Prathamaḥ sargaḥ.11

मृगाः प्रचण्डातपतापिता भृशं तृषा महत्या परिशुष्कतालवः

mṛgāḥ pracaṇḍātapatāpitā bhṛśaṃ tṛṣā mahatyā pariśuṣkatālavaḥ

Prathamaḥ sargaḥ.11.2

वनान्तरे तोयमिति प्रधाविता निरीक्ष्य भिन्नाञ्जनसंनिभं नभः

vanāntare toyamiti pradhāvitā nirīkṣya bhinnāñjanasaṃnibhaṃ nabhaḥ

Prathamaḥ sargaḥ.12

सविभ्रमैः सस्मितजिह्मवीक्षितैर् विलासवत्यो मनसि प्रवासिनाम्

savibhramaiḥ sasmitajihmavīkṣitair vilāsavatyo manasi pravāsinām

Prathamaḥ sargaḥ.12.2

अनङ्गसंदीपनमाशु कुर्वते यथा प्रदोषाः शशिचारुभूषणाः

anaṅgasaṃdīpanamāśu kurvate yathā pradoṣāḥ śaśicārubhūṣaṇāḥ

Prathamaḥ sargaḥ.13

रवेर्मयूखैर् अभितापितो भृशं विदह्यमानः पथि तप्तपांसुभिः

ravermayūkhair abhitāpito bhṛśaṃ vidahyamānaḥ pathi taptapāṃsubhiḥ

Prathamaḥ sargaḥ.13.2

अवाङ्मुखो जिह्मगतिः श्वसन्मुहुः फणी मयूरस्य तले निषीदति

avāṅmukho jihmagatiḥ śvasanmuhuḥ phaṇī mayūrasya tale niṣīdati

Prathamaḥ sargaḥ.14

तृषा महत्या हतविक्रमोद्यमः श्वसन्मुहुर् दूरविदारिताननः

tṛṣā mahatyā hatavikramodyamaḥ śvasanmuhur dūravidāritānanaḥ

Prathamaḥ sargaḥ.14.2

न हन्त्यदूरेऽपि गजान्मृगेश्वरो विलोलजिह्वश्चलिताग्रकेसरः

na hantyadūre'pi gajānmṛgeśvaro vilolajihvaścalitāgrakesaraḥ

Prathamaḥ sargaḥ.15

विशुष्ककण्ठोद्गतसीकराम्भसो गभस्तिभिर् भानुमतो ऽनुतापिताः

viśuṣkakaṇṭhodgatasīkarāmbhaso gabhastibhir bhānumato 'nutāpitāḥ

Prathamaḥ sargaḥ.15.2

प्रवृद्धतृष्णोपहता जलार्थिनो न दन्तिनः केसरिणोऽपि बिभ्यति

pravṛddhatṛṣṇopahatā jalārthino na dantinaḥ kesariṇo'pi bibhyati

Prathamaḥ sargaḥ.16

हुताग्निकल्पैः सवितुर्गभस्तिभिः कलापिनः क्लान्तशरीरचेतसः

hutāgnikalpaiḥ saviturgabhastibhiḥ kalāpinaḥ klāntaśarīracetasaḥ

Prathamaḥ sargaḥ.16.2

न भोगिनं घ्नन्ति समीपवर्तिनं कलापचक्रेषु निवेशिताननम्

na bhoginaṃ ghnanti samīpavartinaṃ kalāpacakreṣu niveśitānanam

Prathamaḥ sargaḥ.17

सभद्रमुस्तं परिशुष्ककर्दमं सरः खनन्न् आयतपोतृमण्डलैः

sabhadramustaṃ pariśuṣkakardamaṃ saraḥ khanann āyatapotṛmaṇḍalaiḥ

Prathamaḥ sargaḥ.17.2

रवेर्मयूखैरभितापितो भृशं वराहयूथो विशतीव भूतलम्

ravermayūkhairabhitāpito bhṛśaṃ varāhayūtho viśatīva bhūtalam

Prathamaḥ sargaḥ.18

विवस्वता तीक्ष्णतरांशुमालिना सपङ्कतोयात् सरसो ऽभितापितः

vivasvatā tīkṣṇatarāṃśumālinā sapaṅkatoyāt saraso 'bhitāpitaḥ

Prathamaḥ sargaḥ.18.2

उत्प्लुत्य भेकस्तृषितस्य भोगिनः फणातपत्रस्य तले निषीदति

utplutya bhekastṛṣitasya bhoginaḥ phaṇātapatrasya tale niṣīdati

Prathamaḥ sargaḥ.19

समुद्धृताशेषमृणालजालकं विपन्नमीनं द्रुतभीतसारसम्

samuddhṛtāśeṣamṛṇālajālakaṃ vipannamīnaṃ drutabhītasārasam

Prathamaḥ sargaḥ.19.2

परस्परोत्पीडनसंहतैर्गजैः कृतं सरः सान्द्रविमर्दकर्दमम्

parasparotpīḍanasaṃhatairgajaiḥ kṛtaṃ saraḥ sāndravimardakardamam

Prathamaḥ sargaḥ.20

रविप्रभोद्भिन्नशिरोमणिप्रभो विलोलजिह्वाद्वयलीढमारुतः

raviprabhodbhinnaśiromaṇiprabho vilolajihvādvayalīḍhamārutaḥ

Prathamaḥ sargaḥ.20.2

विषाग्निसूर्यातपतापितः फणी न हन्ति मण्डूककुलं तृषाकुलः

viṣāgnisūryātapatāpitaḥ phaṇī na hanti maṇḍūkakulaṃ tṛṣākulaḥ

Ṛtusaṃhāra