9.59.2

सम्यक् तोयमृदा रुद्ध्वा सम्यगत्रोच्यमानया

samyak toyamṛdā ruddhvā samyagatrocyamānayā

9.60

लेहवत्कृतबब्बूलक्वाथेन परिमर्दितम्

lehavatkṛtababbūlakvāthena parimarditam

9.60.2

जीर्णकिट्टरजः सूक्ष्मं गुडचूर्णसमन्वितम्

jīrṇakiṭṭarajaḥ sūkṣmaṃ guḍacūrṇasamanvitam

9.60.3

इयं हि जलमृत् प्रोक्ता दुर्भेद्या सलिलैः खलु

iyaṃ hi jalamṛt proktā durbhedyā salilaiḥ khalu

9.61

खटिकापटुकिट्टैश्च महिषीदुग्धमर्दितैः

khaṭikāpaṭukiṭṭaiśca mahiṣīdugdhamarditaiḥ

9.61.2

वह्निमृत्स्ना भवेद् घोरवह्नितापसहा खलु

vahnimṛtsnā bhaved ghoravahnitāpasahā khalu

9.62

एतया मृत्स्नया रुद्धो न गन्तुं क्षमते रसः

etayā mṛtsnayā ruddho na gantuṃ kṣamate rasaḥ

9.62.2

विदग्धवनिताप्रौढप्रेम्णा रुद्धः पुमानिव

vidagdhavanitāprauḍhapremṇā ruddhaḥ pumāniva

9.63

नन्दी नागार्जुनश्चैव ब्रह्मज्योतिर् मुनीश्वरः

nandī nāgārjunaścaiva brahmajyotir munīśvaraḥ

9.63.2

वेत्ति श्रीसोमदेवश्च नापरः पृथिवीतले

vetti śrīsomadevaśca nāparaḥ pṛthivītale

9.64

ततो जलं विनिक्षिप्य वह्निं प्रज्वालयेदधः

tato jalaṃ vinikṣipya vahniṃ prajvālayedadhaḥ

9.64.2

नाभियन्त्रमिदं प्रोक्तं नन्दिना सर्ववेदिना

nābhiyantramidaṃ proktaṃ nandinā sarvavedinā

9.64.3

अनेन जीर्यते सूतो निर्धूमः शुद्धगन्धकः

anena jīryate sūto nirdhūmaḥ śuddhagandhakaḥ

9.65

मूषां मूषोदराविष्टाम् आद्यन्तःसमवर्तुलाम्

mūṣāṃ mūṣodarāviṣṭām ādyantaḥsamavartulām

9.65.2

चिपिटां च तले प्रोक्तं ग्रस्तयन्त्रं मनीषिभिः

cipiṭāṃ ca tale proktaṃ grastayantraṃ manīṣibhiḥ

9.65.3

सूतेन्द्ररन्धनार्थं हि रसविद्भिर् उदीरितम्

sūtendrarandhanārthaṃ hi rasavidbhir udīritam

9.66

स्थाल्यां ताम्रादि निक्षिप्य मल्लेनास्यं निरुध्य च

sthālyāṃ tāmrādi nikṣipya mallenāsyaṃ nirudhya ca

9.66.2

पच्यते स्थालिकाधस्तात् स्थालीयन्त्रम् इदं स्मृतम्

pacyate sthālikādhastāt sthālīyantram idaṃ smṛtam

9.67

विधायाष्टाङ्गुलं पात्रं लौहमष्टाङ्गुलोच्छ्रयम्

vidhāyāṣṭāṅgulaṃ pātraṃ lauhamaṣṭāṅgulocchrayam

9.67.2

कण्ठाधो ह्य् अङ्गुले देशे गलाधारे हि तत्र च

kaṇṭhādho hy aṅgule deśe galādhāre hi tatra ca

Rasaratnasamuccaya