3.124.2

आदीप्तमिदं निवेशनं महताग्निस्कन्धेन संप्रदीप्तम्

ādīptamidaṃ niveśanaṃ mahatāgniskandhena saṃpradīptam

3.125

मा हैवाहं चेमे च कुमारका इहैवानेन महताग्निस्कन्धेन अनयव्यसनमापत्स्यामहे

mā haivāhaṃ ceme ca kumārakā ihaivānena mahatāgniskandhena anayavyasanamāpatsyāmahe

3.126

यन्न्वहमुपायकौशल्येनेमान् कुमारकान् अस्माद् गृहात् निष्क्रामयेयम्

yannvahamupāyakauśalyenemān kumārakān asmād gṛhāt niṣkrāmayeyam

3.127

स च पुरुषस्तेषां कुमारकाणामाशयज्ञो भवेद् अधिमुक्तिं च विजानीयात्

sa ca puruṣasteṣāṃ kumārakāṇāmāśayajño bhaved adhimuktiṃ ca vijānīyāt

3.128

तेषां च कुमारकाणामनेकविधान्यनेकानि क्रीडनकानि भवेयुर्विविधानि च रमणीयकानीष्टानि कान्तानि प्रियाणि मनआपानि तानि च दुर्लभानि भवेयुः

teṣāṃ ca kumārakāṇāmanekavidhānyanekāni krīḍanakāni bhaveyurvividhāni ca ramaṇīyakānīṣṭāni kāntāni priyāṇi manaāpāni tāni ca durlabhāni bhaveyuḥ

3.129

अथ खलु स पुरुषस्तेषां कुमारकाणामाशयं जानंस्तान् कुमारकानेतदवोचत्

atha khalu sa puruṣasteṣāṃ kumārakāṇāmāśayaṃ jānaṃstān kumārakānetadavocat

3.129.2

यानि तानि कुमारका युष्माकं क्रीडनकानि रमणीयकान्याश्चर्याद्भुतानि येषामलाभात् संतप्यथ नानावर्णानि बहुप्रकाराणि

yāni tāni kumārakā yuṣmākaṃ krīḍanakāni ramaṇīyakānyāścaryādbhutāni yeṣāmalābhāt saṃtapyatha nānāvarṇāni bahuprakārāṇi

3.130

तद्यथा गोरथकान्य् अजरथकानि मृगरथकानि

tadyathā gorathakāny ajarathakāni mṛgarathakāni

3.131

यानि भवतामिष्टानि कान्तानि प्रियाणि मनआपानि

yāni bhavatāmiṣṭāni kāntāni priyāṇi manaāpāni

3.132

तानि च मया सर्वाणि बहिर्निवेशनद्वारे स्थापितानि युष्माकं क्रीडनहेतोः

tāni ca mayā sarvāṇi bahirniveśanadvāre sthāpitāni yuṣmākaṃ krīḍanahetoḥ

3.133

आगच्छन्तु भवन्तो निर्धावन्त्वस्मान्निवेशनात्

āgacchantu bhavanto nirdhāvantvasmānniveśanāt

3.134

अहं वो यस्य यस्य येनार्थो येन प्रयोजनं भविष्यति तस्मै तस्मै तत्प्रदास्यामि

ahaṃ vo yasya yasya yenārtho yena prayojanaṃ bhaviṣyati tasmai tasmai tatpradāsyāmi

3.135

आगच्छत शीघ्रं तेषां कारणं निर्धावत

āgacchata śīghraṃ teṣāṃ kāraṇaṃ nirdhāvata

3.136

अथ खलु ते कुमारकास्तेषां क्रीडनकानां रमणीयकानामर्थाय यथेप्सितानां यथासंकल्पितानामिष्टानां कान्तानां प्रियाणां मनआपानां नामधेयानि श्रुत्वा तस्मादादीप्तादगारात् क्षिप्रमेवारब्धवीर्या बलवता जवेन अन्योन्यम् अप्रतीक्षमाणाः कः प्रथमं कः प्रथमतरमित्यन्योन्यं संघट्टितकायास् तस्माद् आदीप्तादगारात् क्षिप्रमेव निर्धाविताः

atha khalu te kumārakāsteṣāṃ krīḍanakānāṃ ramaṇīyakānāmarthāya yathepsitānāṃ yathāsaṃkalpitānāmiṣṭānāṃ kāntānāṃ priyāṇāṃ manaāpānāṃ nāmadheyāni śrutvā tasmādādīptādagārāt kṣipramevārabdhavīryā balavatā javena anyonyam apratīkṣamāṇāḥ kaḥ prathamaṃ kaḥ prathamataramityanyonyaṃ saṃghaṭṭitakāyās tasmād ādīptādagārāt kṣiprameva nirdhāvitāḥ

3.137

अथ स पुरुषः क्षेमस्वस्तिना तान् कुमारकान् निर्गतान् दृष्ट्वा अभयप्राप्तानिति विदित्वा आकाशे ग्रामचत्वरे उपविष्टः प्रीतिप्रामोद्यजातो निरुपादानो विगतनीवरणो ऽभयप्राप्तो भवेत्

atha sa puruṣaḥ kṣemasvastinā tān kumārakān nirgatān dṛṣṭvā abhayaprāptāniti viditvā ākāśe grāmacatvare upaviṣṭaḥ prītiprāmodyajāto nirupādāno vigatanīvaraṇo 'bhayaprāpto bhavet

3.138

अथ खलु ते कुमारका येन स पिता तेनोपसंक्रामन् उपसंक्रम्यैवं वदेयुः

atha khalu te kumārakā yena sa pitā tenopasaṃkrāman upasaṃkramyaivaṃ vadeyuḥ

3.138.2

देहि नस्तात तानि विविधानि क्रीडनकानि रमणीयानि

dehi nastāta tāni vividhāni krīḍanakāni ramaṇīyāni

3.139

तद्यथा

tadyathā

3.139.2

गोरथकान्यजरथकानि मृगरथकानि

gorathakānyajarathakāni mṛgarathakāni

3.140

अथ खलु शारिपुत्र स पुरुषस्तेषां स्वकानां पुत्राणां वातजवसम्पन्नान् गोरथकान् एवानुप्रयच्छेत् सप्तरत्नमयान् सवेदिकान् सकिङ्किणीजालाभिप्रलम्बितानुच्चान् प्रगृहीतानाश्चर्याद्भुतरत्नालंकृतान् रत्नदामकृतशोभान् पुष्पमाल्यालंकृतांस्तूलिकागोणिकास्तरणान् दूष्यपटप्रत्यास्तीर्णान् उभयतो लोहितोपधानान् श्वेतैः प्रपाण्डुरैः शीघ्रजवैर्गोणैर्योजितान् बहुपुरुषपरिगृहीतान्

atha khalu śāriputra sa puruṣasteṣāṃ svakānāṃ putrāṇāṃ vātajavasampannān gorathakān evānuprayacchet saptaratnamayān savedikān sakiṅkiṇījālābhipralambitānuccān pragṛhītānāścaryādbhutaratnālaṃkṛtān ratnadāmakṛtaśobhān puṣpamālyālaṃkṛtāṃstūlikāgoṇikāstaraṇān dūṣyapaṭapratyāstīrṇān ubhayato lohitopadhānān śvetaiḥ prapāṇḍuraiḥ śīghrajavairgoṇairyojitān bahupuruṣaparigṛhītān

Saddharmapuṇḍarīkasūtra