3.3.1

वैश्वानराय पृथुपाजसे विपो रत्ना विधन्त धरुणेषु गातवे

vaiśvānarāya pṛthupājase vipo ratnā vidhanta dharuṇeṣu gātave

3.3.1.2

अग्निर् हि देवाṁ अमृतो दुवस्यत्य् अथा धर्माणि सनता न दूदुषत्

agnir hi devāṁ amṛto duvasyaty athā dharmāṇi sanatā na dūduṣat

3.3.2

अन्तर् दूतो रोदसी दस्म ईयते होता निषत्तो मनुषः पुरोहितः

antar dūto rodasī dasma īyate hotā niṣatto manuṣaḥ purohitaḥ

3.3.2.2

क्षयम् बृहन्तम् परि भूषति द्युभिर् देवेभिर् अग्निर् इषितो धियावसुः

kṣayam bṛhantam pari bhūṣati dyubhir devebhir agnir iṣito dhiyāvasuḥ

3.3.3

केतुं यज्ञानां विदथस्य साधनं विप्रासो अग्निम् महयन्त चित्तिभिः

ketuṃ yajñānāṃ vidathasya sādhanaṃ viprāso agnim mahayanta cittibhiḥ

3.3.3.2

अपांसि यस्मिन्न् अधि संदधुर् गिरस् तस्मिन् सुम्नानि यजमान आ चके

apāṃsi yasminn adhi saṃdadhur giras tasmin sumnāni yajamāna ā cake

3.3.4

पिता यज्ञानाम् असुरो विपश्चितां विमानम् अग्निर् वयुनं च वाघताम्

pitā yajñānām asuro vipaścitāṃ vimānam agnir vayunaṃ ca vāghatām

3.3.4.2

आ विवेश रोदसी भूरिवर्पसा पुरुप्रियो भन्दते धामभिः कविः

ā viveśa rodasī bhūrivarpasā purupriyo bhandate dhāmabhiḥ kaviḥ

3.3.5

चन्द्रम् अग्निं चन्द्ररथं हरिव्रतं वैश्वानरम् अप्सुषदं स्वर्विदम्

candram agniṃ candrarathaṃ harivrataṃ vaiśvānaram apsuṣadaṃ svarvidam

3.3.5.2

विगाहं तूर्णिं तविषीभिर् आवृतम् भूर्णिं देवास इह सुश्रियं दधुः

vigāhaṃ tūrṇiṃ taviṣībhir āvṛtam bhūrṇiṃ devāsa iha suśriyaṃ dadhuḥ

3.3.6

अग्निर् देवेभिर् मनुषश् च जन्तुभिस् तन्वानो यज्ञम् पुरुपेशसं धिया

agnir devebhir manuṣaś ca jantubhis tanvāno yajñam purupeśasaṃ dhiyā

3.3.6.2

रथीर् अन्तर् ईयते साधदिष्टिभिर् जीरो दमूना अभिशस्तिचातनः

rathīr antar īyate sādhadiṣṭibhir jīro damūnā abhiśasticātanaḥ

3.3.7

अग्ने जरस्व स्वपत्य आयुन्य् ऊर्जा पिन्वस्व सम् इषो दिदीहि नः

agne jarasva svapatya āyuny ūrjā pinvasva sam iṣo didīhi naḥ

3.3.7.2

वयांसि जिन्व बृहतश् च जागृव उशिग् देवानाम् असि सुक्रतुर् विपाम्

vayāṃsi jinva bṛhataś ca jāgṛva uśig devānām asi sukratur vipām

3.3.8

विश्पतिं यह्वम् अतिथिं नरः सदा यन्तारं धीनाम् उशिजं च वाघताम्

viśpatiṃ yahvam atithiṃ naraḥ sadā yantāraṃ dhīnām uśijaṃ ca vāghatām

3.3.8.2

अध्वराणां चेतनं जातवेदसम् प्र शंसन्ति नमसा जूतिभिर् वृधे

adhvarāṇāṃ cetanaṃ jātavedasam pra śaṃsanti namasā jūtibhir vṛdhe

3.3.9

विभावा देवः सुरणः परि क्षितीर् अग्निर् बभूव शवसा सुमद्रथः

vibhāvā devaḥ suraṇaḥ pari kṣitīr agnir babhūva śavasā sumadrathaḥ

3.3.9.2

तस्य व्रतानि भूरिपोषिणो वयम् उप भूषेम दम आ सुवृक्तिभिः

tasya vratāni bhūripoṣiṇo vayam upa bhūṣema dama ā suvṛktibhiḥ

3.3.10

वैश्वानर तव धामान्य् आ चके येभिः स्वर्विद् अभवो विचक्षण

vaiśvānara tava dhāmāny ā cake yebhiḥ svarvid abhavo vicakṣaṇa

3.3.10.2

जात आपृणो भुवनानि रोदसी अग्ने ता विश्वा परिभूर् असि त्मना

jāta āpṛṇo bhuvanāni rodasī agne tā viśvā paribhūr asi tmanā