8.4

किमत्र भगवन् अस्माभिः शक्यं कर्तुम्

kimatra bhagavan asmābhiḥ śakyaṃ kartum

8.4.2

तथागत एवास्माकं जानीते आशयं पूर्वयोगचर्यां च

tathāgata evāsmākaṃ jānīte āśayaṃ pūrvayogacaryāṃ ca

8.5

स भगवतः पादौ शिरसाभिवन्द्य एकान्ते स्थितो ऽभूद् भगवन्तमेव नमस्कुर्वन् अनिमिषाभ्यां च नेत्राभ्यां सम्प्रेक्षमाणः

sa bhagavataḥ pādau śirasābhivandya ekānte sthito 'bhūd bhagavantameva namaskurvan animiṣābhyāṃ ca netrābhyāṃ samprekṣamāṇaḥ

8.6

अथ खलु भगवानायुष्मन्तः पूर्णस्य मैत्रायणीपुत्रस्य चित्ताशयमवलोक्य सर्वावन्तं भिक्षुसंघमामन्त्रयते स्म

atha khalu bhagavānāyuṣmantaḥ pūrṇasya maitrāyaṇīputrasya cittāśayamavalokya sarvāvantaṃ bhikṣusaṃghamāmantrayate sma

8.6.2

पश्यथ भिक्षवो यूयमिमं श्रावकं पूर्णं मैत्रायणीपुत्रं यो मयास्य भिक्षुसंघस्य धर्मकथिकानामग्र्यो निर्दिष्टो बहुभिश्च भूतैर्गुणैरभिष्टुतो बहुभिश्च प्रकारैरस्मिन् मम शासने सद्धर्मपरिग्रहायाभियुक्तः

paśyatha bhikṣavo yūyamimaṃ śrāvakaṃ pūrṇaṃ maitrāyaṇīputraṃ yo mayāsya bhikṣusaṃghasya dharmakathikānāmagryo nirdiṣṭo bahubhiśca bhūtairguṇairabhiṣṭuto bahubhiśca prakārairasmin mama śāsane saddharmaparigrahāyābhiyuktaḥ

8.7

चतसृणां पर्षदां संहर्षकः समादापकः समुत्तेजकः संप्रहर्षको ऽक्लान्तो धर्मदेशनयालमस्य धर्मस्याख्यातालमनुग्रहीता सब्रह्मचारिणाम्

catasṛṇāṃ parṣadāṃ saṃharṣakaḥ samādāpakaḥ samuttejakaḥ saṃpraharṣako 'klānto dharmadeśanayālamasya dharmasyākhyātālamanugrahītā sabrahmacāriṇām

8.8

मुक्त्वा भिक्षवस्तथागतं नान्यः शक्तः पूर्णं मैत्रायणीपुत्रमर्थतो वा व्यञ्जनतो वा पर्यादातुम्

muktvā bhikṣavastathāgataṃ nānyaḥ śaktaḥ pūrṇaṃ maitrāyaṇīputramarthato vā vyañjanato vā paryādātum

8.9

तत्किं मन्यध्वे भिक्षवो ममैवायं सद्धर्मपरिग्राहक इति

tatkiṃ manyadhve bhikṣavo mamaivāyaṃ saddharmaparigrāhaka iti

8.9.2

न खलु पुनर्भिक्षवो युष्माभिरेवं द्रष्टव्यम्

na khalu punarbhikṣavo yuṣmābhirevaṃ draṣṭavyam

8.10

तत्कस्य हेतोः

tatkasya hetoḥ

8.10.2

अभिजानाम्यहं भिक्षवो ऽतीते ऽध्वनि नवनवतीनां बुद्धकोटीनां यत्र अनेनैव तेषां बुद्धानां भगवतां शासने सद्धर्मः परिगृहीतः

abhijānāmyahaṃ bhikṣavo 'tīte 'dhvani navanavatīnāṃ buddhakoṭīnāṃ yatra anenaiva teṣāṃ buddhānāṃ bhagavatāṃ śāsane saddharmaḥ parigṛhītaḥ

8.11

तद्यथापि नाम मम एतर्हि सर्वत्र चाग्र्यो धर्मकथिकानामभूत् सर्वत्र च शून्यतागतिं गतो ऽभूत्

tadyathāpi nāma mama etarhi sarvatra cāgryo dharmakathikānāmabhūt sarvatra ca śūnyatāgatiṃ gato 'bhūt

8.12

सर्वत्र च प्रतिसंविदां लाभी अभूत् सर्वत्र च बोधिसत्त्वाभिज्ञासु गतिं गतो ऽभूत्

sarvatra ca pratisaṃvidāṃ lābhī abhūt sarvatra ca bodhisattvābhijñāsu gatiṃ gato 'bhūt

8.13

सुविनिश्चितधर्मदेशको निर्विचिकित्सधर्मदेशकः परिशुद्धधर्मदेशकश्चाभूत्

suviniścitadharmadeśako nirvicikitsadharmadeśakaḥ pariśuddhadharmadeśakaścābhūt

8.14

तेषां च बुद्धानां भगवतां शासने यावदायुष्प्रमाणं ब्रह्मचर्यं चरितवान्

teṣāṃ ca buddhānāṃ bhagavatāṃ śāsane yāvadāyuṣpramāṇaṃ brahmacaryaṃ caritavān

8.15

सर्वत्र च श्रावक इति संज्ञायते स्म

sarvatra ca śrāvaka iti saṃjñāyate sma

8.16

स खल्वनेनोपायेन अप्रमेयाणामसंख्येयानां सत्त्वकोटीनयुतशतसहस्राणामर्थमकार्षीद् अप्रमेयानसंख्येयांश्च सत्त्वान् परिपाचितवान् अनुत्तरायां सम्यक्संबोधौ

sa khalvanenopāyena aprameyāṇāmasaṃkhyeyānāṃ sattvakoṭīnayutaśatasahasrāṇāmarthamakārṣīd aprameyānasaṃkhyeyāṃśca sattvān paripācitavān anuttarāyāṃ samyaksaṃbodhau

8.17

सर्वत्र च बुद्धकृत्येन सत्त्वानां प्रत्युपस्थितो ऽभूत्

sarvatra ca buddhakṛtyena sattvānāṃ pratyupasthito 'bhūt

8.18

सर्वत्र चात्मनो बुद्धक्षेत्रं परिशोधयति स्म

sarvatra cātmano buddhakṣetraṃ pariśodhayati sma

8.19

सत्त्वानां च परिपाकायाभियुक्तो ऽभूत्

sattvānāṃ ca paripākāyābhiyukto 'bhūt

Saddharmapuṇḍarīkasūtra