृहत् सह दिवा सह सूर्येण सह चक्षुषा ह्वयताम्

upahūtaṃ bṛhat saha divā saha sūryeṇa saha cakṣuṣā upa māṃ bṛhat saha divā saha sūryeṇa saha cakṣuṣā hvayatām

1.11.1.2

उपहूतं वामदेव्यं सहान्तरिक्षेण सह वायुना सह प्राणेनोप मां वामदेव्यं सहान्तरिक्षेण सह वायुना सह प्राणेन ह्वयताम्

upahūtaṃ vāmadevyaṃ sahāntarikṣeṇa saha vāyunā saha prāṇenopa māṃ vāmadevyaṃ sahāntarikṣeṇa saha vāyunā saha prāṇena hvayatām

1.11.2

उपहूतं रथन्तरं सह पृथिव्या सहाग्निना सह वाचा सह पशुभिर् उप मां रथन्तरं सह पृथिव्या सहाग्निना सह वाचा सह पशुभिर् ह्वयताम्

upahūtaṃ rathantaraṃ saha pṛthivyā sahāgninā saha vācā saha paśubhir upa māṃ rathantaraṃ saha pṛthivyā sahāgninā saha vācā saha paśubhir hvayatām

1.11.3

उपहूतं स्थास्नु भुवनम् उप मां स्थास्नु भुवनं ह्वयताम्

upahūtaṃ sthāsnu bhuvanam upa māṃ sthāsnu bhuvanaṃ hvayatām

1.11.4

उपहूतं चरिष्णु भुवनम् उप मां चरिष्णु भुवनं ह्वयताम्

upahūtaṃ cariṣṇu bhuvanam upa māṃ cariṣṇu bhuvanaṃ hvayatām

1.11.4.2

उपहूतः सखा भक्ष उप मां सखा भक्षो ह्वयताम्

upahūtaḥ sakhā bhakṣa upa māṃ sakhā bhakṣo hvayatām

1.11.5

उपहूताः सप्त होत्रा उप मां सप्त होत्रा ह्वयन्ताम्

upahūtāḥ sapta hotrā upa māṃ sapta hotrā hvayantām

1.11.5.2

उपहूता गावः सहाशिरोप मां गावः सहाशिरा ह्वयन्ताम्

upahūtā gāvaḥ sahāśiropa māṃ gāvaḥ sahāśirā hvayantām

1.11.6

उपहूता वाक् सह प्राणेनोप मां वाक् सह प्राणेन ह्वयताम्

upahūtā vāk saha prāṇenopa māṃ vāk saha prāṇena hvayatām

1.11.6.2

उपहूता वाक् सह मनसोप मां वाक् सह मनसा ह्वयताम्

upahūtā vāk saha manasopa māṃ vāk saha manasā hvayatām

1.11.7

उपहूतेडा वृष्टिर् उप माम् इडा वृष्टिर् ह्वयताम्

upahūteḍā vṛṣṭir upa mām iḍā vṛṣṭir hvayatām

1.11.7.2

उपहूतेडा ततुरिर् उप माम् इडा ततुरिर् ह्वयताम्

upahūteḍā taturir upa mām iḍā taturir hvayatām

1.11.7.3

उपहूता हे सासि जुषस्व मेड इति जपित्वा इडाम् उपह्वयते

upahūtā he sāsi juṣasva meḍa iti japitvā iḍām upahvayate

Śāṅkhāyanaśrautasūtra