2.9.3

पीताभमभ्रकं यत्तु श्रेष्ठं तत्पीतकर्मणि

pītābhamabhrakaṃ yattu śreṣṭhaṃ tatpītakarmaṇi

2.10

चतुर्विधं वरं व्योम यद्यप्युक्तं रसायने

caturvidhaṃ varaṃ vyoma yadyapyuktaṃ rasāyane

2.10.2

तथापि कृष्णवर्णाभ्रं कोटिकोटिगुणाधिकम्

tathāpi kṛṣṇavarṇābhraṃ koṭikoṭiguṇādhikam

2.11

स्निग्धं पृथुदलं वर्णसंयुक्तं भारतो ऽधिकम्

snigdhaṃ pṛthudalaṃ varṇasaṃyuktaṃ bhārato 'dhikam

2.11.2

सुखनिर्मोच्यपत्त्रं च तदभ्रं शस्तमीरितम्

sukhanirmocyapattraṃ ca tadabhraṃ śastamīritam

2.12

सचन्द्रिकं च किट्टाभं व्योम न ग्रासयेद्रसः

sacandrikaṃ ca kiṭṭābhaṃ vyoma na grāsayedrasaḥ

2.12.2

ग्रसितश्च नियोज्यो ऽसौ लोहे चैव रसायने

grasitaśca niyojyo 'sau lohe caiva rasāyane

2.13

निश्चन्द्रिकं मृतं व्योम सेव्यं सर्वगदेषु च

niścandrikaṃ mṛtaṃ vyoma sevyaṃ sarvagadeṣu ca

2.13.2

सेवितं चन्द्रसंयुक्तं मेहं मन्दानलं चरेत्

sevitaṃ candrasaṃyuktaṃ mehaṃ mandānalaṃ caret

2.14

यैर् उक्तं युक्तिनिर्मुक्तैः पत्त्राभ्रकरसायनम्

yair uktaṃ yuktinirmuktaiḥ pattrābhrakarasāyanam

2.14.2

तैर् दृष्टं कालकूटाख्यं विषं जीवनहेतवे

tair dṛṣṭaṃ kālakūṭākhyaṃ viṣaṃ jīvanahetave

2.15

सत्त्वार्थं सेवनार्थं च योजयेच्छोधिताभ्रकम्

sattvārthaṃ sevanārthaṃ ca yojayecchodhitābhrakam

2.15.2

अन्यथा त्व् अगुणं कृत्वा विकरोत्येव निश्चितम्

anyathā tv aguṇaṃ kṛtvā vikarotyeva niścitam

2.16

प्रतप्तं सप्तवाराणि निक्षिप्तं काञ्जिके ऽभ्रकम्

prataptaṃ saptavārāṇi nikṣiptaṃ kāñjike 'bhrakam

2.16.2

निर्दोषं जायते नूनं प्रक्षिप्तं वापि गोजले

nirdoṣaṃ jāyate nūnaṃ prakṣiptaṃ vāpi gojale

2.17

त्रिफलाक्वथिते चापि गवां दुग्धे विशेषतः

triphalākvathite cāpi gavāṃ dugdhe viśeṣataḥ

2.17.2

ततो धान्याभ्रकं कृत्वा पिष्ट्वा मत्स्याक्षिकारसैः

tato dhānyābhrakaṃ kṛtvā piṣṭvā matsyākṣikārasaiḥ

2.18

चक्रीं कृत्वा विशोष्याथ पुटेद् अर्धेभके पुटे

cakrīṃ kṛtvā viśoṣyātha puṭed ardhebhake puṭe

2.18.2

पुटेदेवं हि षड्वारं पौनर्नवरसैः सह

puṭedevaṃ hi ṣaḍvāraṃ paunarnavarasaiḥ saha

2.19

कलांशटङ्कणेनापि संमर्द्य कृतचक्रिकम्

kalāṃśaṭaṅkaṇenāpi saṃmardya kṛtacakrikam

Rasaratnasamuccaya