4.60

यत्र क्वापि गिरौ श्रेष्ठे लभ्यते भ्रामकोपलः

yatra kvāpi girau śreṣṭhe labhyate bhrāmakopalaḥ

4.60.2

तस्माज्जातं तु यल्लौहं भ्रामकं तदिहोच्यते

tasmājjātaṃ tu yallauhaṃ bhrāmakaṃ tadihocyate

4.61

विंध्याचले भवेदश्मा लोहं चुम्बति चाद्भुतम्

viṃdhyācale bhavedaśmā lohaṃ cumbati cādbhutam

4.61.2

न मुञ्चत्येव सततं शिवभक्तिं यथानुगः

na muñcatyeva satataṃ śivabhaktiṃ yathānugaḥ

4.62

हिमाद्रौ लभ्यते दुःखाद् यः स्पृष्टो द्रावयेदयः

himādrau labhyate duḥkhād yaḥ spṛṣṭo drāvayedayaḥ

4.62.2

सुवर्णादींश्च तद्वद्धि तत्कांतं द्रावकं भवेत्

suvarṇādīṃśca tadvaddhi tatkāṃtaṃ drāvakaṃ bhavet

4.63

शुद्धे कांतभवे पात्रे शृतं दुग्धं हि नोद्गिरेत्

śuddhe kāṃtabhave pātre śṛtaṃ dugdhaṃ hi nodgiret

4.63.2

पानीयं क्वथितं चास्मिन् हिंगुगंधसमं भवेत्

pānīyaṃ kvathitaṃ cāsmin hiṃgugaṃdhasamaṃ bhavet

4.64

तैलबिंदुर्जले क्षिप्तो न चातिप्रसृतो भवेत्

tailabiṃdurjale kṣipto na cātiprasṛto bhavet

4.64.2

लेपोऽपि नैव जायेत शुद्धकांतस्य लक्षणम्

lepo'pi naiva jāyeta śuddhakāṃtasya lakṣaṇam

4.65

मुंडाच्छतगुणं तीक्ष्णं तीक्ष्णात्कांतं महागुणम्

muṃḍācchataguṇaṃ tīkṣṇaṃ tīkṣṇātkāṃtaṃ mahāguṇam

4.65.2

कोटिसंख्यागुणं प्रोक्तं चुंबकं द्रावकं तथा

koṭisaṃkhyāguṇaṃ proktaṃ cuṃbakaṃ drāvakaṃ tathā

4.66

शशरक्तेन लिप्तं हि सप्तवारेण तापितम्

śaśaraktena liptaṃ hi saptavāreṇa tāpitam

4.66.2

कांतादिसर्वलोहं हि शुध्यत्येव न संशयः

kāṃtādisarvalohaṃ hi śudhyatyeva na saṃśayaḥ

4.67

सामुद्रलवणैस्तद्वल्लेपितं त्रिफलाजले

sāmudralavaṇaistadvallepitaṃ triphalājale

4.67.2

निर्वापितं भवेच्छुद्धं सत्यं गुरुवचो यथा

nirvāpitaṃ bhavecchuddhaṃ satyaṃ guruvaco yathā

4.68

लोहचूर्णं घृताक्तं हि क्षिप्त्वा लोहस्य खर्परे

lohacūrṇaṃ ghṛtāktaṃ hi kṣiptvā lohasya kharpare

4.68.2

अग्निवर्णप्रभं यावत्तावद्दर्व्या प्रचालयेत्

agnivarṇaprabhaṃ yāvattāvaddarvyā pracālayet

4.69

खल्वे च विपचेत्तद्वत् पञ्चवारम् अतः परम्

khalve ca vipacettadvat pañcavāram ataḥ param

4.69.2

वरोदकैः पुटेल्लोहं चतुर्वारम् इदं खलु

varodakaiḥ puṭellohaṃ caturvāram idaṃ khalu

Rasaprakāśasudhākara