7.15

ईदृशैस् तैर् अमात्यैस् तु राजा दशरथो ऽनघः

īdṛśais tair amātyais tu rājā daśaratho 'naghaḥ

7.15.2

उपपन्नो गुणोपेतैर् अन्वशासद् वसुंधराम्

upapanno guṇopetair anvaśāsad vasuṃdharām

7.16

अवेक्षमाणश् चारेण प्रजा धर्मेण रञ्जयन्

avekṣamāṇaś cāreṇa prajā dharmeṇa rañjayan

7.16.2

नाध्यगच्छद् विशिष्टं वा तुल्यं वा शत्रुम् आत्मनः

nādhyagacchad viśiṣṭaṃ vā tulyaṃ vā śatrum ātmanaḥ

7.17

तैर् मन्त्रिभिर् मन्त्रहितैर् निविष्टैर् वृतो ऽनुरक्तैः कुशलैः समर्थैः

tair mantribhir mantrahitair niviṣṭair vṛto 'nuraktaiḥ kuśalaiḥ samarthaiḥ

7.17.2

स पार्थिवो दीप्तिम् अवाप युक्तस् तेजोमयैर् गोभिर् इवोदितो ऽर्कः

sa pārthivo dīptim avāpa yuktas tejomayair gobhir ivodito 'rkaḥ

8.1

तस्य त्व् एवंप्रभावस्य धर्मज्ञस्य महात्मनः

tasya tv evaṃprabhāvasya dharmajñasya mahātmanaḥ

8.1.2

सुतार्थं तप्यमानस्य नासीद् वंशकरः सुतः

sutārthaṃ tapyamānasya nāsīd vaṃśakaraḥ sutaḥ

8.2

चिन्तयानस्य तस्यैवं बुद्धिर् आसीन् महात्मनः

cintayānasya tasyaivaṃ buddhir āsīn mahātmanaḥ

8.2.2

सुतार्थं वाजिमेधेन किमर्थं न यजाम्य् अहम्

sutārthaṃ vājimedhena kimarthaṃ na yajāmy aham

8.3

स निश्चितां मतिं कृत्वा यष्टव्यम् इति बुद्धिमान्

sa niścitāṃ matiṃ kṛtvā yaṣṭavyam iti buddhimān

8.3.2

मन्त्रिभिः सह धर्मात्मा सर्वैर् एव कृतात्मभिः

mantribhiḥ saha dharmātmā sarvair eva kṛtātmabhiḥ

8.4

ततो ऽब्रवीद् इदं राजा सुमन्त्रं मन्त्रिसत्तमम्

tato 'bravīd idaṃ rājā sumantraṃ mantrisattamam

8.4.2

शीघ्रम् आनय मे सर्वान् गुरूंस् तान् सपुरोहितान्

śīghram ānaya me sarvān gurūṃs tān sapurohitān

8.5

एतच् छ्रुत्वा रहः सूतो राजानम् इदम् अब्रवीत्

etac chrutvā rahaḥ sūto rājānam idam abravīt

8.5.2

ऋत्विग्भिर् उपदिष्टो ऽयं पुरावृत्तो मया श्रुतः

ṛtvigbhir upadiṣṭo 'yaṃ purāvṛtto mayā śrutaḥ

8.6

सनत्कुमारो भगवान् पूर्वं कथितवान् कथाम्

sanatkumāro bhagavān pūrvaṃ kathitavān kathām

8.6.2

ऋषीणां संनिधौ राजंस् तव पुत्रागमं प्रति

ṛṣīṇāṃ saṃnidhau rājaṃs tava putrāgamaṃ prati

8.7

काश्यपस्य तु पुत्रो ऽस्ति विभाण्डक इति श्रुतः

kāśyapasya tu putro 'sti vibhāṇḍaka iti śrutaḥ

8.7.2

ऋष्यशृङ्ग इति ख्यातस् तस्य पुत्रो भविष्यति

ṛṣyaśṛṅga iti khyātas tasya putro bhaviṣyati

Rāmāyaṇa