4.118

संशोधनान्येव हि मारणानि गुणागुणान्येव मयोदितानि

saṃśodhanānyeva hi māraṇāni guṇāguṇānyeva mayoditāni

4.118.2

अन्यानि शास्त्राणि सुविस्तराणि निरीक्ष्य यत्नात्कृतमेव सम्यक्

anyāni śāstrāṇi suvistarāṇi nirīkṣya yatnātkṛtameva samyak

5.1

अथेदानीं प्रवक्ष्यामि गुणाधिक्यान्महारसान्

athedānīṃ pravakṣyāmi guṇādhikyānmahārasān

5.1.2

तेषां नामानि वर्गांश्च सत्त्वानि तद्गुणांस्तथा

teṣāṃ nāmāni vargāṃśca sattvāni tadguṇāṃstathā

5.2

क्रमेण गगनं ताप्यं वैक्रांतं विमलं तथा

krameṇa gaganaṃ tāpyaṃ vaikrāṃtaṃ vimalaṃ tathā

5.2.2

रसकं शैलसंभूतं राजावर्तकसस्यके

rasakaṃ śailasaṃbhūtaṃ rājāvartakasasyake

5.2.3

एते महारसाश्चाष्टावुदिता रसवादिभिः

ete mahārasāścāṣṭāvuditā rasavādibhiḥ

5.3

क्रमप्राप्तमहं वक्ष्ये गगनं तु चतुर्विधम्

kramaprāptamahaṃ vakṣye gaganaṃ tu caturvidham

5.3.2

श्वेतं रक्तं तथा पीतं कृष्णं परमसुंदरम्

śvetaṃ raktaṃ tathā pītaṃ kṛṣṇaṃ paramasuṃdaram

5.4

श्वेतं श्वेतक्रियायोग्यं रक्तं पीतं हि पीतकृत्

śvetaṃ śvetakriyāyogyaṃ raktaṃ pītaṃ hi pītakṛt

5.4.2

कृष्णाभ्रं सर्वरोगाणां नाशनं परमं सदा

kṛṣṇābhraṃ sarvarogāṇāṃ nāśanaṃ paramaṃ sadā

5.5

वज्रं पिनाकं नागं च मंडूकमभिधीयते

vajraṃ pinākaṃ nāgaṃ ca maṃḍūkamabhidhīyate

5.5.2

अनेन विधिना प्रोक्ता भेदाः सन्तीह षोडश

anena vidhinā proktā bhedāḥ santīha ṣoḍaśa

5.6

अभ्राणामेव सर्वेषां वज्रमेवोत्तमं सदा

abhrāṇāmeva sarveṣāṃ vajramevottamaṃ sadā

5.6.2

शेषाणि त्रीणि चाभ्राणि घोरान् व्याधीन् सृजन्ति हि

śeṣāṇi trīṇi cābhrāṇi ghorān vyādhīn sṛjanti hi

5.6.3

तस्माद्यत्नेन सद्वैद्यैर्वर्जनीयानि नित्यशः

tasmādyatnena sadvaidyairvarjanīyāni nityaśaḥ

5.7

वज्राभ्रं धम्यमानेऽग्नौ विकृतिं न क्वचिद् भजेत्

vajrābhraṃ dhamyamāne'gnau vikṛtiṃ na kvacid bhajet

5.7.2

सेवितं तन्मृतिं हन्ति वज्राभं कुरुते वपुः

sevitaṃ tanmṛtiṃ hanti vajrābhaṃ kurute vapuḥ

5.8

पिनाकं चाग्निसंतप्तं विमुञ्चति दलोच्चयम्

pinākaṃ cāgnisaṃtaptaṃ vimuñcati daloccayam

5.8.2

सेवितं चैकमासेन कृमिं कुष्ठं करोत्यलम्

sevitaṃ caikamāsena kṛmiṃ kuṣṭhaṃ karotyalam

Rasaprakāśasudhākara