1.3.3.2

येभिर् याथ उप सूर्यां वरेयं तेभिर् नो दस्रा वर्धतं समत्सु

yebhir yātha upa sūryāṃ vareyaṃ tebhir no dasrā vardhataṃ samatsu

1.3.4

यद् वां रेतो अश्विना पोषयित्नु यद् रासभो वध्रिमत्यैः

yad vāṃ reto aśvinā poṣayitnu yad rāsabho vadhrimatyaiḥ

1.3.4.2

यस्माज्जज्ञे देवकामः सुदक्षस् तद् अस्यै दत्तं भिषजाव् अभिद्यू

yasmājjajñe devakāmaḥ sudakṣas tad asyai dattaṃ bhiṣajāv abhidyū

1.3.5

यन् नासत्या भेषजं चित्रभानु येनावथुस् तोककामाम् उ नु घोषाम्

yan nāsatyā bheṣajaṃ citrabhānu yenāvathus tokakāmām u nu ghoṣām

1.3.5.2

तद् अस्यै दत्तं त्रिषु पुंसु वध्वै येनाविन्दतु नयं सा सुहस्त्यम्

tad asyai dattaṃ triṣu puṃsu vadhvai yenāvindatu nayaṃ sā suhastyam

1.3.6

वषड् वां दस्राव् अस्मिन् सुते नासत्या होता कृणोतु वेधाः

vaṣaḍ vāṃ dasrāv asmin sute nāsatyā hotā kṛṇotu vedhāḥ

1.3.6.2

सिस्रतां नार्य् ऋतप्रजाता वि पर्वाणि जिहतां सूतवा उ

sisratāṃ nāry ṛtaprajātā vi parvāṇi jihatāṃ sūtavā u

1.3.7

एवा निषच् चोपनिषच् च विप्रा युवां रेभत्यौ सयुजा सुपर्ण्यौ

evā niṣac copaniṣac ca viprā yuvāṃ rebhatyau sayujā suparṇyau

1.3.7.2

ब्राह्मण्यक्रतू विदथेषु शक्रा धत्तं तयोस् तनयं तोकम् अग्र्यम्

brāhmaṇyakratū vidatheṣu śakrā dhattaṃ tayos tanayaṃ tokam agryam

1.4.1

ज्योतिष्मन्तं केतुमन्तं त्रिचक्रं सुखं रथं सुषदं भूरिमायम्

jyotiṣmantaṃ ketumantaṃ tricakraṃ sukhaṃ rathaṃ suṣadaṃ bhūrimāyam

1.4.1.2

चित्रामघा यस्य योगे इधि जज्ञे तं वां हुवे अतिरिक्तं पिबध्यै

citrāmaghā yasya yoge idhi jajñe taṃ vāṃ huve atiriktaṃ pibadhyai

1.4.2

युवं देवा क्रतुना पूर्व्येण युक्ता रथेन तविषं यजत्रा

yuvaṃ devā kratunā pūrvyeṇa yuktā rathena taviṣaṃ yajatrā

1.4.2.2

आ गच्छतं नासत्या शचीभिर् इदं तृतीयं सवनं पिबाथः

ā gacchataṃ nāsatyā śacībhir idaṃ tṛtīyaṃ savanaṃ pibāthaḥ

1.4.3

युवां देवास् त्रय एकादशासः सत्या सत्यस्य दधिरे पुरस्तात्

yuvāṃ devās traya ekādaśāsaḥ satyā satyasya dadhire purastāt

1.4.3.2

अस्माकं यज्ञं सवनं जुषाणा पातं सोमम् अश्विना दीद्यग्नी

asmākaṃ yajñaṃ savanaṃ juṣāṇā pātaṃ somam aśvinā dīdyagnī

1.4.4

पनाय्यं तद् अश्विनाकृतं वां वृषभो दिवो रजसः पृथिव्याः

panāyyaṃ tad aśvinākṛtaṃ vāṃ vṛṣabho divo rajasaḥ pṛthivyāḥ

1.4.4.2

सहस्रं शंसा उत ये गविष्ठौ सर्वान् इत् ताṁ उप यातं पिबध्यै

sahasraṃ śaṃsā uta ye gaviṣṭhau sarvān it tāṁ upa yātaṃ pibadhyai

1.4.5

अयं वां भागो निहितो यजत्रेमा गिरो नासत्योप यातम्

ayaṃ vāṃ bhāgo nihito yajatremā giro nāsatyopa yātam

1.4.5.2

पिबतं सोमं मधुमन्तम् अश्विना प्र दाश्वांसम् अवतं शचीभिः

pibataṃ somaṃ madhumantam aśvinā pra dāśvāṃsam avataṃ śacībhiḥ

1.4.6

ज्योतिष्मन्तं सुप्रतीकम् अजस्रेण भानुना दीद्यग्नी

jyotiṣmantaṃ supratīkam ajasreṇa bhānunā dīdyagnī

Ṛgvedakhilāni