15.16.3

असंख्येयास्ते भगवंल्लोकधातवो ऽगणनीयाश् चित्तभूमिसमतिक्रान्ताः

asaṃkhyeyāste bhagavaṃllokadhātavo 'gaṇanīyāś cittabhūmisamatikrāntāḥ

15.17

सर्वश्रावकप्रत्येकबुद्धैरपि भगवन् आर्येण ज्ञानेन न शक्यं चिन्तयितुं वा गणयितुं वा तुलयितुं वा उपलक्षयितुं वा

sarvaśrāvakapratyekabuddhairapi bhagavan āryeṇa jñānena na śakyaṃ cintayituṃ vā gaṇayituṃ vā tulayituṃ vā upalakṣayituṃ vā

15.18

अस्माकमपि तावद् भगवन् अवैवर्त्यभूमिस्थितानां बोधिसत्त्वानां महासत्त्वानाम् अस्मिन् स्थाने चित्तगोचरो न प्रवर्तते

asmākamapi tāvad bhagavan avaivartyabhūmisthitānāṃ bodhisattvānāṃ mahāsattvānām asmin sthāne cittagocaro na pravartate

15.19

तावदप्रमेया भगवंस्ते लोकधातवो भवेयुरिति

tāvadaprameyā bhagavaṃste lokadhātavo bhaveyuriti

15.20

एवमुक्ते भगवांस्तान् बोधिसत्त्वान् महासत्त्वानेतदवोचत्

evamukte bhagavāṃstān bodhisattvān mahāsattvānetadavocat

15.20.2

आरोचयामि वः कुलपुत्राः प्रतिवेदयामि वः

ārocayāmi vaḥ kulaputrāḥ prativedayāmi vaḥ

15.21

यावन्तः कुलपुत्रास्ते लोकधातवो येषु तेन पुरुषेण तानि परमाणुरजांस्युपनिक्षिप्तानि येषु च नोपनिक्षिप्तानि सर्वेषु तेषु कुलपुत्र लोकधातुकोटीनयुतशतसहस्रेषु न तावन्ति परमाणुरजांसि संविद्यन्ते यावन्ति मम कल्पकोटीनयुतशतसहस्राण्यनुत्तरां सम्यक्संबोधिम् अभिसंबुद्धस्य

yāvantaḥ kulaputrāste lokadhātavo yeṣu tena puruṣeṇa tāni paramāṇurajāṃsyupanikṣiptāni yeṣu ca nopanikṣiptāni sarveṣu teṣu kulaputra lokadhātukoṭīnayutaśatasahasreṣu na tāvanti paramāṇurajāṃsi saṃvidyante yāvanti mama kalpakoṭīnayutaśatasahasrāṇyanuttarāṃ samyaksaṃbodhim abhisaṃbuddhasya

15.22

यतःप्रभृत्यहं कुलपुत्रा अस्यां सहायां लोकधातौ सत्त्वानां धर्मं देशयाम्य् अन्येषु च लोकधातुकोटीनयुतशतसहस्रेषु ये च मया कुलपुत्रा अत्रान्तरा तथागता अर्हन्तः सम्यक्संबुद्धाः परिकीर्तिता दीपंकरतथागतप्रभृतयस् तेषां च तथागतानामर्हतां सम्यक्संबुद्धानां परिनिर्वाणानि मयैव तानि कुलपुत्रा उपायकौशल्यधर्मदेशनाभिनिर्हारनिर्मितानि

yataḥprabhṛtyahaṃ kulaputrā asyāṃ sahāyāṃ lokadhātau sattvānāṃ dharmaṃ deśayāmy anyeṣu ca lokadhātukoṭīnayutaśatasahasreṣu ye ca mayā kulaputrā atrāntarā tathāgatā arhantaḥ samyaksaṃbuddhāḥ parikīrtitā dīpaṃkaratathāgataprabhṛtayas teṣāṃ ca tathāgatānāmarhatāṃ samyaksaṃbuddhānāṃ parinirvāṇāni mayaiva tāni kulaputrā upāyakauśalyadharmadeśanābhinirhāranirmitāni

15.23

अपि तु खलु पुनः कुलपुत्रास् तथागत आगतागतानां सत्त्वानाम् इन्द्रियवीर्यवैमात्रतां व्यवलोक्य तस्मिंस्तस्मिन्नात्मनो नाम व्याहरति

api tu khalu punaḥ kulaputrās tathāgata āgatāgatānāṃ sattvānām indriyavīryavaimātratāṃ vyavalokya tasmiṃstasminnātmano nāma vyāharati

15.24

तस्मिंस्तस्मिंश्चात्मनः परिनिर्वाणं व्याहरति तथा तथा च सत्त्वान् परितोषयति नानाविधैर्धर्मपर्यायैः

tasmiṃstasmiṃścātmanaḥ parinirvāṇaṃ vyāharati tathā tathā ca sattvān paritoṣayati nānāvidhairdharmaparyāyaiḥ

15.25

तत्र कुलपुत्रास्तथागतो नानाधिमुक्तानां सत्त्वानामल्पकुशलमूलानां बहूपक्लेशानामेवं वदति

tatra kulaputrāstathāgato nānādhimuktānāṃ sattvānāmalpakuśalamūlānāṃ bahūpakleśānāmevaṃ vadati

15.25.2

दहरो ऽहमस्मि भिक्षवो जात्याभिनिष्क्रान्तः

daharo 'hamasmi bhikṣavo jātyābhiniṣkrāntaḥ

15.26

अचिराभिसंबुद्धो ऽस्मि भिक्षवो ऽनुत्तरां सम्यक्संबोधिम्

acirābhisaṃbuddho 'smi bhikṣavo 'nuttarāṃ samyaksaṃbodhim

15.27

यत्खलु पुनः कुलपुत्रास् तथागत एवं चिराभिसंबुद्ध एवं व्याहरति

yatkhalu punaḥ kulaputrās tathāgata evaṃ cirābhisaṃbuddha evaṃ vyāharati

15.27.2

अचिराभिसंबुद्धो ऽहमस्मीति नान्यत्र सत्त्वानां परिपाचनार्थम्

acirābhisaṃbuddho 'hamasmīti nānyatra sattvānāṃ paripācanārtham

15.28

अवतारणार्थमेते धर्मपर्याया भाषिताः

avatāraṇārthamete dharmaparyāyā bhāṣitāḥ

15.29

सर्वे च ते कुलपुत्रा धर्मपर्यायास्तथागतेन सत्त्वानां विनयार्थाय भाषिताः

sarve ca te kulaputrā dharmaparyāyāstathāgatena sattvānāṃ vinayārthāya bhāṣitāḥ

15.29.2

यां च कुलपुत्रास्तथागतः सत्त्वानां विनयार्थवाचं भाषते आत्मोपदर्शनेन वा परोपदर्शनेन वात्मारम्बणेन वा परारम्बणेन वा यत्किंचित्तथागतो व्याहरति सर्वे ते धर्मपर्यायाः सत्यास्तथागतेन भाषिताः

yāṃ ca kulaputrāstathāgataḥ sattvānāṃ vinayārthavācaṃ bhāṣate ātmopadarśanena vā paropadarśanena vātmārambaṇena vā parārambaṇena vā yatkiṃcittathāgato vyāharati sarve te dharmaparyāyāḥ satyāstathāgatena bhāṣitāḥ

15.30

नास्त्यत्र तथागतस्य मृषावादः

nāstyatra tathāgatasya mṛṣāvādaḥ

15.31

तत्कस्य हेतोः

tatkasya hetoḥ

Saddharmapuṇḍarīkasūtra