10.64

स उदकार्थम् उज्जङ्गले पृथिवीप्रदेशे उदपानं खानयेत्

sa udakārtham ujjaṅgale pṛthivīpradeśe udapānaṃ khānayet

10.65

स यावत् पश्येच्छुष्कं पाण्डरं पांसुं निर्वाह्यमानं तावज्जानीयाद् दूर इतस्तावद् उदकमिति

sa yāvat paśyecchuṣkaṃ pāṇḍaraṃ pāṃsuṃ nirvāhyamānaṃ tāvajjānīyād dūra itastāvad udakamiti

10.66

अथ परेण समयेन स पुरुष आर्द्रपांसुम् उदकसंमिश्रं कर्दमपङ्कभूतम् उदकबिन्दुभिः स्रवद्भिर्निर्वाह्यमानं पश्येत् तांश्च पुरुषानुदपानखानकान् कर्दमपङ्कदिग्धाङ्गान् अथ खलु पुनर्भैषज्यराज स पुरुषस्तत्पूर्वनिमित्तं दृष्ट्वा निष्काङ्क्षो भवेन्निर्विचिकित्सः

atha pareṇa samayena sa puruṣa ārdrapāṃsum udakasaṃmiśraṃ kardamapaṅkabhūtam udakabindubhiḥ sravadbhirnirvāhyamānaṃ paśyet tāṃśca puruṣānudapānakhānakān kardamapaṅkadigdhāṅgān atha khalu punarbhaiṣajyarāja sa puruṣastatpūrvanimittaṃ dṛṣṭvā niṣkāṅkṣo bhavennirvicikitsaḥ

10.66.2

आसन्नमिदं खलूदकमिति

āsannamidaṃ khalūdakamiti

10.67

एवमेव भैषज्यराज दूरे ते बोधिसत्त्वा महासत्त्वा भवन्त्यनुत्तरायां सम्यक्संबोधौ यावन्नेमं धर्मपर्यायं शृण्वन्ति नोद्गृह्णन्ति नावतरन्ति नावगाहन्ते न चिन्तयन्ति

evameva bhaiṣajyarāja dūre te bodhisattvā mahāsattvā bhavantyanuttarāyāṃ samyaksaṃbodhau yāvannemaṃ dharmaparyāyaṃ śṛṇvanti nodgṛhṇanti nāvataranti nāvagāhante na cintayanti

10.68

यदा खलु पुनर्भैषज्यराज बोधिसत्त्वा महासत्त्वा इमं धर्मपर्यायं शृण्वन्ति उद्गृह्णन्ति धारयन्ति वाचयन्ति अवतरन्ति स्वाध्यायन्ति चिन्तयन्ति भावयन्ति तदा ते ऽभ्याशीभूता भविष्यन्त्यनुत्तरायां सम्यक्संबोधौ

yadā khalu punarbhaiṣajyarāja bodhisattvā mahāsattvā imaṃ dharmaparyāyaṃ śṛṇvanti udgṛhṇanti dhārayanti vācayanti avataranti svādhyāyanti cintayanti bhāvayanti tadā te 'bhyāśībhūtā bhaviṣyantyanuttarāyāṃ samyaksaṃbodhau

10.69

सत्त्वानामितो भैषज्यराज धर्मपर्यायादनुत्तरा सम्यक्संबोधिराजायते

sattvānāmito bhaiṣajyarāja dharmaparyāyādanuttarā samyaksaṃbodhirājāyate

10.70

तत्कस्य हेतोः

tatkasya hetoḥ

10.70.2

परमसंधाभाषितविवरणो ह्ययं धर्मपर्यायस्तथागतैर् अर्हद्भिः सम्यक्संबुद्धैः

paramasaṃdhābhāṣitavivaraṇo hyayaṃ dharmaparyāyastathāgatair arhadbhiḥ samyaksaṃbuddhaiḥ

10.71

धर्मनिगूढस्थानम् आख्यातं बोधिसत्त्वानां महासत्त्वानां परिनिष्पत्तिहेतोः

dharmanigūḍhasthānam ākhyātaṃ bodhisattvānāṃ mahāsattvānāṃ pariniṣpattihetoḥ

10.72

यः कश्चिद् भैषज्यराज बोधिसत्त्वो ऽस्य धर्मपर्यायस्योत्त्रसेत् संत्रसेत् संत्रासमापद्येन् नवयानसम्प्रस्थितः स भैषज्यराज बोधिसत्त्वो महासत्त्वो वेदितव्यः

yaḥ kaścid bhaiṣajyarāja bodhisattvo 'sya dharmaparyāyasyottraset saṃtraset saṃtrāsamāpadyen navayānasamprasthitaḥ sa bhaiṣajyarāja bodhisattvo mahāsattvo veditavyaḥ

10.73

सचेत् पुनः श्रावकयानीयो ऽस्य धर्मपर्यायस्योत्त्रसेत् संत्रसेत् संत्रासमापद्येताधिमानिकः स भैषज्यराज श्रावकयानिकः पुद्गलो वेदितव्यः

sacet punaḥ śrāvakayānīyo 'sya dharmaparyāyasyottraset saṃtraset saṃtrāsamāpadyetādhimānikaḥ sa bhaiṣajyarāja śrāvakayānikaḥ pudgalo veditavyaḥ

10.74

यः कश्चिद् भैषज्यराज बोधिसत्त्वो महासत्त्वस्तथागतस्य परिनिर्वृतस्य पश्चिमे काले पश्चिमे समये इमं धर्मपर्यायं चतसृणां पर्षदां संप्रकाशयेत् तेन भैषज्यराज बोधिसत्त्वेन महासत्त्वेन तथागतलयनं प्रविश्य तथागतचीवरं प्रावृत्य तथागतस्यासने निषद्य अयं धर्मपर्यायश्चतसृणां पर्षदां संप्रकाशयितव्यः

yaḥ kaścid bhaiṣajyarāja bodhisattvo mahāsattvastathāgatasya parinirvṛtasya paścime kāle paścime samaye imaṃ dharmaparyāyaṃ catasṛṇāṃ parṣadāṃ saṃprakāśayet tena bhaiṣajyarāja bodhisattvena mahāsattvena tathāgatalayanaṃ praviśya tathāgatacīvaraṃ prāvṛtya tathāgatasyāsane niṣadya ayaṃ dharmaparyāyaścatasṛṇāṃ parṣadāṃ saṃprakāśayitavyaḥ

10.75

कतमच्च भैषज्यराज तथागतलयनम्

katamacca bhaiṣajyarāja tathāgatalayanam

10.75.2

सर्वसत्त्वमैत्रीविहारः खलु पुनर्भैषज्यराज तथागतलयनम्

sarvasattvamaitrīvihāraḥ khalu punarbhaiṣajyarāja tathāgatalayanam

10.76

तत्र तेन कुलपुत्रेण प्रवेष्टव्यम्

tatra tena kulaputreṇa praveṣṭavyam

10.77

कतमच्च भैषज्यराज तथागतचीवरम्

katamacca bhaiṣajyarāja tathāgatacīvaram

10.77.2

महाक्षान्तिसौरत्यं खलु पुनर्भैषज्यराज तथागतचीवरम्

mahākṣāntisauratyaṃ khalu punarbhaiṣajyarāja tathāgatacīvaram

10.78

तत्तेन कुलपुत्रेण वा कुलदुहित्रा वा प्रावरितव्यम्

tattena kulaputreṇa vā kuladuhitrā vā prāvaritavyam

10.79

कतमच्च भैषज्यराज तथागतस्य धर्मासनम्

katamacca bhaiṣajyarāja tathāgatasya dharmāsanam

Saddharmapuṇḍarīkasūtra