1.79

पठन् द्विजो वागृषभत्वम् ईयात् स्यात् क्षत्रियो भूमिपतित्वम् ईयात्

paṭhan dvijo vāgṛṣabhatvam īyāt syāt kṣatriyo bhūmipatitvam īyāt

1.79.2

वणिग्जनः पण्यफलत्वम् ईयाज् जनश् च शूद्रो ऽपि महत्त्वम् ईयात्

vaṇigjanaḥ paṇyaphalatvam īyāj janaś ca śūdro 'pi mahattvam īyāt

2.1

नारदस्य तु तद् वाक्यं श्रुत्वा वाक्यविशारदः

nāradasya tu tad vākyaṃ śrutvā vākyaviśāradaḥ

2.1.2

पूजयामास धर्मात्मा सहशिष्यो महामुनिः

pūjayāmāsa dharmātmā sahaśiṣyo mahāmuniḥ

2.2

यथावत् पूजितस् तेन देवर्षिर् नारदस् तदा

yathāvat pūjitas tena devarṣir nāradas tadā

2.2.2

आपृष्ट्वैवाभ्यनुज्ञातः स जगाम विहायसम्

āpṛṣṭvaivābhyanujñātaḥ sa jagāma vihāyasam

2.3

स मुहूर्तं गते तस्मिन् देवलोकं मुनिस् तदा

sa muhūrtaṃ gate tasmin devalokaṃ munis tadā

2.3.2

जगाम तमसातीरं जाह्नव्यास् त्व् अविदूरतः

jagāma tamasātīraṃ jāhnavyās tv avidūrataḥ

2.4

स तु तीरं समासाद्य तमसाया महामुनिः

sa tu tīraṃ samāsādya tamasāyā mahāmuniḥ

2.4.2

शिष्यम् आह स्थितं पार्श्वे दृष्ट्वा तीर्थम् अकर्दमम्

śiṣyam āha sthitaṃ pārśve dṛṣṭvā tīrtham akardamam

2.5

अकर्दमम् इदं तीर्थं भरद्वाज निशामय

akardamam idaṃ tīrthaṃ bharadvāja niśāmaya

2.5.2

रमणीयं प्रसन्नाम्बु सन्मनुष्यमनो यथा

ramaṇīyaṃ prasannāmbu sanmanuṣyamano yathā

2.6

न्यस्यतां कलशस् तात दीयतां वल्कलं मम

nyasyatāṃ kalaśas tāta dīyatāṃ valkalaṃ mama

2.6.2

इदम् एवावगाहिष्ये तमसातीर्थम् उत्तमम्

idam evāvagāhiṣye tamasātīrtham uttamam

2.7

एवम् उक्तो भरद्वाजो वाल्मीकेन

evam ukto bharadvājo vālmīkena

2.7.2

प्रायच्छत मुनेस् तस्य वल्कलं नियतो गुरोः

prāyacchata munes tasya valkalaṃ niyato guroḥ

2.8

स शिष्यहस्ताद् आदाय वल्कलं नियतेन्द्रियः

sa śiṣyahastād ādāya valkalaṃ niyatendriyaḥ

2.8.2

विचचार ह पश्यंस् तत् सर्वतो विपुलं वनम्

vicacāra ha paśyaṃs tat sarvato vipulaṃ vanam

2.9

तस्याभ्याशे तु मिथुनं चरन्तम् अनपायिनम्

tasyābhyāśe tu mithunaṃ carantam anapāyinam

2.9.2

ददर्श भगवांस् तत्र क्रौञ्चयोश् चारुनिःस्वनम्

dadarśa bhagavāṃs tatra krauñcayoś cāruniḥsvanam

Rāmāyaṇa