10.121.2.2

यस्य छायामृतं यस्य मृत्युः कस्मै देवाय हविषा विधेम

yasya chāyāmṛtaṃ yasya mṛtyuḥ kasmai devāya haviṣā vidhema

10.121.2.2

यः प्राणतः निमिषतः महित्वा एकः इद् राजा जगतः बभूव यः ईशे अस्य द्विपदः चतुष्पदः कस्मै देवाय हविषा विधेम

yaḥ prāṇataḥ nimiṣataḥ mahitvā ekaḥ id rājā jagataḥ babhūva yaḥ īśe asya dvipadaḥ catuṣpadaḥ kasmai devāya haviṣā vidhema

10.121.4

यस्येमे हिमवन्तो महित्वा यस्य समुद्रं रसया सहाहुः

yasyeme himavanto mahitvā yasya samudraṃ rasayā sahāhuḥ

10.121.4.2

यस्येमाः प्रदिशो यस्य बाहू कस्मै देवाय हविषा विधेम

yasyemāḥ pradiśo yasya bāhū kasmai devāya haviṣā vidhema

10.121.5

येन द्यौर् उग्रा पृथिवी च दृढा येन स्व स्तभितं येन नाकः

yena dyaur ugrā pṛthivī ca dṛḍhā yena sva stabhitaṃ yena nākaḥ

10.121.5.2

यो अन्तरिक्षे रजसो विमानः कस्मै देवाय हविषा विधेम

yo antarikṣe rajaso vimānaḥ kasmai devāya haviṣā vidhema

10.121.6

यं क्रन्दसी अवसा तस्तभाने अभ्य् ऐक्षेताम् मनसा रेजमाने

yaṃ krandasī avasā tastabhāne abhy aikṣetām manasā rejamāne

10.121.6.2

यत्राधि सूर उदितो विभाति कस्मै देवाय हविषा विधेम

yatrādhi sūra udito vibhāti kasmai devāya haviṣā vidhema

10.121.7

आपो ह यद् बृहतीर् विश्वम् आयन् गर्भं दधाना जनयन्तीर् अग्निम्

āpo ha yad bṛhatīr viśvam āyan garbhaṃ dadhānā janayantīr agnim

10.121.7.2

ततो देवानां सम् अवर्ततासुर् एकः कस्मै देवाय हविषा विधेम

tato devānāṃ sam avartatāsur ekaḥ kasmai devāya haviṣā vidhema

10.121.8

यश् चिद् आपो महिना पर्यपश्यद् दक्षं दधाना जनयन्तीर् यज्ञम्

yaś cid āpo mahinā paryapaśyad dakṣaṃ dadhānā janayantīr yajñam

10.121.8.2

यो देवेष्व् अधि देव एक आसीत् कस्मै देवाय हविषा विधेम

yo deveṣv adhi deva eka āsīt kasmai devāya haviṣā vidhema

10.121.9

मा नो हिंसीज् जनिता यः पृथिव्या यो वा दिवं सत्यधर्मा जजान

mā no hiṃsīj janitā yaḥ pṛthivyā yo vā divaṃ satyadharmā jajāna

10.121.9.2

यश् चापश् चन्द्रा बृहतीर् जजान कस्मै देवाय हविषा विधेम

yaś cāpaś candrā bṛhatīr jajāna kasmai devāya haviṣā vidhema

10.121.10

प्रजापते न त्वद् एतान्य् अन्यो विश्वा जातानि परि ता बभूव

prajāpate na tvad etāny anyo viśvā jātāni pari tā babhūva

10.121.10.2

यत्कामास् ते जुहुमस् तन् नो अस्तु वयं स्याम पतयो रयीणाम्

yatkāmās te juhumas tan no astu vayaṃ syāma patayo rayīṇām

10.122.1

वसुं न चित्रमहसं गृणीषे वामं शेवम् अतिथिम् अद्विषेण्यम्

vasuṃ na citramahasaṃ gṛṇīṣe vāmaṃ śevam atithim adviṣeṇyam

10.122.1.2

स रासते शुरुधो विश्वधायसो ऽग्निर् होता गृहपतिः सुवीर्यम्

sa rāsate śurudho viśvadhāyaso 'gnir hotā gṛhapatiḥ suvīryam

10.122.2

जुषाणो अग्ने प्रति हर्य मे वचो विश्वानि विद्वान् वयुनानि सुक्रतो

juṣāṇo agne prati harya me vaco viśvāni vidvān vayunāni sukrato

10.122.2.2

घृतनिर्णिग् ब्रह्मणे गातुम् एरय तव देवा अजनयन्न् अनु व्रतम्

ghṛtanirṇig brahmaṇe gātum eraya tava devā ajanayann anu vratam