7.53

ये क्षेत्रतोयप्रभवाश्च दोषाः सर्वेषु रत्नेषु गलन्ति सम्यक्

ye kṣetratoyaprabhavāśca doṣāḥ sarveṣu ratneṣu galanti samyak

7.54

तेषां च शुद्धिं शृणु भैरवोक्तां यथा हि दोषस्य विनाशनं स्यात्

teṣāṃ ca śuddhiṃ śṛṇu bhairavoktāṃ yathā hi doṣasya vināśanaṃ syāt

7.54.2

अम्लेन वै शुध्यति माणिक्याख्यं जयन्तिकायाः स्वरसेन मौक्तिकम्

amlena vai śudhyati māṇikyākhyaṃ jayantikāyāḥ svarasena mauktikam

7.55

क्षारेण सर्वेण हि विद्रुमं च गोदुग्धतस् तार्क्ष्यमुपैति शुद्धिम्

kṣāreṇa sarveṇa hi vidrumaṃ ca godugdhatas tārkṣyamupaiti śuddhim

7.55.2

धान्यस्याम्लैः पुष्परागस्य शुद्धिं कौलत्थे वै क्वाथ्यमानं हि वज्रम्

dhānyasyāmlaiḥ puṣparāgasya śuddhiṃ kaulatthe vai kvāthyamānaṃ hi vajram

7.56

नीलं नीलीपत्रजातै रसैश्च गोमेदं वै रोचनाया रसेन

nīlaṃ nīlīpatrajātai rasaiśca gomedaṃ vai rocanāyā rasena

7.56.2

वैडूर्यं चेदुत्तमाक्वाथयुक्तं यामैकैकं स्वेदितं शुद्धिमेति

vaiḍūryaṃ ceduttamākvāthayuktaṃ yāmaikaikaṃ sveditaṃ śuddhimeti

7.57

तालगंधकशिलासमन्वितं मर्दयेल्लकुचवारिणा खलु

tālagaṃdhakaśilāsamanvitaṃ mardayellakucavāriṇā khalu

7.57.2

वज्रवर्ज्यमपि चाष्टभिः पुटै रत्नभस्म भवतीति निश्चितम्

vajravarjyamapi cāṣṭabhiḥ puṭai ratnabhasma bhavatīti niścitam

7.58

रामठं लवणपंचकं सदा क्षारयुग्ममपि चेत्सुपेषितम्

rāmaṭhaṃ lavaṇapaṃcakaṃ sadā kṣārayugmamapi cetsupeṣitam

7.58.2

चूलिकालवणमम्लवेतसं पक्वकुम्भिकफलं तथैव च

cūlikālavaṇamamlavetasaṃ pakvakumbhikaphalaṃ tathaiva ca

7.59

चित्रमूलकरुदन्तिके शुभा जम्बुकी जलयुता द्रवन्तिका

citramūlakarudantike śubhā jambukī jalayutā dravantikā

7.59.2

अर्कदुग्धसमसौधदुग्धकं सर्वमेव मृदितं शिलातले

arkadugdhasamasaudhadugdhakaṃ sarvameva mṛditaṃ śilātale

7.60

गोलमस्य च विधाय निक्षिपेद्रत्नजातिषु वराणि पेषयेत्

golamasya ca vidhāya nikṣipedratnajātiṣu varāṇi peṣayet

7.60.2

भूर्जपत्रमभिवेष्ट्य गोलके गोलकोपरि निवेष्ट्य सूत्रतः

bhūrjapatramabhiveṣṭya golake golakopari niveṣṭya sūtrataḥ

7.61

वस्त्रेण संवेष्ट्य ततः प्रयत्नाद् दोलाख्ययंत्रेऽथ निवेश्य गोलकम्

vastreṇa saṃveṣṭya tataḥ prayatnād dolākhyayaṃtre'tha niveśya golakam

7.61.2

सर्वाम्लयुक्ते तुषवारिपूरिते पात्रं दृढे मृण्मयसंज्ञके हि

sarvāmlayukte tuṣavāripūrite pātraṃ dṛḍhe mṛṇmayasaṃjñake hi

7.62

दिनत्रयं स्वेदनकं विधेयमाहृत्य तस्माद्वरगोलकं हि

dinatrayaṃ svedanakaṃ vidheyamāhṛtya tasmādvaragolakaṃ hi

7.62.2

संक्षालयेच्चाम्लजलेन चापि संजायते रत्नभवा द्रुतिश्च

saṃkṣālayeccāmlajalena cāpi saṃjāyate ratnabhavā drutiśca

7.63

वर्णेन सा रत्ननिभा च कान्त्या लघ्वी भवेद्देहकरी च सम्यक्

varṇena sā ratnanibhā ca kāntyā laghvī bhaveddehakarī ca samyak

Rasaprakāśasudhākara