17.37.2

आगच्छ त्वं भोः पुरुष

āgaccha tvaṃ bhoḥ puruṣa

17.38

सद्धर्मपुण्डरीकं नाम धर्मपर्यायं शृणुष्व

saddharmapuṇḍarīkaṃ nāma dharmaparyāyaṃ śṛṇuṣva

17.39

स च पुरुषस्तस्य तां प्रोत्साहनाम् आगम्य यदि मुहूर्तमात्रमपि शृणुयात् स सत्त्वस्तेन प्रोत्साहेन कुशलमूलेनाभिसंस्कृतेन धारणीप्रतिलब्धैर् बोधिसत्त्वैः सार्धं समवधानं प्रतिलभते

sa ca puruṣastasya tāṃ protsāhanām āgamya yadi muhūrtamātramapi śṛṇuyāt sa sattvastena protsāhena kuśalamūlenābhisaṃskṛtena dhāraṇīpratilabdhair bodhisattvaiḥ sārdhaṃ samavadhānaṃ pratilabhate

17.40

अजडश्च भवति तीक्ष्णेन्द्रियः प्रज्ञावान्

ajaḍaśca bhavati tīkṣṇendriyaḥ prajñāvān

17.41

न तस्य जातिशतसहस्रैरपि पूति मुखं भवति न दुर्गन्धि

na tasya jātiśatasahasrairapi pūti mukhaṃ bhavati na durgandhi

17.42

नाप्यस्य जिह्वारोगो भवति न मुखरोगो भवति

nāpyasya jihvārogo bhavati na mukharogo bhavati

17.43

न च श्यामदन्तो भवति न विषमदन्तो भवति न पीतदन्तो भवति न दुःसंस्थितदन्तो न खण्डदन्तो न पतितदन्तो न वक्रदन्तो न लम्बोष्ठो भवति नाभ्यन्तरोष्ठो न प्रसारितोष्ठो न खण्डोष्ठो न वङ्कोष्ठो न कृष्णोष्ठो न बीभत्सोष्ठो भवति

na ca śyāmadanto bhavati na viṣamadanto bhavati na pītadanto bhavati na duḥsaṃsthitadanto na khaṇḍadanto na patitadanto na vakradanto na lamboṣṭho bhavati nābhyantaroṣṭho na prasāritoṣṭho na khaṇḍoṣṭho na vaṅkoṣṭho na kṛṣṇoṣṭho na bībhatsoṣṭho bhavati

17.44

न चिपिटनासो भवति न वक्रनासो भवति

na cipiṭanāso bhavati na vakranāso bhavati

17.45

न दीर्घमुखो भवति न वङ्कमुखो भवति न कृष्णमुखो भवति नाप्रियदर्शनमुखः

na dīrghamukho bhavati na vaṅkamukho bhavati na kṛṣṇamukho bhavati nāpriyadarśanamukhaḥ

17.46

अपि तु खल्वजित सूक्ष्मसुजातजिह्वादन्तोष्ठो भवति आयतनासः

api tu khalvajita sūkṣmasujātajihvādantoṣṭho bhavati āyatanāsaḥ

17.47

प्रणीतमुखमण्डलः सुभ्रूः सुपरिनिक्षिप्तललाटो भवति

praṇītamukhamaṇḍalaḥ subhrūḥ suparinikṣiptalalāṭo bhavati

17.48

सुपरिपूर्णपुरुषव्यञ्जनप्रतिलाभी च भवति

suparipūrṇapuruṣavyañjanapratilābhī ca bhavati

17.49

तथागतं च अववादानुशासकं प्रतिलभते

tathāgataṃ ca avavādānuśāsakaṃ pratilabhate

17.50

क्षिप्रं च बुद्धैर्भगवद्भिः सह समवधानं प्रतिलभते

kṣipraṃ ca buddhairbhagavadbhiḥ saha samavadhānaṃ pratilabhate

17.51

पश्य अजित एकसत्त्वमपि नाम उत्साहयित्वा इयत् पुण्यं प्रसवति

paśya ajita ekasattvamapi nāma utsāhayitvā iyat puṇyaṃ prasavati

17.52

कः पुनर्वादो यः सत्कृत्य शृणुयात् सत्कृत्य वाचयेत् सत्कृत्य देशयेत् सत्कृत्य प्रकाशयेदिति

kaḥ punarvādo yaḥ satkṛtya śṛṇuyāt satkṛtya vācayet satkṛtya deśayet satkṛtya prakāśayediti

17.53

अथ खलु भगवांस्तस्यां वेलायामिमा गाथा अभाषत

atha khalu bhagavāṃstasyāṃ velāyāmimā gāthā abhāṣata

18.1

अथ खलु भगवान् सततसमिताभियुक्तं बोधिसत्त्वं महासत्त्वम् आमन्त्रयामास

atha khalu bhagavān satatasamitābhiyuktaṃ bodhisattvaṃ mahāsattvam āmantrayāmāsa

18.1.2

यः कश्चित् कुलपुत्र इमं धर्मपर्यायं धारयिष्यति वाचयिष्यति वा देशयिष्यति वा लिखिष्यति वा स कुलपुत्रो वा कुलदुहिता वाष्टौ चक्षुर्गुणशतानि प्रतिलप्स्यते द्वादश श्रोत्रगुणशतानि प्रतिलप्स्यते ऽष्टौ घ्राणगुणशतानि प्रतिलप्स्यते द्वादश जिह्वागुणशतानि प्रतिलप्स्यते ऽष्टौ कायगुणशतानि प्रतिलप्स्यते द्वादश मनोगुणशतानि प्रतिलप्स्यते

yaḥ kaścit kulaputra imaṃ dharmaparyāyaṃ dhārayiṣyati vācayiṣyati vā deśayiṣyati vā likhiṣyati vā sa kulaputro vā kuladuhitā vāṣṭau cakṣurguṇaśatāni pratilapsyate dvādaśa śrotraguṇaśatāni pratilapsyate 'ṣṭau ghrāṇaguṇaśatāni pratilapsyate dvādaśa jihvāguṇaśatāni pratilapsyate 'ṣṭau kāyaguṇaśatāni pratilapsyate dvādaśa manoguṇaśatāni pratilapsyate

18.2

तस्यैभिर् बहुभिर्गुणशतैः षडिन्द्रियग्रामः परिशुद्धः सुपरिशुद्धो भविष्यति

tasyaibhir bahubhirguṇaśataiḥ ṣaḍindriyagrāmaḥ pariśuddhaḥ supariśuddho bhaviṣyati

Saddharmapuṇḍarīkasūtra