3.185.2

एतानि भोः सत्त्वा यानि आर्याणि च आर्यप्रशस्तानि च महारमणीयकसमन्वागतानि च

etāni bhoḥ sattvā yāni āryāṇi ca āryapraśastāni ca mahāramaṇīyakasamanvāgatāni ca

3.186

अकृपणम् एतैर् भवन्तः क्रीडिष्यथ रमिष्यथ परिचारयिष्यथ

akṛpaṇam etair bhavantaḥ krīḍiṣyatha ramiṣyatha paricārayiṣyatha

3.187

इन्द्रियबलबोध्यङ्गध्यानविमोक्षसमाधिसमापत्तिभिश्च महतीं रतिं प्रत्यनुभविष्यथ

indriyabalabodhyaṅgadhyānavimokṣasamādhisamāpattibhiśca mahatīṃ ratiṃ pratyanubhaviṣyatha

3.188

महता च सुखसौमनस्येन समन्वागता भविष्यथ

mahatā ca sukhasaumanasyena samanvāgatā bhaviṣyatha

3.189

तत्र शारिपुत्र ये सत्त्वाः पण्डितजातीया भवन्ति ते तथागतस्य लोकपितुर् अभिश्रद्दधन्ति

tatra śāriputra ye sattvāḥ paṇḍitajātīyā bhavanti te tathāgatasya lokapitur abhiśraddadhanti

3.190

अभिश्रद्दधित्वा च तथागतशासने ऽभियुज्यन्ते उद्योगमापद्यन्ते

abhiśraddadhitvā ca tathāgataśāsane 'bhiyujyante udyogamāpadyante

3.191

तत्र केचित् सत्त्वाः परघोषश्रवानुगमनम् आकाङ्क्षमाणा आत्मपरिनिर्वाणहेतोश् चतुरार्यसत्यानुबोधाय तथागतशासने ऽभियुज्यन्ते

tatra kecit sattvāḥ paraghoṣaśravānugamanam ākāṅkṣamāṇā ātmaparinirvāṇahetoś caturāryasatyānubodhāya tathāgataśāsane 'bhiyujyante

3.192

ते उच्यन्ते श्रावकयानमाकाङ्क्षमाणाः त्रैधातुकान्निर्धावन्ति

te ucyante śrāvakayānamākāṅkṣamāṇāḥ traidhātukānnirdhāvanti

3.193

तद्यथापि नाम तस्माद् आदीप्ताद् अगारादन्यतरे दारका मृगरथमाकाङ्क्षमाणा निर्धाविताः

tadyathāpi nāma tasmād ādīptād agārādanyatare dārakā mṛgarathamākāṅkṣamāṇā nirdhāvitāḥ

3.194

अन्ये सत्त्वा अनाचार्यकं ज्ञानं दमशमथमाकाङ्क्षमाणा आत्मपरिनिर्वाणहेतोर्हेतुप्रत्ययानुबोधाय तथागतशासने ऽभियुज्यन्ते

anye sattvā anācāryakaṃ jñānaṃ damaśamathamākāṅkṣamāṇā ātmaparinirvāṇahetorhetupratyayānubodhāya tathāgataśāsane 'bhiyujyante

3.194.2

ते उच्यन्ते प्रत्येकबुद्धयानम् आकाङ्क्षमाणास् त्रैधातुकान्निर्धावन्ति

te ucyante pratyekabuddhayānam ākāṅkṣamāṇās traidhātukānnirdhāvanti

3.195

तद्यथापि नाम तस्माद् आदीप्तादगारादन्यतरे दारका अजरथम् आकाङ्क्षमाणा निर्धाविताः

tadyathāpi nāma tasmād ādīptādagārādanyatare dārakā ajaratham ākāṅkṣamāṇā nirdhāvitāḥ

3.196

अपरे पुनः सत्त्वाः सर्वज्ञज्ञानं बुद्धज्ञानं स्वयंभूज्ञानम् अनाचार्यकं ज्ञानमाकाङ्क्षमाणा बहुजनहिताय बहुजनसुखाय लोकानुकम्पायै महतो जनकायस्यार्थाय हिताय सुखाय देवानां च मनुष्याणां च सर्वसत्त्वपरिनिर्वाणहेतोस् तथागतज्ञानबलवैशारद्यानुबोधाय तथागतशासने ऽभियुज्यन्ते

apare punaḥ sattvāḥ sarvajñajñānaṃ buddhajñānaṃ svayaṃbhūjñānam anācāryakaṃ jñānamākāṅkṣamāṇā bahujanahitāya bahujanasukhāya lokānukampāyai mahato janakāyasyārthāya hitāya sukhāya devānāṃ ca manuṣyāṇāṃ ca sarvasattvaparinirvāṇahetos tathāgatajñānabalavaiśāradyānubodhāya tathāgataśāsane 'bhiyujyante

3.197

ते उच्यन्ते महायानम् आकाङ्क्षमाणास् त्रैधातुकान्निर्धावन्ति

te ucyante mahāyānam ākāṅkṣamāṇās traidhātukānnirdhāvanti

3.198

तेन कारणेनोच्यन्ते बोधिसत्त्वा महासत्त्वा इति

tena kāraṇenocyante bodhisattvā mahāsattvā iti

3.199

तद्यथापि नाम तस्माद् आदीप्तादगारादन्यतरे दारका गोरथमाकाङ्क्षमाणानिर्धाविताः

tadyathāpi nāma tasmād ādīptādagārādanyatare dārakā gorathamākāṅkṣamāṇānirdhāvitāḥ

3.200

तद्यथापि नाम शारिपुत्र स पुरुषस्तान् कुमारकांस्तस्माद् आदीप्तादगारान्निर्धावितान् दृष्ट्वा क्षेमस्वस्तिभ्यां परिमुक्तानभयप्राप्तानिति विदित्वा आत्मानं च महाधनं विदित्वा तेषां दारकाणामेकमेव यानमुदारमनुप्रयच्छेत्

tadyathāpi nāma śāriputra sa puruṣastān kumārakāṃstasmād ādīptādagārānnirdhāvitān dṛṣṭvā kṣemasvastibhyāṃ parimuktānabhayaprāptāniti viditvā ātmānaṃ ca mahādhanaṃ viditvā teṣāṃ dārakāṇāmekameva yānamudāramanuprayacchet

3.200.2

एवमेव शारिपुत्र तथागतो ऽप्यर्हन् सम्यक्संबुद्धो यदा पश्यति

evameva śāriputra tathāgato 'pyarhan samyaksaṃbuddho yadā paśyati

3.200.3

अनेकाः सत्त्वकोटीस्त्रैधातुकात् परिमुक्ता दुःखभयभैरवोपद्रवपरिमुक्तास् तथागतशासनद्वारेण निर्धाविताः परिमुक्ताः सर्वभयोपद्रवकान्तारेभ्यो निर्वृतिसुखप्राप्ताः

anekāḥ sattvakoṭīstraidhātukāt parimuktā duḥkhabhayabhairavopadravaparimuktās tathāgataśāsanadvāreṇa nirdhāvitāḥ parimuktāḥ sarvabhayopadravakāntārebhyo nirvṛtisukhaprāptāḥ

3.201

तानेतान् शारिपुत्र तस्मिन् समये तथागतो ऽर्हन् सम्यक्संबुद्धः प्रभूतो महाज्ञानबलवैशारद्यकोश इति विदित्वा सर्वे चैते ममैव पुत्रा इति ज्ञात्वा बुद्धयानेनैव तान् सत्त्वान् परिनिर्वापयति

tānetān śāriputra tasmin samaye tathāgato 'rhan samyaksaṃbuddhaḥ prabhūto mahājñānabalavaiśāradyakośa iti viditvā sarve caite mamaiva putrā iti jñātvā buddhayānenaiva tān sattvān parinirvāpayati

Saddharmapuṇḍarīkasūtra