5.39

सो ऽहं काश्यप एकरसधर्मं विदित्वा यदुत विमुक्तिरसं निर्वृतिरसं निर्वाणपर्यवसानं नित्यपरिनिर्वृतमेकभूमिकमाकाशगतिकमधिमुक्तिं सत्त्वानाम् अनुरक्षमाणो न सहसैव सर्वज्ञज्ञानं संप्रकाशयामि

so 'haṃ kāśyapa ekarasadharmaṃ viditvā yaduta vimuktirasaṃ nirvṛtirasaṃ nirvāṇaparyavasānaṃ nityaparinirvṛtamekabhūmikamākāśagatikamadhimuktiṃ sattvānām anurakṣamāṇo na sahasaiva sarvajñajñānaṃ saṃprakāśayāmi

5.40

आश्चर्यप्राप्ता अद्भुतप्राप्ता यूयं काश्यप यद्यूयं संधाभाषितं तथागतस्य न शक्नुथ अवतरितुम्

āścaryaprāptā adbhutaprāptā yūyaṃ kāśyapa yadyūyaṃ saṃdhābhāṣitaṃ tathāgatasya na śaknutha avataritum

5.41

तत्कस्य हेतोः

tatkasya hetoḥ

5.41.2

दुर्विज्ञेयं काश्यप तथागतानामर्हतां सम्यक्संबुद्धानां संधाभाषितमिति

durvijñeyaṃ kāśyapa tathāgatānāmarhatāṃ samyaksaṃbuddhānāṃ saṃdhābhāṣitamiti

5.42

अथ खलु भगवांस्तस्यां वेलायामिममेवार्थं भूयस्या मात्रया संदर्शयमान इमा गाथा अभाषत

atha khalu bhagavāṃstasyāṃ velāyāmimamevārthaṃ bhūyasyā mātrayā saṃdarśayamāna imā gāthā abhāṣata

5.87

पुनरपरं काश्यप तथागतः सत्त्वविनये समो न चासमः

punaraparaṃ kāśyapa tathāgataḥ sattvavinaye samo na cāsamaḥ

5.88

तद्यथा काश्यप चन्द्रसूर्यप्रभा सर्वलोकमवभासयति कुशलकारिणम् अकुशलकारिणं चोर्ध्वावस्थितमधरावस्थितं च सुगन्धि दुर्गन्धि सा सर्वत्र समं प्रभा निपतति न विषमम् एवमेव काश्यप तथागतानामर्हतां सम्यक्संबुद्धानां सर्वज्ञज्ञानचित्तप्रभा सर्वेषु पञ्चगत्युपपन्नेषु सत्त्वेषु यथाधिमुक्तिं महायानिकप्रत्येकबुद्धयानिकश्रावकयानिकेषु सद्धर्मदेशना समं प्रवर्तते

tadyathā kāśyapa candrasūryaprabhā sarvalokamavabhāsayati kuśalakāriṇam akuśalakāriṇaṃ cordhvāvasthitamadharāvasthitaṃ ca sugandhi durgandhi sā sarvatra samaṃ prabhā nipatati na viṣamam evameva kāśyapa tathāgatānāmarhatāṃ samyaksaṃbuddhānāṃ sarvajñajñānacittaprabhā sarveṣu pañcagatyupapanneṣu sattveṣu yathādhimuktiṃ mahāyānikapratyekabuddhayānikaśrāvakayānikeṣu saddharmadeśanā samaṃ pravartate

5.89

न च तथागतस्य ज्ञानप्रभाया ऊनता वा अतिरिक्तता वा यथापुण्यज्ञानसमुदागमाय सम्भवति

na ca tathāgatasya jñānaprabhāyā ūnatā vā atiriktatā vā yathāpuṇyajñānasamudāgamāya sambhavati

5.90

न सन्ति काश्यप त्रीणि यानानि

na santi kāśyapa trīṇi yānāni

5.91

केवलमन्योन्यचरिताः सत्त्वाः

kevalamanyonyacaritāḥ sattvāḥ

5.91.2

तेन त्रीणि यानानि प्रज्ञप्यन्ते

tena trīṇi yānāni prajñapyante

5.92

एवमुक्ते आयुष्मान् महाकाश्यपो भगवन्तमेतदवोचत्

evamukte āyuṣmān mahākāśyapo bhagavantametadavocat

5.92.2

यदि भगवन् न सन्ति त्रीणि यानानि किं कारणं प्रत्युत्पन्ने ऽध्वनि श्रावकप्रत्येकबुद्धबोधिसत्त्वानां प्रज्ञप्तिः प्रज्ञप्यते

yadi bhagavan na santi trīṇi yānāni kiṃ kāraṇaṃ pratyutpanne 'dhvani śrāvakapratyekabuddhabodhisattvānāṃ prajñaptiḥ prajñapyate

5.92.3

एवमुक्ते भगवानायुष्मन्तं महाकाश्यपमेतदवोचत्

evamukte bhagavānāyuṣmantaṃ mahākāśyapametadavocat

5.92.4

तद्यथा काश्यप कुम्भकारः समासु मृत्तिकासु भाजनानि करोति

tadyathā kāśyapa kumbhakāraḥ samāsu mṛttikāsu bhājanāni karoti

5.93

तत्र कानिचिद् गुडभाजनानि भवन्ति कानिचिद् घृतभाजनानि कानिचिद् दधिक्षीरभाजनानि कानिचिद् हीनान्यशुचिभाजनानि भवन्ति न च मृत्तिकाया नानात्वम् अथ च द्रव्यप्रक्षेपमात्रेण भाजनानां नानात्वं प्रज्ञायते

tatra kānicid guḍabhājanāni bhavanti kānicid ghṛtabhājanāni kānicid dadhikṣīrabhājanāni kānicid hīnānyaśucibhājanāni bhavanti na ca mṛttikāyā nānātvam atha ca dravyaprakṣepamātreṇa bhājanānāṃ nānātvaṃ prajñāyate

5.94

एवमेव काश्यप एकमेवेदं यानं यदुत बुद्धयानम्

evameva kāśyapa ekamevedaṃ yānaṃ yaduta buddhayānam

5.95

न द्वितीयं न तृतीयं वा यानं संविद्यते

na dvitīyaṃ na tṛtīyaṃ vā yānaṃ saṃvidyate

5.96

एवमुक्ते आयुष्मान् महाकाश्यपो भगवन्तमेतदवोचत्

evamukte āyuṣmān mahākāśyapo bhagavantametadavocat

5.96.2

यद्यपि भगवन् सत्त्वा नानाधिमुक्तयो ये त्रैधातुकान्निःसृताः किं तेषामेकं निर्वाणमुत द्वे त्रीणि वा

yadyapi bhagavan sattvā nānādhimuktayo ye traidhātukānniḥsṛtāḥ kiṃ teṣāmekaṃ nirvāṇamuta dve trīṇi vā

Saddharmapuṇḍarīkasūtra