3.57.2

एतत्प्रक्रियाद्वयमपि कृत्वा व्यवहरन्त्यन्ये

etatprakriyādvayamapi kṛtvā vyavaharantyanye

3.58

सतुत्थटङ्कणस्वर्जिपटुताम्रे त्र्यहोषितम्

satutthaṭaṅkaṇasvarjipaṭutāmre tryahoṣitam

3.58.2

काञ्जिकं भावितं तेन गन्धाद्यं क्षरति क्षणात्

kāñjikaṃ bhāvitaṃ tena gandhādyaṃ kṣarati kṣaṇāt

3.59

विडे सकाञ्जिके क्षिप्तो रसः स्याद् ग्रासलालसः

viḍe sakāñjike kṣipto rasaḥ syād grāsalālasaḥ

3.59.2

ग्रसते सर्वलोहानि सर्वसत्त्वानि वज्रकम्

grasate sarvalohāni sarvasattvāni vajrakam

3.60

शङ्खचूर्णं रविक्षीरैरातपे भावयेद्दिनम्

śaṅkhacūrṇaṃ ravikṣīrairātape bhāvayeddinam

3.60.2

तद्वज्जम्बीरजद्रावैर् दिनैकं धूमसारकम्

tadvajjambīrajadrāvair dinaikaṃ dhūmasārakam

3.61

सौवर्चलमजामूत्रैर् भाव्यं यामचतुष्टयम्

sauvarcalamajāmūtrair bhāvyaṃ yāmacatuṣṭayam

3.61.2

कण्टकारीं च संक्वाथ्य दिनैकं नरमूत्रकैः

kaṇṭakārīṃ ca saṃkvāthya dinaikaṃ naramūtrakaiḥ

3.62

स्वर्जिक्षारं तिन्तिडीकं कासीसं तु शिलाजतु

svarjikṣāraṃ tintiḍīkaṃ kāsīsaṃ tu śilājatu

3.62.2

जम्बीरोत्थद्रवैर् भाव्यं पृथग्यामचतुष्टयम्

jambīrotthadravair bhāvyaṃ pṛthagyāmacatuṣṭayam

3.63

निस्तुषं जयपालं च मूलकानां द्रवैर्दिनम्

nistuṣaṃ jayapālaṃ ca mūlakānāṃ dravairdinam

3.63.2

सैन्धवं टङ्कणं गुञ्जां दिनं शिग्रुजटाम्भसा

saindhavaṃ ṭaṅkaṇaṃ guñjāṃ dinaṃ śigrujaṭāmbhasā

3.64

एतत्सर्वं समांशं तु मर्द्यं जम्बीरजद्रवैः

etatsarvaṃ samāṃśaṃ tu mardyaṃ jambīrajadravaiḥ

3.64.2

तद्गोलं रक्षयेद्यत्नाद् विडोऽयं वडवानलः

tadgolaṃ rakṣayedyatnād viḍo'yaṃ vaḍavānalaḥ

3.65

अनेन मर्दितः सूतः संस्थितस् तप्तखल्वके

anena marditaḥ sūtaḥ saṃsthitas taptakhalvake

3.65.2

स्वर्णादिसर्वलोहानि सत्त्वानि ग्रसते क्षणात्

svarṇādisarvalohāni sattvāni grasate kṣaṇāt

3.66

मूलकार्द्रकवह्नीनां क्षारं गोमूत्रगालितम्

mūlakārdrakavahnīnāṃ kṣāraṃ gomūtragālitam

3.66.2

वस्त्रपूतो द्रवो ग्राह्यो गन्धकं तेन भावयेत्

vastrapūto dravo grāhyo gandhakaṃ tena bhāvayet

3.66.3

शतवारं खरे घर्मे विडोऽयं हेमजारणे

śatavāraṃ khare gharme viḍo'yaṃ hemajāraṇe

Rasendracintāmaṇi