13.22

स च प्रतिसंलयनगुरुको भवत्य् अभीक्ष्णं च प्रतिसंलयनं सेवते

sa ca pratisaṃlayanaguruko bhavaty abhīkṣṇaṃ ca pratisaṃlayanaṃ sevate

13.23

अयमुच्यते मञ्जुश्रीर् बोधिसत्त्वस्य महासत्त्वस्य प्रथमो गोचरः

ayamucyate mañjuśrīr bodhisattvasya mahāsattvasya prathamo gocaraḥ

13.24

पुनरपरं मञ्जुश्रीर् बोधिसत्त्वो महासत्त्वः सर्वधर्मान् शून्यान् व्यवलोकयति यथावत् प्रतिष्ठितान् धर्मान् अविपरीतस्थायिनो यथाभूतस्थितान् अचलान् अकम्प्यान् अविवर्त्यान् अपरिवर्तान् सदा यथाभूतस्थितान् आकाशस्वभावान् निरुक्तिव्यवहारविवर्जितान् अजातान् अभूतान् अनसम्भूतान् असंस्कृतान् असंतानान् असत्ताभिलापप्रव्याहृतान् असङ्गस्थानस्थितान् संज्ञाविपर्यासप्रादुर्भूतान्

punaraparaṃ mañjuśrīr bodhisattvo mahāsattvaḥ sarvadharmān śūnyān vyavalokayati yathāvat pratiṣṭhitān dharmān aviparītasthāyino yathābhūtasthitān acalān akampyān avivartyān aparivartān sadā yathābhūtasthitān ākāśasvabhāvān niruktivyavahāravivarjitān ajātān abhūtān anasambhūtān asaṃskṛtān asaṃtānān asattābhilāpapravyāhṛtān asaṅgasthānasthitān saṃjñāviparyāsaprādurbhūtān

13.25

एवं हि मञ्जुश्रीर्बोधिसत्त्वो महासत्त्वो ऽभीक्ष्णं सर्वधर्मान् व्यवलोकयन् विहरत्य् अनेन विहारेण विहरन् बोधिसत्त्वो महासत्त्वो गोचरे स्थितो भवति

evaṃ hi mañjuśrīrbodhisattvo mahāsattvo 'bhīkṣṇaṃ sarvadharmān vyavalokayan viharaty anena vihāreṇa viharan bodhisattvo mahāsattvo gocare sthito bhavati

13.26

अयं मञ्जुश्रीर्बोधिसत्त्वस्य द्वितीयो गोचरः

ayaṃ mañjuśrīrbodhisattvasya dvitīyo gocaraḥ

13.27

अथ खलु भगवानेतमेवार्थं भूयस्या मात्रया संदर्शयमानस्तस्यां वेलायामिमा गाथा अभाषत

atha khalu bhagavānetamevārthaṃ bhūyasyā mātrayā saṃdarśayamānastasyāṃ velāyāmimā gāthā abhāṣata

13.53

पुनरपरं मञ्जुश्रीर् बोधिसत्त्वो महासत्त्वस्तथागतस्य परिनिर्वृतस्य पश्चिमे काले पश्चिमे समये सद्धर्मविप्रलोपे वर्तमाने इमं धर्मपर्यायं संप्रकाशयितुकामः सुखस्थितो भवति

punaraparaṃ mañjuśrīr bodhisattvo mahāsattvastathāgatasya parinirvṛtasya paścime kāle paścime samaye saddharmavipralope vartamāne imaṃ dharmaparyāyaṃ saṃprakāśayitukāmaḥ sukhasthito bhavati

13.54

स सुखस्थितश्च धर्मं भाषते कायगतं वा पुस्तकगतं वा

sa sukhasthitaśca dharmaṃ bhāṣate kāyagataṃ vā pustakagataṃ vā

13.55

परेषां च देशयमानो नाधिमात्रमुपालम्भजातीयो भवति न चान्यान् धर्मभाणकान् भिक्षून् परिवदति न चावर्णं भाषते न चावर्णं निश्चारयति न चान्येषां श्रावकयानीयानां भिक्षूणां नाम गृहीत्वावर्णं भाषते न चावर्णं चारयति न च तेषामन्तिके प्रत्यर्थिकसंज्ञी भवति

pareṣāṃ ca deśayamāno nādhimātramupālambhajātīyo bhavati na cānyān dharmabhāṇakān bhikṣūn parivadati na cāvarṇaṃ bhāṣate na cāvarṇaṃ niścārayati na cānyeṣāṃ śrāvakayānīyānāṃ bhikṣūṇāṃ nāma gṛhītvāvarṇaṃ bhāṣate na cāvarṇaṃ cārayati na ca teṣāmantike pratyarthikasaṃjñī bhavati

13.56

तत्कस्य हेतोः

tatkasya hetoḥ

13.56.2

यथापीदं सुखस्थानस्थितत्वात्

yathāpīdaṃ sukhasthānasthitatvāt

13.57

स आगतागतानां धार्मश्रावणिकानाम् अनुपरिग्राहिकया अनभ्यसूयया धर्मं देशयति

sa āgatāgatānāṃ dhārmaśrāvaṇikānām anuparigrāhikayā anabhyasūyayā dharmaṃ deśayati

13.58

अविवदमानो न च प्रश्नं पृष्टः श्रावकयानेन विसर्जयति

avivadamāno na ca praśnaṃ pṛṣṭaḥ śrāvakayānena visarjayati

13.59

अपि तु खलु पुनस्तथा विसर्जयति यथा बुद्धज्ञानम् अभिसंबुध्यते

api tu khalu punastathā visarjayati yathā buddhajñānam abhisaṃbudhyate

13.60

अथ खलु भगवांस्तस्यां वेलायामिमा गाथा अभाषत

atha khalu bhagavāṃstasyāṃ velāyāmimā gāthā abhāṣata

13.74

पुनरपरं मञ्जुश्रीर्बोधिसत्त्वो महासत्त्वस्तथागतस्य परिनिर्वृतस्य सद्धर्मक्षयान्तकाले वर्तमाने इदं सूत्रं धारयमाणो बोधिसत्त्वो महासत्त्वो ऽनीर्षुको भवत्यशठो ऽमायावी न चान्येषां बोधिसत्त्वयानीयानां पुद्गलानामवर्णं भाषते नापवदति नावसादयति

punaraparaṃ mañjuśrīrbodhisattvo mahāsattvastathāgatasya parinirvṛtasya saddharmakṣayāntakāle vartamāne idaṃ sūtraṃ dhārayamāṇo bodhisattvo mahāsattvo 'nīrṣuko bhavatyaśaṭho 'māyāvī na cānyeṣāṃ bodhisattvayānīyānāṃ pudgalānāmavarṇaṃ bhāṣate nāpavadati nāvasādayati

13.75

न चान्येषां भिक्षुभिक्षुण्युपासकोपासिकानां श्रावकयानीयानां वा प्रत्येकबुद्धयानीयानां वा बोधिसत्त्वयानीयानां वा कौकृत्यमुपसंहरति

na cānyeṣāṃ bhikṣubhikṣuṇyupāsakopāsikānāṃ śrāvakayānīyānāṃ vā pratyekabuddhayānīyānāṃ vā bodhisattvayānīyānāṃ vā kaukṛtyamupasaṃharati

13.75.2

दूरे यूयं कुलपुत्रा अनुत्तरायाः सम्यक्संबोधेर् न तस्यां यूयं संदृश्यध्वे

dūre yūyaṃ kulaputrā anuttarāyāḥ samyaksaṃbodher na tasyāṃ yūyaṃ saṃdṛśyadhve

13.76

अत्यन्तप्रमादविहारिणो यूयम्

atyantapramādavihāriṇo yūyam

13.77

न यूयं प्रतिबलास्तं ज्ञानमभिसंबोद्धुम्

na yūyaṃ pratibalāstaṃ jñānamabhisaṃboddhum

Saddharmapuṇḍarīkasūtra