1.1

रसेन्द्रमिव निःशेषजराव्याधिविनाशनम्

rasendramiva niḥśeṣajarāvyādhivināśanam

1.1.2

प्रणमामि गुरुं भक्त्या शङ्करं योगसाधनम्

praṇamāmi guruṃ bhaktyā śaṅkaraṃ yogasādhanam

1.2

नत्वा गुरुपदद्वन्द्वं दृष्ट्वा तन्त्राण्यनेकशः

natvā gurupadadvandvaṃ dṛṣṭvā tantrāṇyanekaśaḥ

1.2.2

श्रीलगोपालकृष्णेन क्रियते रससंग्रहः

śrīlagopālakṛṣṇena kriyate rasasaṃgrahaḥ

1.3

सिद्धयोगाश्च ये केचित्कृतिसाध्या भवन्ति हि

siddhayogāśca ye kecitkṛtisādhyā bhavanti hi

1.3.2

एकीकृत्य तु ते सर्वे लिख्यन्ते यत्नतो मया

ekīkṛtya tu te sarve likhyante yatnato mayā

1.4

अल्पमात्रोपयोगित्वाद् अरुचेर् अप्रसङ्गतः

alpamātropayogitvād arucer aprasaṅgataḥ

1.4.2

क्षिप्रम् आरोग्यदायित्वाद् औषधेभ्योऽधिको रसः

kṣipram ārogyadāyitvād auṣadhebhyo'dhiko rasaḥ

1.5

साध्येषु भेषजं सर्वमीरितं तत्त्ववेदिना

sādhyeṣu bheṣajaṃ sarvamīritaṃ tattvavedinā

1.5.2

असाध्येष्वपि दातव्यो रसोऽतः श्रेष्ठ उच्यते

asādhyeṣvapi dātavyo raso'taḥ śreṣṭha ucyate

1.6

हतो हन्ति जराव्याधिं मूर्छितो व्याधिघातकः

hato hanti jarāvyādhiṃ mūrchito vyādhighātakaḥ

1.6.2

बद्धः खेचरतां धत्ते कोऽन्यः सूतात्कृपाकरः

baddhaḥ khecaratāṃ dhatte ko'nyaḥ sūtātkṛpākaraḥ

1.7

रसेन्द्रः पारदः सूतः सूतराजश्च सूतकः

rasendraḥ pāradaḥ sūtaḥ sūtarājaśca sūtakaḥ

1.7.2

शिवतेजो रसः सप्त नामान्येवं रसस्य तु

śivatejo rasaḥ sapta nāmānyevaṃ rasasya tu

1.8

शिवबीजं रसः सूतः पारदश्च रसेन्द्रकः

śivabījaṃ rasaḥ sūtaḥ pāradaśca rasendrakaḥ

1.8.2

एतानि रसनामानि तथान्यानि यथा शिवे

etāni rasanāmāni tathānyāni yathā śive

1.9

अन्तः सुनीलो बहिरुज्ज्वलो यो मध्याह्नसूर्यप्रतिमप्रकाशः

antaḥ sunīlo bahirujjvalo yo madhyāhnasūryapratimaprakāśaḥ

1.9.2

शस्तोऽथ धूम्रः परिपाण्डुरश्च चित्रो न योज्यो रसकर्मसिद्धौ

śasto'tha dhūmraḥ paripāṇḍuraśca citro na yojyo rasakarmasiddhau

1.10

नागो वङ्गो मलो वह्निश्चाञ्चल्यं च विषं गिरिः

nāgo vaṅgo malo vahniścāñcalyaṃ ca viṣaṃ giriḥ

1.10.2

असह्याग्निर्महादोषा निसर्गाः पारदे स्थिताः

asahyāgnirmahādoṣā nisargāḥ pārade sthitāḥ

Rasendrasārasaṃgraha