Caturthaḥ sargaḥ.6

रतिश्रमक्षामविपाण्डुवक्त्राः सम्प्राप्तहर्षाभ्युदयास् तरुण्यः

ratiśramakṣāmavipāṇḍuvaktrāḥ samprāptaharṣābhyudayās taruṇyaḥ

Caturthaḥ sargaḥ.6.2

हसन्ति नोच्चैर् दशनाग्रभिन्नान् प्रपीड्यमानान् अधरान् अवेक्ष्य

hasanti noccair daśanāgrabhinnān prapīḍyamānān adharān avekṣya

Caturthaḥ sargaḥ.7

पीनस्तनोरःस्थलभागशोभाम् आसाद्य तत्पीडनजातखेदः

pīnastanoraḥsthalabhāgaśobhām āsādya tatpīḍanajātakhedaḥ

Caturthaḥ sargaḥ.7.2

तृणाग्रलग्नैस्तुहिनैः पतद्भिर् आक्रन्दतीवोषसि शीतकालः

tṛṇāgralagnaistuhinaiḥ patadbhir ākrandatīvoṣasi śītakālaḥ

Caturthaḥ sargaḥ.8

प्रभूतशालिप्रसवैश्चितानि मृगाङ्गनायूथविभूषितानि

prabhūtaśāliprasavaiścitāni mṛgāṅganāyūthavibhūṣitāni

Caturthaḥ sargaḥ.8.2

मनोहरक्रौञ्चनिनादितानि सीमान्तराण्य् उत्सुकयन्ति चेतः

manoharakrauñcanināditāni sīmāntarāṇy utsukayanti cetaḥ

Caturthaḥ sargaḥ.9

प्रफुल्लनीलोत्पलशोभितानि सोन्मादकादम्बविभूषितानि

praphullanīlotpalaśobhitāni sonmādakādambavibhūṣitāni

Caturthaḥ sargaḥ.9.2

प्रसन्नतोयानि सुशीतलानि सरांसि चेतांसि हरन्ति पुंसाम्

prasannatoyāni suśītalāni sarāṃsi cetāṃsi haranti puṃsām

Caturthaḥ sargaḥ.10

मार्गं समीक्ष्यातिनिरस्तनीरं प्रवासखिन्नं पतिमुद्वहन्त्यः

mārgaṃ samīkṣyātinirastanīraṃ pravāsakhinnaṃ patimudvahantyaḥ

Caturthaḥ sargaḥ.10.2

अवेक्ष्यमाणा हरिणेक्षणाक्ष्यः प्रबोधयन्तीव मनोरथानि

avekṣyamāṇā hariṇekṣaṇākṣyaḥ prabodhayantīva manorathāni

Caturthaḥ sargaḥ.11

पाकं व्रजन्ती हिमजातशीतैर् आधूयमाना सततं मरुद्भिः

pākaṃ vrajantī himajātaśītair ādhūyamānā satataṃ marudbhiḥ

Caturthaḥ sargaḥ.11.2

प्रिये प्रियङ्गुः प्रियविप्रयुक्ता विपाण्डुतां याति विलासिनीव

priye priyaṅguḥ priyaviprayuktā vipāṇḍutāṃ yāti vilāsinīva

Caturthaḥ sargaḥ.12

पुष्पासवामोदसुगन्धिवक्त्रो निःश्वासवातैः सुरभीकृताङ्गः

puṣpāsavāmodasugandhivaktro niḥśvāsavātaiḥ surabhīkṛtāṅgaḥ

Caturthaḥ sargaḥ.12.2

परस्पराङ्गव्यतिषङ्गशायी शेते जनः कामरसानुविद्धः

parasparāṅgavyatiṣaṅgaśāyī śete janaḥ kāmarasānuviddhaḥ

Caturthaḥ sargaḥ.13

दन्तच्छदैः सव्रणदन्तचिह्नैः स्तनैश्च पाण्यग्रकृताभिलेखैः

dantacchadaiḥ savraṇadantacihnaiḥ stanaiśca pāṇyagrakṛtābhilekhaiḥ

Caturthaḥ sargaḥ.13.2

संसूच्यते निर्दयमङ्गनानां रतोपभोगो नवयौवनानाम्

saṃsūcyate nirdayamaṅganānāṃ ratopabhogo navayauvanānām

Caturthaḥ sargaḥ.14

काचिद्विभूषयति दर्पणसक्तहस्ता बालातपेषु वनिता वदनारविन्दम्

kācidvibhūṣayati darpaṇasaktahastā bālātapeṣu vanitā vadanāravindam

Caturthaḥ sargaḥ.14.2

दन्तच्छदं प्रियतमेन निपीतसारं दन्ताग्रभिन्नम् अवकृष्य निरीक्षते च

dantacchadaṃ priyatamena nipītasāraṃ dantāgrabhinnam avakṛṣya nirīkṣate ca

Caturthaḥ sargaḥ.15

अन्या प्रकामसुरतश्रमखिन्नदेहा रात्रिप्रजागरविपाटलनेत्रपद्मा

anyā prakāmasurataśramakhinnadehā rātriprajāgaravipāṭalanetrapadmā

Caturthaḥ sargaḥ.15.2

स्रस्तांसदेशललिताकुलकेशपाशा निद्रां प्रयाति मृदुसूर्यकराभितप्ता

srastāṃsadeśalalitākulakeśapāśā nidrāṃ prayāti mṛdusūryakarābhitaptā

Ṛtusaṃhāra